ນັກສຶກສາລາວ 28 ຄົນ ໄດ້ຮັບທຶນໄປສຶກສາຕໍ່ທີ່ຍີ່ປຸ່ນ

ງານລ້ຽງສົ່ງນັກສຶກສາລາວ ທີ່ກໍາລັງກຽມຕົວໄປສຶກສາຕໍ່ທີ່ປະເທດຍີ່ປຸ່ນ ຈໍານວນ 28 ຄົນ, ພາຍໃຕ້ທຶນການສຶກສາຂອງກະຊວງສຶກສາທິການຍີ່ປຸ່ນ(MEXT) ໄດ້ຈັດຂຶ້ນໃນຕອນຄໍ່າຂອງວັນທີ 15 ມີນາ 2024 ທີ່ເຮືອນພັກຂອງເອກອັກຄະຣາຊະທູດ ຍີ່ປຸ່ນ ປະຈໍາລາວ, ໃຫ້ກຽດເຂົ້າຮ່ວມໂດຍທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ, ປະທານສະມາຄົມມິດຕະພາບ ລາວ-ຍີ່ປຸ່ນ, ມີທ່ານ ເຄັນອິຈິ ໂຄບະຢະຊິ ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງຍີ່ປຸ່ນ ປະຈໍາ ສປປ ລາວ ພ້ອມດ້ວຍບັນດາແຂກຈາກພາກສ່ວນກ່ຽວຂ້ອງ ແລະ ອະດີດນັກ ສຶກສາລາວທີ່ກັບມາຈາກຍີ່ປຸ່ນເຂົ້າຮວ່ມ.


ທ່ານ ເຄັນອິຈິ ໂຄບະຢະຊິ ກ່າວວ່າ: ໃນໄລຍະ 30 ປີ ຜ່ານມາ, ລັດຖະບານຍີ່ປຸ່ນ ໄດ້ຮັບເອົານັກສຶກສາລາວ ໄປສຶກສາຕໍ່ທີ່ປະເທດຍີ່ປຸ່ນ ຫລາຍກວ່າ 1.300 ຄົນ ພາຍໃຕ້ທຶນການສຶກສາທີ່ຫລາກຫລາຍ. ປີນີ້, ນັກສຶກສາລາວ 28 ຄົນ ໄດ້ຮັບທຶນການສຶກສາ ໃນລະດັບຫລັງປະລິນຍາຕີ, ປະ ລິນຍາຕີ, ຫລັກສູດຊັ້ນສູງເຕັກໂນໂລຊີ ແລະ ຫລັກສູດຊັ້ນສູງທົ່ວໄປ. ເປັນທີ່ຄາດຫວັງວ່ານັກສຶກສາເຫລົ່ານີ້ຈະເກັບກ່ຽວເອົາບົດຮຽນຢ່າງຫລວງຫລາຍໃນລະຫວ່າງທີ່ຢູ່ຍີ່ປຸ່ນ ແລ້ວຈະນໍາໃຊ້ປະສົບການ, ຄວາມຮູ້ ແລະທັກສະທີ່ໄດ້ຮັບເຂົ້າໃນການພັດທະນາພາກພື້ນ ແລະສາກົນໃນອະນາຄົດ. ທ່ານ ທູດກ່າວອີກວ່າ: ປີໜ້າຈະເປັນປີຄົບຮອບວາລະ 70 ປີແຫ່ງການສ້າງຕັ້ງສາຍພົວພັນທາງການທູດ ຍີ່ປຸ່ນ-ລາວ. ຢູ່ຍີ່ປຸ່ນ ຈະມີການຈັດງານເພື່ອສະເຫລີມສະຫລອງໂອກາດດັ່ງກ່າວ ແລະຫວັງວ່າບັນດານັກສຶກສາລາວຈະມີສ່ວນຮ່ວມ ແລະເຂົ້າຮ່ວມງານເຫລົ່ານີ້ຢ່າງກະຕືລືລົ້ນ ເພື່ອເພີ່ມທະວີຄວາມເຂັ້ມແຂງ ໃຫ້ຂົວຕໍ່ລະຫວ່າງສອງປະເທດ.


ທ່ານ ນາງ ເຊິ່ງຄືນ ແຊ່ເຕີນ ຜູ້ທີ່ຈະໄປສຶກສາໃນລະດັບປະລິນຍາໂທ ໄດ້ຕາງໜ້າໃຫ້ນັກສຶກສາທີ່ໄດ້ຮັບທຶນຂຶ້ນກ່າວສະແດງຄວາມຂອບໃຈຕໍ່ລັດຖະບານຍີ່ປຸ່ນທີ່ໄດ້ສະໜອງທຶນການສຶກສາໃນຄັ້ງນີ້, ພ້ອມທັງຢືນຢັນເຖິງຄວາມມຸ່ງໝັ້ນທີ່ມີຮ່ວມກັນຂອງນັກສຶກສາທຸກຄົນທີ່ຈະສຸມເທື່ອແຮງເຂົ້າໃນການສຶກສາຄົ້ນຄວ້າທີ່ປະເທດຍີ່ປຸ່ນ.

แชร์