ປະທານປະເທດ ອ່ານສານອ່ວຍພອນປີໃໝ່ລາວ

  ໃນວັນທີ 11 ເມສາ 2019, ທີ່ທຳນຽມປະທານປະເທດ, ທ່ານ ບຸນຍັງ ວໍລະຈິດ ປະທານປະເທດໄດ້ອ່ານສານອວຍພອນປີໃໝ່ລາວ ພສ 2562 ເພື່ອເປັນສິລິມຸງຄຸນ ແລະ ນຳເອົາຄວາມສາມັກຄີອັນອົບອຸ່ນຄວາມເປັນຫ່ວງເປັນໄຍອັນບໍລິສຸດ, ຝາກຄວາມຢື້ຢາມຖາມຂ່າວ ແລະ ສົ່ງພອນໄຊອັນປະເສີດມາຍັງປະຊາ ຊົນລາວບັນດາເຜົ່າທີ່ຢູ່ພາຍໃນ ແລະຕ່າງປະເທດ, ທັງຊາວຕ່າງປະເທດທີ່ພວມດໍາລົງຊີວິດ ແລະປະຕິບັດພາລະກິດຂອງຕົນຢູ່ ສປປ ລາວ.

 ໂດຍເນື້ອໃນສານອວຍພອນຂອງທ່ານປະທານປະເທດກ່າວວ່າ: ການສົ່ງທ້າຍປີເກົ່າ ແລະຕ້ອນຮັບປີໃໝ່ແມ່ນເປັນການສືບທອດຮີດຄອງປະເພນີອັນດີງາມຂອງຊາດລາວເຮົ າແຕ່ບູຮານນະການ, ທັງເປັນການຫວນຄືນຕະຫຼອດໄລຍະປີຈໍ ພສ 2561 ທີ່ຜ່ານພົ້ນໄປເວົ້າລວມກໍເປັນອີກປີໜຶ່ງທີ່ປວງຊົນລາວທັງຊາດມີຄວາມເອກອ້າງທະນົງໃຈ, ທົ່ວພັກ-ລັດ, ທົ່ວກໍາລັງປະກອບອາວຸດ ແລະປວງຊົນລາວທັງຊາດໄດ້ມີຄວາມສາມັກຄີຮ່ວມຈິດຮ່ວມໃຈກັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ຢ່າງເປັນຂະບວນຟົດຟື້ນ, ຮອບດ້ານ ແລະ ຕໍ່ເນື່ອງ , ພ້ອມກັນຜ່ານຜ່າທຸກອຸປະສັກຄວາມຫຍຸ້ງຍາກນາໆປະການທີ່ເກີດຂຶ້ນອັນໄດ້ປະກອບສ່ວນສໍາຄັນເຮັດໃຫ້ປະເທດຊາດສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປັບປຸງ ແລະຍົກສູງໃຫ້ດີຂຶ້ນເລື້ອຍໆ, ພິເສດໃນປີກາຍພວກເຮົາໄດ້ພ້ອມກັນສະເຫຼີມສະຫຼອງວັນສ້າງຕັ້ງເມືອງວຽງໄຊຖານທີ່ໝັ້ນຂອງການປະຕິວັດຄົບຮອບ 50 ປີ ແລະວັນສ້າງຕັ້ງກອງທັບປະຊາຊົນລາວຄົບຮອບ 70 ປີ ຂຶ້ນຢ່າງເປັນຂະບວນຟົດຟື້ນໃນຂອບເຂດທົ່ວປະເທດ, ສ້າງຄວາມເຊື່ອ ໝັ້ນຂອງປະຊາຊົນລາວບັນດາເຜົ່າຕໍ່ການນໍາພາຂອງພັກນັບມື້ນັບຂະຫຍາຍຕົວອອກຢ່າງກວ້າງຂວາງ ແລະ ເລິກເຊິ່ງທັງໄດ້ຮັບຄວາມເຊື່ອໝັ້ນຈາກເພື່ອນມິດສາກົນຫຼາຍຂຶ້ນ, ເຮັດໃຫ້ບົດບາດຂອງປະເທດໃນເວທີສາກົນສູງເດັ່ນຂຶ້ນ, ປະກອບສ່ວນສ້າງທ່ວງທ່າ ແລະບາດກ້າວທີ່ດີໃຫ້ແກ່ການກ້າວເຂົ້າສູ່ປີກຸນ ພສ 2562 ຊຶ່ງເປັນປີທີ່ມີຄວາມໝາຍສໍາຄັນຢ່າງຍິ່ງມີທັງກາລະໂອກາດ ແລະສິ່ງທ້າທາຍເພາະວ່າເປັນສົກປີທ້າຍສະໄໝຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ຊຶ່ງພວກເຮົາຈະໄດ້ສຸມໃສ່ແກ້ໄຂບັນຫາຕ່າງໆເພື່ອເຮັດໃຫ້ປະ ຊາຊົນຫຼຸດພົ້ນອອກຈາກຄວາມທຸກຍາກ ແລະສະພາວະດ້ອຍພັດທະນາໃນອະນາຄົດອັນໃກ້ນີ້,ຄຽງຄູ່ກັນນັ້ນພວກເຮົາຍັງຈະໄດ້ສຸມໃສ່ສ້າງຂະບວນການກະກຽມກອງປະຊຸມໃຫຍ່ຄັ້ງທີ XI ຂອງພັກສ້າງບາດລ້ຽວໃໝ່, ສ້າງກໍາລັງແຮງໃໝ່  ແລະສ້າງປັດໄຈໃໝ່ທີ່ສໍາຄັນເພື່ອເສີມຂະຫຍາຍຜົນສໍາເລັດໃນໄລຍະຜ່ານມາສູ້ຊົນບຸກບືນສ້າງສາປະເທດຊາດພວກເຮົາໃຫ້ນັບມື້ຈະເລີນຮຸ່ງເຮືອງ,ດັ່ງທີ່ປະທານ ໄກສອນ ພົມວິຫານ ໄດ້ເຄີຍຊີ້ທິດເຍືອງທາງໃຫ້ພວກເຮົາໄວ້ວ່າ “ສ້າງ ສປປ ລາວ ໃຫ້ມັ່ງຄັ່ງ, ເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະສີວິໄລ”.

