ພູເບ້ຍ ມາຍນິງ ເລັ່ງສ້າງຄວາມເຂັ້ມແຂງຊຸມຊົນໃຫ້ມີຊີວິດການເປັນຢູ່ທີ່ດີຂຶ້ນ

 

ຊຶ່ງມີການດໍາເນີນກິດຈະການ ໄປຄຽງຄູ່ກັບການຊ່ວຍເຫຼືອສັງຄົມ ແລະ ສ້າງຄວາມເຂັ້ມແຂງໃຫ້ແກ່ຊຸມຊົນໃກ້ຄຽງໂຄງການ ເພື່ອໃຫ້ມີຊີວິດການເປັນຢູ່ທີ່ດີຂຶ້ນ ໂດຍຝຶກອົບຮົມການປູກ-ການລ້ຽງໃຫ້ປະຊາຊົນ, ຂະນະທີ່ພະນັກງານທັງໝົດ ກໍໄດ້ຮັບການພັດທະນາສີມືແຮງງານຢ່າງຕໍ່ເນື່ອງ.

ອີງຕາມຂໍ້ມູນທີ່ສະເໜີໃຫ້ຮູ້ໃນໂອກາດທີ່ ຕາງໜ້າບໍລິສັດພູເບ້ຍ ມາຍນິ່ງ ພົບ ປະກັບສື່ມວນຊົນຢູ່ສໍານັກງານໃຫຍ່ຂອງບໍລິ ສັດດັ່ງກ່າວ ທີ່ນະຄອນຫລວງວຽງຈັນ ໃນວັນທີ 15 ມີນາ 2024 ນີ້ ໃຫ້ຮູ້ວ່າ: ໃນແຕ່ລະປີ ບໍລິສັດ ພູເບ້ຍ ມາຍນິ້ງ ຈຳກັດ ໄດ້ປະກອບສ່ວນມອບພັນທະໃຫ້ລັດຖະບານຫຼາຍລ້ານໂດລາ ຊຶ່ງລວມມີຄ່າຊັບພະຍາກອນແຮ່ທາດ, ອາກອນກຳໄລ, ຄ່າທຳນຽມຕ່າງໆທີ່ນຳເຂົ້າອຸປະກອນຮັບໃຊ້ໂຄງການ, ນອກຈາກນີ້ຍັງມີເງິນປັນຜົນ ແລະ ອື່ນໆອີກ. ປະຈຸບັນບໍລິສັດ ພູເບ້ຍ ມີພະນັກງານປະມານ 3.900 ກວ່າຄົນ, ໃນນັ້ນເປັນຄົນລາວ 93% ຊຶ່ງທຸກຄົນໄດ້ຮັບການພັດທະນາສີມືແຮງງານ, ໃນຂະນະດຽວກັນບໍລິສັດກໍມີງົບປະມານສຳລັບພັດທະນາຊຸມຊົນຂອບເຂດໃກ້ຄຽງໂຄງການ. ນອກຈາກນີ້ ຍັງມີງົບປະມານພັດທະນາຊີວິດການເປັນຢູ່ຂອງປະຊາຊົນທີ່ກຽມເຂົ້າສູ່ໄລຍະການປິດບໍ່ ໂດຍສຸມໃສ່ປັບປຸງຊີວິດການເປັນຢູ່ຂອງປະຊາຊົນໃນຊຸມຊົນ ເປັນຕົ້ນແມ່ນຝຶກອົບຮົມກ່ຽວກັບການຜະລິດກະສິກຳ ແລະ ລ້ຽງສັດໃຫ້ປະຊາຊົນ, ກໍ່ສ້າງ ແລະ ປັບປຸງເສັ້ນທາງເຂົ້າຫາຊຸມຊົນ ເພື່ອອຳນວຍຄວາມສະດວກໃຫ້ແກ່ປະຊາຊົນທ້ອງຖິ່ນໄດ້ໄປມາຫາສູ່ກັນຢ່າງສະດວກສະບາຍ.

