ຈໍາປາສັກ ເພີ່ມທະວີເຝົ້າລະວັງພະຍາດສັດ ບໍ່ໃຫ້ແພ່ລາມອອກສູ່ວົງກວ້າງ

ເນື່ອງຈາກມີເຫດການ ສັດຕາຍໂດຍບໍ່ຮູ້ສາຍເຫດ ທີ່ບ້ານຈິກທາງໂງ ເມືອງຈຳປາສັກ ແລະມີປະຊາຊົນ ໄດ້ນໍາມາບໍລິໂພກ ຕໍ່ມາເກີດອາການໄຂ້ ແລະອອກຕຸ່ມຕາມຜິວໜັງ ຕໍ່ສະພາບການດັ່ງກ່າວ ເພື່ອປ້ອງກັນ, ສະກັດກັ້ນ ແລະຕ້ານການລະບາດຂອງພະຍາດສັດປະເພດ (ງົວ-ຄວາຍ, ແກະ, ແບ້) ບໍ່ໃຫ້ແພ່ລາມອອກສູ່ວົງກວ້າງ, ເຊິ່ງ ຈະສ້າງຜົນກະທົບ ແລະກໍ່ຄວາມເສຍຫາຍເປັນຈຳນວນຫຼວງຫຼາຍ ຕໍ່ການດຳລົງຊີວິດຂອງພໍ່ແມ່ປະຊາຊົນ.

ພະແນກກະສິກຳ ແລະປ່າໄມ້ ແຈ້ງການ: ເພີ່ມທະວີເຝົ້າລະວັງພະຍາດສັດ ແລະການຫ້າມບໍລິໂພກ, ການເຄື່ອນຍ້າຍສັດຢູ່ໃນເຂດທີ່ມີການລະບາດດັ່ງນີ້:

1. ມອບໃຫ້ຂະແໜງລ້ຽງສັດ ແລະການປະມົງລົງສົມທົບກັບຫ້ອງການກະສິກຳ ແລະປ່າໄມ້ ນະຄອນປາກເຊ ແລະ 9 ຕົວເມືອງ ກ່ຽວກັບການຕິດຕາມ, ກວດກາ, ສະກັດກັ້ນ, ການຊື້-ຂາຍ, ການເຄື່ອນຍ້າຍສັດປະເພດ ງົວ, ຄວາຍ, ແກະ, ແບ້ ຈາກເຂດທີ່ມີການລະບາດ ແລະເຂດໃກ້ຄຽງຢ່າງເຂັ້ມງວດ.

2. ມອບໃຫ້ຂະແໜງລ້ຽງສັດ ແລະການປະມົງລົງສົມທົບກັບຫ້ອງການກະສິກຳ ແລະປ່າໄມ້ ນະຄອນປາກເຊ ແລະ ອ ຕົວເມືອງ ຈົ່ງໄດ້ເອົາໃຈໃສ່ປະຊາສຳພັນໃຫ້ຂໍ້ມູນຂ່າວສານກ່ຽວກັບ ໂຣກລະບາດສັດ (ວິທີການປ້ອງກັນ, ປິ່ນປົວ ແລະຄວບຄຸມການລະບາດຂອງພະຍາດສັດ) ໃຫ້ແກ່ພໍ່ແມ່ປະຊາຊົນ, ຜູ້ປະກອບການລ້ຽງສັດ, ຜູ້ຊື້ຂາຍສັດ, ໂຮງຂ້າສັດທີ່ຂຶ້ນກັບຄວາມຮັບຜິດຊອບເມືອງຂອງພວກທ່ານຮັບຊາບ ແລະຈົ່ງພ້ອມກັນຈັດຕັ້ງປະຕິບັດຢ່າງເຂັ້ມງວດ;

3. ຫາກພົບເຫັນຜູ້ລະເມີດຝ່າຝືນ ຫຼືລັກລອບການຊື້-ຂາຍສັດ ປະເພດ ງົວ-ຄວາຍ, ແກະ, ແບ້ ທີ່ມາຈາດເຂດລະບາດ ແລະເຂດໄກ້ຄຽງໃຫ້ສົມທັບກັບເຈົ້າໜ້າທີ່ກ່ຽວຂ້ອງປະຕິບັດຕາມລະບຽບກົດໝາຍຢ່າງເຂັ້ມງວດ.

4. ມອບໃຫ້ຫ້ອງການກະສິກຳ ແລະປ່າໄມ້ ນະຄອນປາກເຊ ແລະ 9 ຕົວເມືອງ ສືບຕໍ່ຜັນຂະຫຍາຍແຈ້ງການສະບັບນີ້ເປັນສະເພາະຂອງເມືອງເພື່ອແຈ້ງລົງເຖິງກຸ່ມ ແລະ ບ້ານ ຢ່າງທົ່ງເຖິງ ແລະທັນກັບສະພາບການ.

5. ຫ້ອງການກະສິກຳ ແລະປ່າໄມ້ ນະຄອນປາກເຊ ແລະ 9 ຕົວເມືອງ ຈົ່ງຮັບຊາບ ແລະປະຕິບັດຕາມແຈ້ງການສະບັບນີ້ຢ່າງເຂັ້ມງວດ.

แชร์