  ທ່ານປະທານປະເທດກ່າວຕື່ມວ່າ: ດັ່ງນັ້ນ, ໂອກາດນີ້ຈຶ່ງຢາກຮຽກຮ້ອງມາຍັງພີ່ນ້ອງຮ່ວມຊາດທຸກເຜົ່າທຸກຊັ້ນຄົນ, ສະມາຊິກພັກ, ພະນັກງານ, ທະຫານ, ຕໍາຫຼວດຈົ່ງພ້ອມກັນເພີ່ມທະວີຮັກສາມູນເຊື້ອຄວາມສາມັກຄີອັນເປັນປຶກແຜ່ນແໜ້ນໜາ, ເຊີດຊູນໍ້າໃຈຮັກຊາດ, ຕັ້ງໜ້າເສີມຂະຫຍາຍມູນເຊື້ອອັນດີງາມຂອງຊາດລາວ-ຂອງຄົນລາວເຮົາໃຫ້ແຂງແຮງຂຶ້ນກວ່າເກົ່າ ແລະຖືໂອກາດນີ້ເຊີນຊວນບັນດາປະເທດເພື່ອນມິດ, ນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາສໍາຜັດກັບແຫຼ່ງທ່ອງທ່ຽວທາງທໍາມະຊາດທີ່ສວຍງາມ, ແຫຼ່ງທ່ອງທ່ຽວທາງປະຫວັດສາດອັນລໍ້າຄ່າທີ່ມີມາແຕ່ບູຮານນະການ, ມາສໍາຜັດກັບຮີດຄອງປະເພນີວັດທະນະທໍາອັນດີງາມຂອງລາວເຮົາໃຫ້ຫຼາຍຂຶ້ນ ແລະ ເນື່ອງໃນໂອກາດອັນເປັນສິລິມຸງຄຸນ ແລະ ເບີກບານມ່ວນຊື່ນນີ້, ອີກເທື່ອໜຶ່ງຂ້າພະເຈົ້າຕາງ ໜ້າໃຫ້ຄະນະບໍລິຫານງານສູນກາງພັກ ແລະລັດຖະບານຂໍສົ່ງພອນໄຊອັນປະເສີດມາຍັງພີ່ນ້ອງຮ່ວມຊາດພະນັກງານ, ທະຫານ, ຕໍາຫຼວດພ້ອມດ້ວຍປະຊາຊົນລາວບັນດາເຜົ່າທັງໝົດຈົ່ງມີພາລານາໄມສົມບູນ, ມີແຕ່ຄວາມຜາສຸກ ແລະມີຜົນສໍາເລັດໃໝ່ໃຫຍ່ຫຼວງກວ່າເກົ່າ ແລະຂໍສົ່ງຄວາມຢ້ຽມຢາມຖາມຂ່າວ ແລະຄວາມເປັນຫ່ວງເປັນໄຍຂອງການນໍາພັກ-ລັດ ໄປຍັງປະຊາຊົນ ເມືອງສະໜາມໄຊ ແລະປະຊາຊົນເຂດທີ່ໄດ້ຮັບຜົນກະທົບຈາກໄພທໍາມະຊາດໃນປີຜ່ານມາຈົ່ງເຂັ້ມແຂງ, ມີຄວາມຜາສຸກພ້ອມກັນຜ່ານຜ່າທຸກຄວາມຫຍຸ້ງຍາກສ້າງຈິດໃຈອັນໃໝ່ຮ່ວມກັນສ້າງປະຫວັດສາດໜ້າໃໝ່ໃນການສ້າງສາພັດທະນາປະເທດ ຊາດ.

ຂ່າວ: ພິມພອນ  

แชร์