ເປີດເປັນທາງການສະໂມສອນບານເຕະເຍົາວະຊົນ RNS

ສະໂມສອນບານເຕະເຍົາວະຊົນ RNS Football Cup ຊຶ່ງເປັນສະໂມສອນໂຕແບບຂອງສະຫະພັນ​ບານເຕະນະຄອນຫຼວງວຽງຈັນ ໄດ້ເປີດຂຶ້ນຢ່າງເປັນທາງການໃນວັນທີ 13 ມີນາ 2024 ທີ່ບ້ານຫນອງດ້ວງ ເມືອງສີໂຄດຕະບອງ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ສົມພອນ ສອນດາລາ ຫົວໜ້າພະແນກ ສຶກສາທິການ ແລະກິລາ ຄອນຫລວງວຽງຈັນ, ພ້ອມດ້ວຍພາກສ່ວນທີ່ກ່ຽວຂ້ອງ.

ທ່ານ ກາລຸນາ ສຸວັນນະເມທີ ປະທານສະໂມສອນ RNS Football Cup ກ່າວວ່າ: ສະພາບລວມ,ປະຫວັດຄວາມເປັນມາ ແລະເຫດຈູງໃຈໃນການສ້າງຕັ້ງສະໂມສອນ ໃນເບື້ອງຕົ້ນຍ້ອນມີ ຄວາມມັກຮັກໃນກິລາບານເຕະຕັ້ງແຕ່ຍັງເຍົາໄວ, ປະກອບກັບການເອັນດຸ ເດັກນ້ອຍທີ່ມີຄວາມມັກຮັກໃນກິລາບານເຕະ ຜູ້ທີ່ຕັ້ງໃຈ ແລະໄຝ່ຝັນຢາກພັດທະນາຕົວເອງໃນດ້ານກິລາດັ່ງກ່າວ, ຕົນຈຶ່ງຕັດສິນໃຈສ້າງສະໂມສອນ RNS Football Cup ຂຶ້ນເພື່ອເປັນແຮງດັນ ຊຸກຍູ້ ໃຫ້ເຂົາເຈົ້າ ໄປໄດ້ຕາມຄວາມຝັນອັນສູງສຸດ, ຊຶ່ງທາງສະໂມສອນແມ່ນມີແຜນການ ແລະໄດ້ປະສານງານກັບປະເທດອ້ອມຂ້າງໄກ້ຄຽງເພື່ອພັກດັນສົ່ງເສີມເດັກນ້ອຍຜູ້ທີ່ມີພອນສະຫວັນ ແລະ ຄູຝຶກຜູ້ມີຄວາມຕັ້ງໃຈ ໃຫ້ໄດ້ຮັບ ໂອກາດໃນການໄປຝຶກອົບຮົມ ແລະຮຽນຕໍ່ໃນຫຼັກສູດກິລາບັນເຕະໃຫ້ເປັນນັກເຕະ ແລະ ຄູຝຶກທີ່ເປັນມື້ອາຊີບອີກດ້ວຍ. ພ້ອມນີ້ຍັງມີແຜນການທີ່ຈະພັດທະນາຮ່ວມກັບສະໂມສອນຕົວແບບອີກ 4 ສະໂມສອນ ທີ່ຂຶ້ນກັບສະຫະພັນບານເຕະນະຄອນຫຼວງ, ທີ່ຍັງຢູ່ໃນຂັ້ນທົດລອງເບື້ອງຕົ້ນທີ່ຈະພັດທະນາຮອບດ້ານ ແລະ ຖືກລະບົບຂອງການພັດທະນາບານເຕະເຍົາວະຊົນ.

ສໍາລັບແຜນການເຄື່ອນໄຫວຂອງສະໂມສອນໃນປີ 2024 ນີ້: ເປີດຮັບສະໝັກນັກກິລາທົ່ວໄປເລີ່ມແຕ່ອາຍຸ 6 ປີ-16 ປີ ແລະ ຄັດໂຕນັກກິລາພອນສະຫວັນ ຢູ່ 10 ແລະ 12 ເພື່ອກຽມໄປແຂ່ງຕ່າງປະເທດ (ລາຍລະອຽດມີຢູ່ໃນເຟສສະໂມສອນ); ເຂົ້າຮ່ວມແຂ່ງຂັນທັງພາຍໃນ ແລະ ຕ່າງປະເທດເຊັ່ນ: ຈັດແຂ່ງຂັນທົດສອບ- ຄັດໂຕນັກກິລາກ່ອນໄປແຂ່ງຂັນ 1-2 ຄັ້ງ, ເຂົ້າຮ່ວມຊີງຂັນພາຍໃນ 2-3 ລາຍການ ຕາມຄວາມເໝາະສົມ ເຂົ້າຮ່ວມຊີງຂັນເກວເມ້ລາວກັບ 2024 ໃນເດືອນ 4/2024 ຢູ່ທີ່ ສປປ ລາວ, ໄປແຂ່ງຂັນ ແລະ ແລກ ປ່ຽນບົດຮຽນຢູ່ປະເທດລັດເຊຍ ໃນລະຫວ່າງເດືອນ 5-6/2024, ໄປແຂ່ງຂັນລາຍການ JS CUP 2024 ຢູ່ປະເທດເກົາຫລີໃຕ້ ເດືອນ 7/2024, ໄປແຂ່ງຂັນລາຍການ PEACE CUP 2024 ໃນເດືອນ 8/2024 ຢູ່ທີ່ເມືອງເຊີນຍາງ; ສປ ຈີນ, ໄປຮ່ວມແຂ່ງຂັນລາຍການ TAR ASIA QUALIFIERS ໃນ ເດືອນ 12/2024 ຢູ່ທີ່ບາງກອກປະເທດໄທ ເພື່ອຄັດເລືອກໂຕແທນຈາກອາຊີໄປແຂ່ງຂັນຮອບສຸດທ້າຍຢູ່ ເມືອງບາເຊໂລນໍ້າ, ປະເທດສະເປນ, ໄປແຂ່ງຂັນມິດຕະພາບ-ແລກປ່ຽນບົດຮຽນຢູ່ສະຫະລັດອາເມລິກາ ແລະປະເທດອື່ນໆຕາມຄວາມເໝາະສົມຫລືໄດ້ຮັບເຊີນເຂົ້າຮ່ວມ.

แชร์