ຄະນະຜູ້ແທນສະພາແຫ່ງຊາດລາວ ສໍາເລັດການຢ້ຽມຢາມ ແລະເຮັດວຽກຢູ່ຝຣັ່ງ

(ສພຊ) - ລະຫວ່າງວັນທີ 28-30 ມີນາ 2024 ຄະນະຜູ້ແທນສະພາແຫ່ງຊາດ ແຫ່ງ ສປປລາວ ນໍາໂດຍທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ສືບຕໍ່ຢ້ຽມຢາມ ແລະ ເຮັດວຽກຢູ່ສາທາລະນະລັດຝຣັ່ງ ພາຍ ຫຼັງສໍາເລັດການເຂົ້າຮ່ວມກອງປະຊຸມໃຫຍ່ສະຫະພັນລັດຖະສະພາສາກົນ (IPU) ຄັ້ງທີ 148 ທີ່ເມືອງເຈນິວາ, ສະມາພັນ ທະລັດສະວິດ; ການເຄື່ອນໄຫວຄັ້ງນີ້ ມີຈຸດປະສົງເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດລາວ-ຝຣັ່ງ ກໍຄືລະຫວ່າງສອງອົງການນິຕິບັດຍັດ ໃຫ້ນັບມື້ນັບໄດ້ຮັບການເສີມຂະຫຍາຍ.

ໃນວັນທີ 28 ມີນາ 2024 ທ່ານຮອງປະທານສະພາແຫ່ງຊາດລາວ ພ້ອມຄະນະ ໄດ້ເຮັດວຽກກັບທ່ານປະທານຄະ ນະມິດຕະພາບລັດຖະສະພາຝຣັ່ງ ກັບ ລາວ-ກໍາປູເຈຍ ຂອງສະພາສູງຝຣັ່ງ ແລະ ເຮັດວຽກກັບທ່ານປະທານຄະນະມິດຕະ ພາບລັດຖະສະພາຝຣັ່ງ-ລາວ ຂອງສະພາແຫ່ງຊາດຝຣັ່ງ; ການພົບປະເຮັດວຽກຄັ້ງນີ້, ສອງຝ່າຍໄດ້ຕີລາຄາຄືນການພົວພັນຮ່ວມມືລະຫວ່າງສອງປະເທດ ລວມທັງສອງອົງການນິຕິບັດຍັດ ເຊິ່ງເຫັນວ່າໄດ້ຮັບການເສີມຂະຫຍາຍຢ່າງຕໍ່ເນື່ອງ ສະແດງອອກມີແລກປ່ຽນຄະນະຜູ້ແທນຂັ້ນຕ່າງໆນຳກັນ. ສ.ຝຣັ່ງ ໄດ້ໃຫ້ການຊ່ວຍເຫຼືອ ສປປ ລາວ ໃນຫຼາຍຂະແໜງການເປັນຕົ້ນແມ່ນດ້ານສາທາລະນະສຸກ,ກະສິກຳ, ພັດທະນາຊົນນະບົດ, ວັດທະນະທຳ, ພັດທະນາຕົວເມືອງ ແລະ ການຊ່ວຍເຫຼືອດ້ານການສຶກສາ; ນອກຈາກນີ້, ຝຣັ່ງໄດ້ຊ່ວຍເຫຼືອ ສປປລາວ ໃນຖານະເປັນປະເທດສະມາຊິກຂອງອົງການຝຣັ່ງໂກໂຟນີ ໂດຍຜ່ານອົງການຝຣັ່ງເພື່ອການພັດທະນາ (AFD), ກອງທຶນບຸລິມະສິດພິເສດ (FSP) ແລະ ໃຫ້ການຊ່ວຍເຫຼືອທັງໃນຮູບແບບຫຼາຍຝ່າຍ ແລະ ຜ່ານສະຖານທູດຝຣັ່ງໂດຍກົງ. ພ້ອມດຽວກັນນີ້, ສອງຝ່າຍ ຍັງໄດ້ປຶກສາຫາລືເພື່ອຊອກຫາຊ່ອງທາງໃນການພົວພັນຮ່ວມມື ເປັນຕົ້ນແມ່ນການແລກປ່ຽນຄະນະຜູ້ແທນລະຫວ່າງສອງປະເທດ ກໍຄືສອງສະພາ, ສືບຕໍ່ພົວພັນຮ່ວມມືໃນຂົງເຂດທີ່ມີທ່າແຮງນໍາກັນ.

