ສຄຄຊ ສໍາເລັດກອງປະຊຸມຄະນະກໍາມະການຕະຫຼາດທຶນອາຊຽນ ຄັ້ງທີ 40

ກອງປະຊຸມຄະນະກໍາມະການຕະຫຼາດທຶນອາຊຽນ (ASEAN Capital Market Forum: ACMF) ຄັ້ງທີ 40 ໄດ້ໄຂຂຶ້ນຢ່າງເປັນທາງການໃນວັນທີ 15 ມີນາຜ່ານມາທີ່ນະຄອນຫຼວງພະບາງ ເປັນປະທານໂດຍສໍານັກງານຄະນະກໍາມະການຄຸ້ມຄອງຫຼັກຊັບ ສປປ ລາວ (ສຄຄຊ) ໃນນາມປະທານ ACMF ແລະ ຄະນະກໍາມະການຄຸ້ມຄອງຫຼັກຊັບ ມາເລເຊຍ ໃນນາມຮອງປະທານACMF ພ້ອມນັ້ນກໍມີຜູ້ເຂົ້າຮ່ວມຈາກບັນດາ 10 ປະເທດສະມາຊິກອາຊຽນ, ກອງເລຂາອາຊຽນ (ASEC), ທະນາຄານພັດທະນາອາຊີ (ADB) ແລະສະຖາບັນການເງິນຍືນຍົງອາຊຽນ (SFIA).

ກອງປະຊຸມໄດ້ຮັບຟັງການລາຍງານ, ປຶກສາຫາລື ແລະ ມີມະຕິຕົກລົງຮັບຮອງເອົາຫຼາຍບັນຫາ ຕິດພັນກັບວຽກງານຂອງແຕ່ລະໜ່ວຍງານຄົ້ນຄວ້າ ໃນຂອບ ACMF (ກຸ່ມຜູ້ຄຸ້ມຄອງຕະຫຼາດທຶນລະດັບສູງຈາກທັງ 10 ປະເທດອາຊຽນ) ເປັນຕົ້ນແມ່ນ: 1) ລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານຕາມ ACMFRoadmap ໃນການພັດທະນາຕະຫຼາດທຶນແບບຍືນຍົງຂອງອາຊຽນ ປີ 2020-2025 ຂອງໜ່ວຍງານຄົ້ນຄວ້າການເງິນຍືນຍົງທີ່ຄາດວ່າໃນປີ 2024 ຈະມີຜົນສໍາເລັດ 90% ຕາມແຜນການທີ່ວາງໄວ້. ພ້ອມນີ້ ກໍ່ຄາດວ່າຈະເລີ່ມປະເມີນແຜນປະຕິບັດງານ (ACMF Action Plan) ປີ 2021-2025 ແລະ ການພັດທະນາແຜນປະຕິບັດງານດັ່ງກ່າວປີ 2026-2030. ນອກນີ້, ພາຍໃຕ້ ມາດຕະຖານພັນທະບັດສີຂຽວ, ສັງຄົມ ແລະຍືນຍົງຂອງອາຊຽນທີ່ໄດ້ກໍານົດ ໃນປີ 2017-2018 ກໍ່ໄດ້ມີການອອກພັນທະບັດດັ່ງກ່າວ ມູນຄ່າ 47,46 ຕື້ໂດລາສະຫະລັດ (ຂໍ້ມູນໃນວັນທີ 12 ກຸມພາ 2024); 2) ລາຍງານຄວາມຄືບໜ້າການພັດທະນາການຈັດໝວດກິດຈະກໍາສີຂຽວຂອງອາຊຽນ ເພື່ອການເງິນຍືນຍົງ ແມ່ນໄດ້ຮັບຜົນຕອບຮັບໃນທາງບວກຈາກການປຶກສາຫາລືກັບພາກສ່ວນກ່ຽວຂ້ອງ ສໍາລັບສະບັບທີ 2, ທີ່ປະຊຸມກໍ່ເຫັນດີໃຫ້ມີການສືບຕໍ່ວຽກງານຂອງຄະນະກໍາມະການຄົ້ນຄວ້າການຈັດໝວດກິດຈະກໍາສີຂຽວຂອງອາຊຽນ (ATB) ລວມທັງການພັດທະນາ ASEAN Taxonomy ສະບັບທີ 3. ພ້ອມທັງ ເຫັນດີແຕ່ງຕັ້ງທະນາຄານກາງບຣູໄນ ແລະຄະນະກຳມະການຫຼັກຊັບມາເລເຊຍ ເປັນຜູ້ຕາງໜ້າຂອງ ACMF ເພື່ອປະກອບເຂົ້າເປັນສະມາຊິກຂອງ ATB; 3) ລາຍງານຄວາມຄືບໜ້າຂອງການພັດທະນາບົດແນະນໍາການເງິນໃນໄລຍະຂ້າມຜ່ານຂອງອາຊຽນ ທີ່ປະຊຸມໄດ້ຮັບຮອງເອົາການດໍາເນີນການປຶກສາຫາລືກັບບັນດາພາກສ່ວນກ່ຽວຂ້ອງ ຕໍ່ກັບບົດແນະນຳການເງິນໄລຍະຂ້າມຜ່ານຂອງອາຊຽນ ສະບັບທີ 1 ພ້ອມທັງ ເຫັນດີສືບຕໍ່ພັດທະນາບົດແນະນໍາການເງິນໄລຍະຂ້າມຜ່ານຂອງອາຊຽນສະບັບທີ 2ໃນປີ 2024; 4) ສືບຕໍ່ຮ່ວມມືຢ່າງຕໍ່ເນື່ອງກັບ IFRS ກໍ່ຄືຄະນະກໍາມະການມາດຕະຖານຄວາມຍືນຍົງສາກົນ (ISSB) ໃນການສົ່ງເສີມການລາຍງານຂໍ້ມູນກ່ຽວກັບຄວາມຍືນຍົງໃນພາກພື້ນ ແລະ ທີ່ປະຊຸມໄດ້ຮັບຮອງເອົາແຜນວຽກປີ 2024 ເພື່ອສ້າງຄວາມອາດສາມາດໃນການລາຍງານຂໍ້ມູນກ່ຽວກັບຄວາມຍືນຍົງນອກນີ້ກໍ່ໄດ້ຮັບຊາບຕໍ່ການສ້າງ Sustainability Innovation Lab ທີ່ ISSB ແລະ GRI ໄດ້ເຮັດວຽກຮ່ວມກັນ ເພື່ອສ້າງຄວາມອາດສາມາດໃຫ້ແກ່ພາກພື້ນໃນການລາຍງານຂໍ້ມູນກ່ຽວກັບຄວາມຍືນຍົງໂດຍສະເພາະແມ່ນ ບໍລິສັດທີ່ມີການລາຍງານໃຫ້ຫຼາຍພາກສ່ວນ; 5) ຮັບຮອງການພັດທະນາບົດແນະນຳກ່ຽວກັບຂໍ້ກຳນົດໃນການເປີດເຜີຍຂໍ້ມູນສໍາລັບການອອກຈໍາໜ່າຍ ແລະ ຈົດທະບຽນຫຼັກຊັບຂ້າມແດນຂອງອາຊຽນ; 6) ສືບຕໍ່ຂໍ້ລິເລີ່ມໃນການສ້າງຄວາມອາດສາມາດ ແລະ ຊຸກຍູ້ການຮ່ວມມືໂດຍຜ່ານໂຄງການພັດທະນາຕະຫຼາດທຶນອາຊຽຂອງ ACMF ຊຶ່ງລວມມີໂຄງການຝຶກອົບຮົບ ແລະ ການຝຶກອົບຮົມສ້າງຄວາມອາດສາມາດໃຫ້ແກ່ສະມາຊິກ ACMF ພ້ອມທັງການຮ່ວມມືກັບ ພາຍນອກ ແລະ ຜູ້ຊ່ຽວຊານດ້ານວິຊາສະເພາະ; 7) ລາຍງານການປັບປຸງການປະເມີນການຈັດຕັ້ງປະຕິບັດການຄຸ້ມຄອງບໍລິຫານຂອງບໍລິສັດຈົດທະບຽນໃນອາຊຽນ (ACGS) ໃນປີ 2024 ແລະ ຄາດວ່າຈະປະກາດຜົນການປະເມີນໃນປີ 2025; 8) ສືບຕໍ່ແລກປ່ຽນປະສົບການກ່ຽວກັບຊັບສິນດິຈິຕອນ ຂອງສະມາຊິກອາຊຽນ. ຊຶ່ງໄດ້ມີການລາຍງານຄວາມຄືບໜ້າຂອງການປັບປຸງລະບຽບການໃນການບໍລິການຊໍາລະເງິນດິຈິຕອນໃນສິງກະໂປ ແລະ ລາຍງານຄວາມຄືບໜ້າການພັດທະນາຕະຫຼາດຊັບສິນດິຈິຕອນໃນປະເທດມາເລເຊຍ.