ຂໍ້ມູນໃຫ້ຮູ້ຕື່ມວ່າ: ໃນເບື້ອງຕົ້ນໂຄງການພູເບ້ຍ ໄດ້ແຈ້ງໃຫ້ລັດຖະບານຊາບວ່າ ຈະປິດບໍ່ໃນປີ 2021 ແຕ່ຫຼັງຈາກໂຄງການໄດ້ຊອກຄົ້ນເພີ່ມຕື່ມ ໂດຍໄດ້ຄົ້ນພົບແຮ່ທາດເພີ່ມຕື່ມທີ່ນອນຢູ່ໃນຂອບເຂດຂອງໂຄງການ ຄາດວ່າຈະຂຸດຄົ້ນ ແລະ ປຸງແຕ່ງແຮ່ທາດຈົນຮອດປີ 2023-2024 ແຕ່ທັງນີ້ ກໍຍັງອີງໃສ່ການຊອກຄົ້ນ ຫາກພົບແຫຼ່ງແຮ່ທາດເພີ່ມຕື່ມກໍຄາດວ່າ ຈະຂະຫຍາຍອາຍຸການສຳປະທານເພີ່ມຕື່ມຮອດປີ 2030.

ສຳລັບການພັດທະນາຊີວິດການເປັນຢູ່ຂອງປະຊາຊົນໃນຊຸມຊົນ ທາງໂຄງການໄດ້ສຸມໃສ່ປັບປຸງຊີວິດການເປັນຢູ່ຂອງປະຊາຊົນ ທັງໄລຍະກ່ອນການປິດບໍ່ ແລະ ໄລຍະຫຼັງປິດບໍ່ ໝາຍຄວາມວ່າຫຼັງປິດບໍ່ແລ້ວ ທາງໂຄງການກໍຍັງສືບຕໍ່ປັບປຸງຊີວິດການເປັນຢູ່ຂອງປະຊາຊົນຕໍ່ໄປ ຈົນກວ່າຈະບັນລຸມາດຖານ ແລະ ເງື່ອນໄຂຂອງລັດຖະບານວາງອອກ, ພ້ອມທັງມີການຝຶກອົບຮົມການປູກຜັກ, ລ້ຽງໄກ່, ແບ້, ທອມງົວ ແລະ ອື່ນໆໃຫ້ກັບປະຊາຊົນ, ຊຶ່ງປະຈຸບັນບໍລິສັດ ພູເບ້ຍ ກຳລັງຮ່ວມມືກັບຂະແໜງກະສິກຳ ເພື່ອສ້າງລາຍໄດ້ໃຫ້ປະຊາຊົນທີ່ຢູ່ເຂດໃກ້ຄຽງ ເຮັດໃຫ້ຊີວິດການເປັນຢູ່ຂອງເຂົາເຈົ້າໄດ້ຮັບການປັບປຸງດີຂຶ້ນຢ່າງຕໍ່ເນື່ອງ, ທັງສຸມໃສ່ກຽມຄວາມພ້ອມໃຫ້ປະຊາຊົນ ເມື່ອປິດໂຄງການແລ້ວ ເຮັດແນວໃດໃຫ້ເຂົາເຈົ້າສາມາດຫາລ້ຽງຊີບຕົນເອງໄດ້ ໂດຍບໍລິສັດຈະຊອກຕະຫຼາດແຫ່ງອື່ນໆໃຫ້, ສ່ວນພະນັກງານຂອງ ບໍລິສັດ ພູເບ້ຍ ພາຍຫຼັງປິດບໍ່ແລ້ວກໍຈະມີການຊົດເຊີຍຕາມຄວາມເໝາະສົມຕາມລະບຽບກົດໝາຍຂອງ ສປປ ລາວ.

ຂ່າວເສດຖະກິດ-ສັງຄົມ

แชร์