ໃນວັນດຽວກັນນີ້, ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດສະພາແຫ່ງຊາດ ແຫ່ງ ສປປ ລາວ ກໍໄດ້ພົບປະກັບທ່ານ Bourlanges ປະທານກໍາມາທິການການຕ່າງປະເທດ ສະພາແຫ່ງຊາດ ແຫ່ງ ສ.ຝຣັ່ງ ເຊິ່ງສອງຝ່າຍໄດ້ປຶກສາຫາລືທິດທາງການຮ່ວມມືລະຫວ່າງສອງອົງການນິຕິບັນຍັດໃນຕໍ່ໜ້າ ເປັນຕົ້ນສືບຕໍ່ແລກປ່ຽນຄະນະຜູ້ແທນທີ່ຕິດພັນກັບການແລກປ່ຽນຂໍ້ມູນຂ່າວສານກ່ຽວກັບການຈັດຕັ້ງປະຕິບັດພາລະບົດບາດດ້ານນິຕິບັນຍັດ; ສືບຕໍ່ຊຸກຍູ້ໃຫ້ມີການເຂົ້າ ຮ່ວມໂຄງການສ້າງຄວາມເຂັ້ມແຂງ ແລະການເຝິກອົບຮົມໃຫ້ແກ່ສະມາຊິກສະພາແຫ່ງຊາດ ແລະພະນັກງານວິຊາການທີ່ລັດຖະສະພາຝຣັ່ງໃຫ້ທຶນສະໜັບສະ ໜູນ; ຊຸກຍູ້ ແລະ ສົ່ງເສີມໃຫ້ລັດຖະບານທັງສອງປະເທດ ສືບຕໍ່ຈັດຕັ້ງປະ ຕິບັດບັນດາສັນຍາ, ສົນທິສັນຍາ ແລະ ບັນດາໂຄງການຮ່ວມມືສອງຝ່າຍໄດ້ຕົກລົງນໍາກັນ; ຊຸກຍູ້ໃຫ້ສອງປະເທດມີການລົງ ທຶນ ແລະ ຄ້າຂາຍນໍາກັນ ໃຫ້ຫຼາຍຂຶ້ນກວ່າເກົ່າ; ພົວພັນ ແລະ ຮ່ວມມືໃນການເຄື່ອນໄຫວວຽກງານຢູ່ເວທີລັດຖະສະພາພາກພື້ນ ແລະ ສາກົນ. ຝ່າຍລາວຍັງໄດ້ແຈ້ງໃຫ້ຝ່າຍຝຣັ່ງຊາບວ່າ ລະຫວ່າງວັນທີ 08-12 ເມສານີ້ ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມກໍາມາທິການວຽກງານເສດຖະກິດ, ສັງຄົມ ແລະ ສິ່ງແວດລ້ອມ ຂອງສະມັດຊາລັດຖະສະພາປະເທດທີ່ໃຊ້ພາສາຝຣັ່ງ ທີ່ແຂວງຫຼວງພະບາງ ແລະ ໃນເດືອນຕຸລາ 2024 ສປປລາວ ຈະເປັນປະທານ ແລະ ເຈົ້າພາບຈັດກອງປະຊຸມສຸດຍອດອາຊຽນ ແລະ ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໃຫຍ່ສະມັດຊາລັດຖະສະພາລະ ຫວ່າງຊາດອາຊຽນ (AIPA) ຄັ້ງທີ 45 ທີ່ນະຄອນຫຼວງວຽງຈັນ.

ນອກນັ້ນ, ຄະນະຍັງໄດ້ໄປຢ້ຽມຢາມພື້ນຖານການຜະລິດ ແລະ ວັດທະນະທໍາຈໍານວນໜຶ່ງຢູ່ນະຄອນຫຼວງປາຣີ.

ໃນຕອນຄໍ່າຂອງວັນທີ 30 ມີນາ 2024 ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ກໍໄດ້ພົບປະໂອ້ລົມກັບຄະນະສໍາພັນຄົນລາວ ແລະ ຄົນເຊື້ອສາຍລາວ ຫຼາຍກວ່າ 60 ຄົນ ຢູ່ສະຖານທູດລາວປະຈໍາປາຣີ ເພື່ອແຈ້ງໃຫ້ພີ່ນ້ອງຄົນເຊື້ອຊາດລາວທີ່ອາໄສຢູ່ປະເທດຝຣັ່ງຊາບກ່ຽວກັບສະພາບອັນພົ້ນເດັ່ນໃນການພັດທະນາເສດຖະກິດ-ສັງ ຄົມຂອງລາວໃນໄລຍະຫຼັງໆມານີ້ ແລະ ໄດ້ຢືນຢັນຄືນກ່ຽວກັບນະໂຍບາຍຂອງ ສປປລາວ ເຊິ່ງຍາມໃດກໍຖືວ່າເອົາພີ່ນ້ອງຊາວລາວທີ່ດຳລົງຊີວິດຢູ່ຕ່າງປະເທດ ເປັນວົງຄະນາຍາດອັນດຽວທີ່ບໍ່ສາມາດຕັດແຍກອອກຈາກວົງຄະນາຍາດແຫ່ງຊາດໄດ້ ພ້ອມທັງສະແດງຄວາມຊົມເຊີຍ, ຕີລາຄາສູງຕໍ່ການເຄື່ອນໄຫວຂອງພີ່ນ້ອງຄົນເຊື້ອຊາດລາວຢູ່ຝຣັ່ງ ທີ່ຍາມໃດກໍໄດ້ມີການປະຕິບັດກົດໜາຍຂອງປະເທດເຈົ້າພາບ ແລະ ມີການອວ່າຍໜ້າມາຫາບ້ານເກີດເມືອງນອນເພື່ອປະກອບສ່ວນໃນການພັດ ທະນາປະເທດຊາດນັບມື້ນັບຫຼາຍ.

แชร์