ເອໄອດີຊີ ຕ້ອນຮັບຄະນະບໍລິຫານ ປຕທ ປະເທດໄທ

ທ້າຍອາທິດຜ່ານມາທາງບໍລິສັດ AIDC Trading ຕ້ອນຮັບການມາຢ້ຽມຢາມຂອງຄະນະບໍລິຫານ ປຕທ ປະເທດໄທ ໂດຍການຕ້ອນຮັບຈາກທ່ານພຶດສະພາ ພູມມະສັກ ປະທານ ບໍລິສັດ AIDC TRADING ແລະ ທ່ານ ສີສຸກ ວົງພັກດີ,ໃນໂອກາດລົງຢ້ຽມຢາມໃນຄັ້ງນີ້ ຍັງໄດ້ເລາະທ່ຽວຊົມບັນຍາກາດ ທິວທັດສວນກາເຟຂອງບໍລິສັດ AIDC ສວນກາເຟຂອງຄົນລາວ ແລະ ໄດ້ລົງຢ້ຽມຢາມໂຮງງານເພັດສະຫວ່າງ ທີ່ເມືອງປາກຊ່ອງ ແຂວງຈໍາປາສັກ,ເພື່ອກະກຽມເຊັນສັນຍາສົ່ງອອກກາເຟລາວ ຈໍານວນຫລາຍພັນໂຕນອອກສູ່ຕະຫລາດຕ່າງປະເທດທີ່ຈະມາເຖິງໃນໄວໄວນີ້.

ປະຈຸບັນ ບໍລິສັດ AIDC ມີພື້ນທີ່ປູກກາເຟ ຈຳນວນ 356 ເຮັກຕາ ຕັ້ງຢູ່ໃນພູພຽງບໍລິເວນ ເມືອງປາກຊ່ອງ ແຂວງຈຳປາສັກ ຊຶ່ງຢູ່ສູງກວ່າລະດັບນໍ້າທະເລ 1.200 ແມັດ ເນື່ອງຈາກລັກສະນະພື້ນທີ່ທີ່ເປັນດິນພູໄຟ ເຮັດໃຫ້ຜົນຜະລິດກາເຟຈາກບໍລິເວນນີ້ ມີຄຸນນະພາບ ແລະ ມີເອກະລັກສະເພາະຕົວ. ນອກຈາກນີ້ AIDC ຍັງມີການຜະລິດ ແລະ ໂຮງງານແປຮູບ ໂດຍສາມາດຄວບຄຸມຄຸນະພາບໄດ້ຕັ້ງແຕ່ການປູກ ຈົນໄດ້ເປັນເມັດດິບ (Cherry) ແລະ ແປຮູບເປັນຜະລິດຕະພັນເມັດຂຽວ (Green Bean) ເພື່ອສົ່ງອອກໄປຍັງລູກຄ້າ ແລະ ໜຶ່ງໃນຄູ່ຄ້າທີ່ສໍາຄັນຂອງ AIDC ກໍຄື ບໍລິສັດ ພີທີທີ (ລາວ) ຈຳກັດ ຊຶ່ງເປັນຜູ້ບໍລິຫານ ແບຣນກາເຟອາເມຊອນ (ໃນ ສປປ ລາວ) ຈຳນວນ 89 ສາຂາ ແລະ ເປັນໜຶ່ງໃນບໍລິສັດລູກ ຂອງ ບໍລິສັດ ປຕທ ນໍ້າມັນ ແລະ ການຄ້າປີກ ຈໍາ ກັດ (ມະຫາຊົນ) ຜູ້ບໍລິຫານແບຣນ ຄາເຟ ອາເມຊອນ (ທັງໃນປະເທດໄທ ແລະ ຕ່າງປະເທດ) ກວ່າ 4.000 ສາຂາ.

ການຮ່ວມມືຄັ້ງນີ້ ແມ່ນເພື່ອຮ່ວມສຶກສາ ແລະພັດທະນາໂຄງການ ການສ້າງຄວາມຍືນຍົງ ໃຫ້ກັບການເພາະປູກກາເຟ ໃນໂຄງການຕົ້ນແບບໃນ ສປປ ລາວ ຊຶ່ງເປັນການໃຊ້ລະບົບໝູນວຽນກະເສດ (Agroforestry) ໂດຍເພີ່ມການເພາະປູກຕົ້ນໄມ້ໃຫ້ຮົ່ມເງົາ ໃນພື້ນທີ່ປູກກາເຟ ຂອງ AIDC, ໂດຍ AIDC ຈະເປັນຜູ້ລົງທຶນເຮັດລະບົບໝູນວຽນການກະເສດ ແລະ ເປັນຜູ້ບໍລິຫານຈັດການພື້ນທີ່ເພື່ອໃຫ້ໄດ້ຜົນຜະລິດເມັດກາເຟ ທີ່ມີຄຸນະພາບ ແລະ ບໍລິສັດ ພີທີທີ (ລາວ) ຈຳກັດ ຈະເປັນຜູ້ຮັບຊື້ເມັດກາເຟປຸງແຕ່ງຜ່ານການຜະລິດທີ່ເປັນໄປຕາມມາດຕະຖານຂອງ ຄາເຟ ອາເມຊອນ ຈາກໂຄງການນີ້.

แชร์