ການແກ້ໄຂບັນຫາຢາເສບຕິດຢູ່ແຂວງສະຫວັນນະເຂດ ມີຜົນສຳເລັດຫຼາຍດ້ານ

ທ່ານ ບຸນໂຈມ ອຸບົນປະເສີດ ກຳມະການສູນກາງພັກເລຂາພັກແຂວງເຈົ້າແຂວງສະຫວັນນະເຂດ ໃຫ້ກຽດເຂົ້າຮ່ວມເປັນປະທານໃນກອງປະຊຸມສະຫຼຸບຜົນການຈັດຕັ້ງຜັນຂະຫຍາຍວາລະ ແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແຕ່ປີ 2021-2023 ແລະ ວາງແຜນການວຽກ ງານຈຸດສຸມປີ2024-2025 ຂອງແຂວງສະຫວັນນະເຂດ ເຊິ່ງໄດ້ຈັດຂຶ້ນໃນວັນທີ 29 ມີນາ 2024 ທີ່ສະໂມສອນຫ້ອງວ່າການ ປົກຄອງແຂວງ. ເຂົ້າຮ່ວມໃນກອງ ປະຊຸມຄັ້ງນີ້ມີຄະນະປະຈຳພັກ ແຂວງ, ກຳມະການພັກແຂວງ, ຄະນະພັກ-ຄະນະບັນຊາ ປກຊ-ປກສ ແຂວງ, ຫົວໜ້າພະແນກການອ້ອມ ຂ້າງແຂວງ, ເຈົ້າເມືອງ-ເຈົ້ານະ ຄອນຕະຫຼອດເຖິງພາກສ່ວນ ທີ່ກ່ຽວຂ້ອງໃນທົ່ວແຂວງເຂົ້າຮ່ວມ.