ໂອກາດດັ່ງກ່າວ, ACMF ກໍ່ໄດ້ສະແດງຄວາມຂອບໃຈຢ່າງຍິ່ງຕໍ່ ADB ທີ່ໄດ້ໃຫ້ການສະໜັບສະໜູນຢ່າງສະເໜີມາຕະຫຼອດໄລຍະເວລາ 20 ປີ ໂດຍຜ່ານການຊ່ວຍເຫຼືອດ້ານວິຊາການ ແລະ ການໃຫ້ຄຳແນະນຳຈາກຜູ້ຊ່ຽວຊານ ເພື່ອຊຸກຍູ້ການພັດທະນາຕະຫຼາດທຶນໃນທົ່ວພາກພື້ນອາຊຽນ ແລະ ເຊື່ອໝັ້ນວ່າ ADB ຈະສືບຕໍ່ເພີ່ມທະວີການສະໜັບສະໜູນວຽກງານຂອງ ACMF ຕໍ່ໄປພ້ອມດຽວກັນນີ້ກໍ່ໄດ້ຂອບໃຈຕໍ່ສະຖາບັນການເງິນຍືນຍົງອາຊີສໍາລັບການສະໜັບສະໜູນໃນການພັດທະນາວຽກງານຄວາມຍືນຍົງຂອງ ACMF ມີຄວາມກ້າວໜ້າ ແລະຂະຫຍາຍຕົວຂຶ້ນເລື້ອຍໆ.

แชร์