ເທສະການອາຫານລາວ-ສ.ເກົາຫລີ ຈະຈັດຂຶ້ນເດືອນເມສາ

ຕອນບ່າຍວັນທີ 13 ມີນາ 2024 ທີ່ກະຊວງອຸດສາຫະກໍາ ແລະການຄ້າທ່ານ ນາງ ຈັນທະຈອນ ວົງໄຊ ປະທານຄະນະບໍລິຫານສະມາຄົມນັກທຸລະກິດແມ່ຍິງ, ປະທານຮ່ວມຈັດງານເທດສະການອາຫານລາວ-ເກົາຫລີ 2024, ໄດ້ຖະແຫລງຂ່າວຕໍ່ສື່ມວນຊົນ ແລະເຊັນບົດບັນທຶກຄວາມເຂົ້າໃຈງານເທສະການອາຫານລາວ-ເກົາຫລີ, ໂດຍມີທ່ານ ວິທູນ ສິດທິມໍລະດາ ຫົວໜ້າກົມສົ່ງເສີມການຄ້າ ແລະຫັດຖະກຳກະຊວງອຸກສາຫະກໍາ ແລະການຄ້າ, ທ່ານ ຢອນ ກຢອງຊິກ ຫົວໜ້າຫ້ອງການສູນເຝິກອົບຮົມພາສາເກົາຫລີ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານນາງ ຈັນທະຈອນ ວົງໄຊ ກ່າວວ່າ: ເພື່ອເປັນການ ຮ່ວມມືມິດຕະພາບ ແລະຄວາມສາມັກຄີ ລະຫວ່າງ ການສົ່ງເສີມການຄ້າ ແລະ ຫັດຖະກຳ, ສະມາຄົມນັກທຸລະກິດແມ່ຍິງ ສປປ ລາວ, ແລະ ສະມາຄົມ ແລກປ່ຽນວັດທະນະທຳ ແລະ ສິລະປະ ສ.ເກົາຫລີ ໃຫ້ມີບົດບາດອັນໃໝ່ ໃນລະດັບສາກົນ, ທັງເປັນການໂຄສະນາ ຮີດຄອງປະເພນີ ວັດທະນະທໍາດ້ານອາຫານລາວ ໃຫ້ກວ້າງຂວາງ ເປັນທີ່ ຮູ້ຈັກຂອງປະເທດຕ່າງໆ ໃນໂອກາດປີທ່ອງທ່ຽວລາວ 2024, ເພື່ອເຊື່ອມສານ ແລກປ່ຽນວັດທະນະທຳອັນດີງາມ ແລະ ສີລະປະ ຂອງ ສ.ເກົາຫລີ, ແລະ ມວນຊົນຊາວລາວ ໃນຍຸກສະໄໝສີລະປະກຳ ແລະ ວັດທະນະທຳບໍ່ມີພົມແດນ ແລະປະຕິບັດຕາມທິດທາງຂອງລັດຖະບານ ທີ່ກະກຽມເປັນເຈົ້າພາບໃນການ ຈັດກອງປະຊຸມອາຊຽນ ແລະ ກອງປະຊຸມອື່ນໆ ໃນລະດັບສາກົນທີ່ປິ່ນອ້ອມ ໃນປີ 2024 ນີ້.
ພາຍຫລັງພິທີຖະແຫລງຂ່າວແລ້ວ ໄດ້ມີພິທີເຊັນບົດບັນທຶກ ຄວາມເຂົ້າໃຈ ການຮ່ວມມື ການຈັດງານເທດສະການອາຫານລາວ-ເກົາຫລີ ເພື່ອເປັນບ່ອນອີງໃນການຕັດຕັ້ງປະຕິບັດງານຮ່ວມກັນ. ການຈັດງານເທດສະການອາຫານລາວ - ເກົາຫລີ ໃນຄັ້ງນີ້ ຈະຈັດຂຶ້ນແຕ່ວັນທີ 3-5 ເມສາ 2024 ເປັນເວລາ 3 ວັນເຕັມ ທີ່ສວນເຈົ້າອະນຸວົງ.
ພາຍໃນງານຄັ້ງນີ້ ທັງລາວ ແລະ ສ.ເກົາຫລີ ຈະນຳເອົາ ອາຫານພື້ນເມືອງທີ່ເປັນເອກະລັກຂອງທັງສອງປະເທດ ເປັນຕົ້ນ ພືດຜັກຜົນຜະລິດກະສິກຳປອດສານພິດ, ສະອາດ ແລະປອດໄພ, ອາຫານລາວປະຍຸກມາວາງຂາຍ. ສ່ວນອາຫານ ເອກະລັກຂອງສ.ເກົາຫລີ ຈະມີ ພໍ່ຄົວສີມີລະດັບສາກົນ ມາສາທິດການປຸງແຕ່ງອາຫານ ຂອງ ສ.ເກົາຫລີ ມາຈໍາໜ່າຍອອກສູ່ ມວນຊົນ ແລະສັງຄົມ.

ໃນງານຄັ້ງນີ້ ລວມທັງໝົດ ມີ 60 ຮ້ານ, ຕະຫລອດໄລຍະ 3ວັນ ຈະມີການສະແດງ ສາທິດການປຸງແຕ່ງອາຫານ, ການສະແດງສີລະປະພື້ນເມືອງ ຮ່ວມກັບການສະແດງ ຂອງສ. ເກົາຫລີ ເປັນຕົ້ນ: ດາລາ, ສິລະປິນ K-pop, ໂຄສົກວິທະຍຸ ແລະໂທລະພາບທີ່ມີຊື່ສຽງ ຈາກ ສ.ເກົາຫລີ ມາຮ່ວມສະແດງໃນແຕ່ລະຄ່ຳຄືນຂອງງານ ລວມທັງວາງຂາຍເຄື່ອງຫັດຖະກໍາ ແລະເດີນແບບຈາກ ສ. ເກົາຫລີ ອີກດ້ວຍ.

ດັ່ງນັ້ນຈຶ່ງເຊີນຊວນມວນຊົນທັງພາຍໃນ ແລະຕ່າງປະເທດເຂົ້າຮ່ວມງານ ເທດສະການອາຫານ ລາວ-ເກົາຫລີ 2024 ດ້ວຍ.

แชร์