ໂອກາດນີ້, ທ່ານ ພັອ ບຸນເລີດ ຄະທຸມພອນ ຮອງຫົວໜ້າກອງບັນຊາການ ປກສ ແຂວງໄດ້ຂຶ້ນຜ່ານບົດສະຫຼຸບວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຕ່ປີ 2021-2023 ແລະວາງທິດທາງແຜນການວຽກຈຸດສຸມຕໍ່ໜ້າໂດຍສັງເຂບ: ຜ່ານການເຄື່ອນໄຫວຈັດຕັ້ງປະຕິບັດຕົວຈິງແຕ່ລະໄລຍະກໍ່ເຫັນວ່າມີ ຜົນສຳເລັດໃນຫຼາຍດ້ານເປັນຕົ້ນ: ຈັດພິທີທຳລາຍຢາເສບຕິດທີ່ສານຕັດສິນໃຊ້ໄດ້ຢ່າງເດັດຂາດແລ້ວ 3 ຄັ້ງ, ມີຢາເສບຕິດປະເພດຕ່າງໆ ທີ່ທຳລາຍຄື: ຢາບ້າ 48,80 ກິໂລ, ຢາໄອສ໌ 327,20 ກຼາມ, ຢາອີ 26,05 ກຼາມ, ຢາເຄຕາມິນ 472,56 ກຼາມ, ກັນຊາແຫ້ງ 461 ກິໂລ; ດ້ານວຽກງານສືບສວນ-ສອບສວນນັບແຕ່ປີ 2021-2023 ໄດ້ຂຶ້ນບັນຊີເປົ້າໝາຍຄ້າ-ຂາຍຢາເສບຕິດໄດ້ທັງໝົດ 2.788 ຄົນ, ໃນນັ້ນ: ລາຍໃຫຍ່ 320 ຄົນ, ແກ້ໄຂໄດ້ 224 ຄົນ, ລາຍກາງ 402 ຄົນ, ແກ້ໄຂໄດ້ 321 ຄົນ ແລະລາຍຍ່ອຍ 2.066 ຄົນ, ແກ້ໄຂໄດ້ 987 ຄົນ, ຂຶ້ນ ບັນຊີເປົ້າໝາຍເສບທັງໝົດ 17.215 ຄົນ, ສົມທົບກັບອຳນາດ ການປົກຄອງບ້ານສຶກສາອົບຮົມ ຢູ່ຂັ້ນຮາກຖານ 15.751 ຄົນ, ແນະນຳຜູ້ປົກຄອງສົ່ງເຂົ້າສູນ ບຳບັດ-ປິ່ນປົວຜູ້ຕິດຢາເສບຕິດ ຈຳນວນ 1.052 ຄົນ, ໄດ້ກຳ ນົດພື້ນທີ່ຫຼໍ່ແຫຼມຈຳນວນ 303 ຈຸດ, ແກ້ໄຂໄດ້ 93 ຈຸດ ແລະສະ ຖານທີ່ສັບສົນ 24 ຈຸດ, ແກ້ໄຂ ໄດ້ 13 ຈຸດ; ດ້ານວຽກງານປາບ ປາມ ແລະແກ້ໄຂເປົ້າໝາຍນັບແຕ່ ເລີ່ມຈັດຕັ້ງປະຕິບັດວາລະແຫ່ງ ຊາດ ມາຮອດປະຈຸບັນສາມາດ ມ້າງຄະດີຢາເສບຕິດປະເພດ ຕ່າງໆໃນທົ່ວແຂວງໄດ້ທັງໝົດ 1.014 ເລື່ອງ, ກັກຜູ້ຖືກຫາໄດ້ 1.545 ຄົນ, ຢຶດຂອງກາງຢາບ້າ 8 ລ້ານກວ່າເມັດ, ຢາອີ 960 ເມັດ, ຢາເຄ 17 ຄົງ, ຢາໄອສ໌ 365 ຖົງ, ເຮໂລອີນ 164 ແທ່ງ(61 ພັນກວ່າກິໂລ), ກັນຊາແຫ້ງ 890 ກິໂລ, ໃບກະທ້ອມ 46 ກິໂລ, ກາ ເຟປະສົມສານເສບຕິດ 2 ພັນ ກວ່າຊອງ, ຢາດີໄອ 929 ກວດ ແລະອື່ນໆອີກຫຼາຍລາຍການ. ນອກຈາກການແກ້ໄຂບັນຫາຢາ ເສບຕິດແລ້ວ, ກໍ່ໄດ້ແກ້ໄຂບັນຫາ ປະກົດການຫຍໍ້ທໍ້ຕ່າງໆໄປພ້ອມໆ ກັນເຊັ່ນ: ລັກຊັບ, ງັດແງະ ແລະບັນຫາອາຊະຍາກຳອື່ນໆໄດ້ 834 ລາຍ, ກັກຕົວຜູ້ຖືກຫາ 906 ຄົນ ເພື່ອນຳໄປດຳເນີນຄະດີຕາມລະ ບຽບກົດໝາຍ.

ຈາກນັ້ນ, ທ່ານ ພົຈວ ສົມໝາຍ ພົມມະຈັນ ກຳມະການປະຈຳພັກ ແຂວງ ຫົວໜ້າກອງບັນຊາການ ປກສ ແຂວງ ໄດ້ຜ່ານຂໍ້ຕົກລົງ ຂອງເຈົ້າແຂວງສະຫວັນນະເຂດ ວ່າດ້ວຍການແຕ່ງຄະນະກຳມະການແກ້ໄຂບັນຫາຢາເສບຕິດຂັ້ນ ແຂວງ 2024-2025 ແລະຂໍ້ຕົກລົງວ່າດ້ວຍການແບ່ງຄວາມຮັບຜິດຊອບຂອງແຕ່ລະພະແນກການທີ່ກ່ຽວຂ້ອງ, ພ້ອມນີ້, ທ່ານປະທານກອງປະຊຸມຍັງໄດ້ມີຄຳເຫັນເຈາະຈີ້ມຕໍ່ກັບການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ພາຍໃນແຂວງສະຫວັນນະເຂດ ແນໃສ່ເພື່ອເຮັດໃຫ້ວຽກງານດັ່ງກ່າວມີຜົນສຳເລັດຕາມແຜນການທີ່ວາງໄວ້./.

แชร์