ຫໍວາງສະແດງ 50 ຊົນເຜົ່າ ກາຍເປັນຈຸດເດັ່ນດຶງດູດນັກທ່ອງທ່ຽວເຂົ້າທ່ຽວ ສວນພຶກສາ

ສວນພຶກສາເປັນສະຖານທີ່ທ່ອງທ່ຽວທໍາມະຊາດຕິດພັນກັບການອະນຸລັກຮັກສາວັດທະນາທໍາຮີດຄອງປະເພນີອັນດີງາມຂອງປະຊາຊົນລາວບັນດາເຜົ່າ ແລະໄດ້ເອົາໃຈໃສ່ກໍ່ສ້າງພ້ອມທັງປັບປຸງ ແລະພັດທະນາຢ່າງຕໍ່ເນື່ອງເຮັດໃຫ້ພາຍໃນສວນພຶກສາມີຫລາຍກິດຈະກໍາການທ່ອງທ່ຽວທີ່ສຳຄັນ ແລະໂດດເດັ່ນໂດຍສະເພາະແມ່ນຫໍວາງສະແດງ 50 ຊົນເຜົ່າ ທີ່ຫາກໍ່ເປີດໃຫ້ບໍລິການອັນໄດ້ກາຍເປັນຈຸດເດັ່ນ ແລະດຶງດູດນັກທ່ອງທ່ຽວທັງພາຍໃນ ແລະຕ່າງປະເທດໃຫ້ເຂົ້າມາທ່ຽວຫຼາຍຂຶ້ນ.

ທ່ານ ພູວົງ ພະມີສິດ ເຈົ້າຂອງຮ້ານຄໍາພູວົງ ແລະເຈົ້າຂອງສວນພຶກສາໄດ້ໃຫ້ສໍາພາດວ່າເນື່ອງໃນໂອກາດເຂົ້າຮ່ວມກອງປະຊຸມທຸລະກິດລາວຄັ້ງທີ 15 ທີ່ຫໍປະຊຸມແຫ່ງຊາດນະຄອນຫຼວງວຽງຈັນ ເມື່ອວັນທີ 2 ເມສາຜ່ານມາວ່າ: ກອງປະຊຸມທຸລະກິດລາວຄັ້ງທີ 15 ປີ 2024 ນີ້ ເຊິ່ງເປັນເວທີກອງປະຊຸມໃຫຍ່ສໍາລັບນັກທຸລະກິດທັງພາຍໃນ ແລະ ຕ່າງປະເທດ ເຊີ່ງພວກເຮົາໄດ້ມີໂອກາດສະເໜີ ຄໍາຄິດຄໍາເຫັນ ແລະ ບາງຂໍ້ສະເໜີ ບັນຫາທີ່ພວກເຮົາພົບພໍ້ໃນການດໍາເນີນທຸລະກິດ ໂດຍສະເພາະ ໃນຂະແໜງການບໍລິການທ່ອງທ່ຽວ ຊຶ່ງຕົວແທນກໍໄດ້ສະເໜີບາງບັນຫາ ຕໍ່ລັດຖະບານເພື່ອ ນໍາເອົາໄປເພື່ອປັບປຸງແກ້ໄຂ ຮ່ວມກັນ ສ້າງໃຫ້ບັນຍາກາດການລົງທຶນໃຫ້ຫຼາຍຂຶ້ນເກີດໃຫ້ມີຂະບວນການດຶງດູດນັກທ່ອງທ່ຽວເຂົ້າມາ ເພີ່ມຂຶ້ນ ເພື່ອສ້າງລາຍຮັບໃຫ້ຜູ້ປະກອບການ, ພໍ່ແມ່ປະຊາຊົນໃນທ້ອງຖິ່ນ ໄດ້ນໍາເອົາສິນຄ້າ, ເກີດມີການຜະລິດເພື່ອມາຮັບໃຊ້ ແລະບໍລິການໃຫ້ນັກທ່ອງທ່ຽວ.

ນອກຈາກນັ້ນ ທ່ານ ພູວົງ ພະມີສິດ ຍັງໄດ້ຍົກໃຫ້ເຫັນ ຈຸດທີ່ຜູ້ຕາງໜ້າທະນາຄານໂລກຍົກຂຶ້ນມາໃນກອງປະຊຸມທຸລະກິດລາວຄັ້ງທີ 15 ນີ້ວ່າປະເທດເຮົາແມ່ນຂາດເງິນຕາຕ່າງປະເທດສະນັ້ນ, ໂຕທີ່ເຮົາຕ້ອງໄດ້ພ້ອມກັນແກ້ໄຂແມ່ນດຶງເອົານັກທ່ອງທ່ຽວຕ່າງປະເທດໃຫ້ເຂົ້າມາໄດ້ຫຼາຍທີ່ສຸດເພື່ອ ເອົາເງິນຕາເຂົ້າມາປະເທດເຮົາໃຫ້ໄດ້ຫຼາຍຂ້າພະເຈົ້າໄດ້ດີໃຈທີ່ສຸດທີ່ກອງປະຊຸມໄດ້ຍົກບັນຫານີ້ຂຶ້ນມາຫາລືຊຶ່ງສວນພຶກສາຂອງຂ້າພະເຈົ້າກໍເປັນສ່ວນໜຶ່ງທີ່ດຶງດູດເອົານັກທ່ອງທ່ຽວເຂົ້າມາທ່ຽວໂດຍສະເພາະໃນນະຄອນຫຼວງວຽງຈັນເຊີ່ງພວກເຮົາໄດ້ສ້າງຫໍວາງສະແດງ 50 ຊົນເຜົ່າທີ່ຫາກໍ່ເປີດໃຫ້ບໍລິການຢູ່ສວນພຶກສາອັນໄດ້ກາຍເປັນຈຸດຂາຍເອົາການສະແດງວັດຖະນະທໍາຊົນເຜົ່າມາເປັນຈຸດເດັ່ນ ແລະດຶງດູດນັກທ່ອງທ່ຽວເຂົ້າມາເພາະວັດຖະນະທໍາມັນເປັນມໍລະດົກທີ່ບໍ່ມີວັນບົກແຫ້ງຖ້າເຮົາຫາກນໍາສະເໜີໃຫ້ມີຄວາມໂດດເດັ່ນ ແລະສາມາດເຂົ້າເຖິງໄດ້ງ່າຍກໍ່ຈະເປັນທ່າແຮງໜຶ່ງທີ່ດຶງດູດນັກທ່ອງທ່ຽວທັງພາຍໃນ ແລະຕ່າງປະເທດໃຫ້ເຂົ້າມາເພີ່ມຂຶ້ນ.

ໂດຍ: ສາວລາວໃຕ້

แชร์