ເປີດແລ້ວ ຕະຫລາດນັດບ້ານເຮືອນລາວ ສົ່ງເສີມການທ່ອງທ່ຽວ

ງານເທດສະການຕະຫລາດນັດບ້ານເຮືອນລາວ 2024 ນີ້, ຢູ່ເຮືອນຊົງລາວ ເຂດກົມມະລຽນພະທາດຫລວງວຽງຈັນ ເພື່ອສົ່ງເສີມຜະລິດຕະພັນຂອງຄົນລາວ ເປັນຕົ້ນ ຜະລິດຕະພັນກະສິກຳ, ຫັດຖະກຳ, ເຄື່ອງອຸປະໂພກ, ບໍລິໂພກ ແລະ ອື່ນໆ, ທັງເປັນການເຕົ້າໂຮມ ເອົາຜະລິດຕະພັນຕ່າງໆ ທີ່ເປັນຂອງຄົນລາວ 100% ຢູ່ຂອບເຂດທົ່ວປະເທດ ມາວາງຈຳໜ່າຍ ໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວ, ມາຊົມ, ມາຊີມອາຫານທີ່ເປັນເອກະລັກຂອງລາວ ແລະ ຈັບຈ່າຍຊື້ສິນຄ້າຜະລິດຕະພັນ ເຄື່ອງທີລະນຶກຕ່າງໆ ຢູ່ພາຍໃນງານໄດ້ເຊິ່ງຈະຈັດທຸກໆວັນເສົາ ແລະວັນອາທິດ ໃນຕອນເຊົ້າ ເລີ່ມແຕ່ເວລາ 7:00-10:00 ໂມງ ແລະ ຕອນແລງ ເລີ່ມແຕ່ເວລາ 16:00-23:00 ໂມງ.

ງານເທດສະການຕະຫລາດນັດບ້ານເຮືອນລາວ ຈັດຂຶ້ນເພື່ອດຶງດູງນັກທ່ອງທ່ຽວ ທັງພາຍໃນ ແລະຕ່າງປະເທດເຂົ້າມາທ່ອງທ່ຽວ ສປປ ລາວ ກໍຄືນະຄອນຫລວງວຽງຈັນ ໃຫ້ຫລາຍຂຶ້ນ ເພື່ອປະກອບສ່ວນເຮັດໃຫ້ປີທ່ອງທ່ຽວລາວ 2024 ແລະ ການເປັນປະທານອາຊຽນ ຂອງ ສປປ ລາວ ມີຂະບວນການຟົດຟື້ນ, ທັງນີ້, ແນໃສ່ເຮັດໃຫ້ນັກທ່ອງທ່ຽວຕ່າງປະເທດ ໄດ້ຮັບຮູ້ວິຖີການດຳລົງຊີວິດ ກໍຄື ການນຸ່ງຖື, ການກິນຢູ່ຂອງປະຊາຊົນລາວ ບັນດາເຜົ່າ ເຊິ່ງງານຕະຫລາດດັ່ງກ່າວ, ຈະເປີດທຸກໆວັນເສົາ ແລະ ອາທິດ ເລີ່ມແຕ່ວັນທີ 7-10 ມີນາ 2024 ຢູ່ເຮືອນຊົງລາວ (ບໍລິເວນກົມມະລຽນພະທາດຫລວງ) ຫລັງຈາກນັ້ນຖ້າງານຕະຫລາດນັດບ້ານເຮືອນລາວໄດ້ຮັບຄວາມນິ ຍົມຈາກນັກທ່ອງທ່ຽວຫລາຍຂຶ້ນຈະສືບຕໍ່ເປີດທຸກໆວັນທັງນີ້ກໍແນໃສ່ຕອບສະໜອງຕາມຄວາມຮຽກຮ້ອງຕ້ອງການຂອງນັກທ່ອງທ່ຽວທັງພາຍໃນ ແລະຕ່າງປະເທດ.ພ້ອມນີ້,ພາຍໃນງານຍັງຈະມີການສະແດງສິລະປະວັດທະນະທຳລາວເພື່ອໃຫ້ນັກທ່ອງທ່ຽວທີ່ມາຮ່ວມພາຍໃນງານໄດ້ເຫັນການສະແດງບົດຟ້ອນລຳ ທີ່ເປັນເອກະລັດຂອງລາວກໍຄືຂອງແຕ່ລະຊົນເຜົ່າ ແລະຈະມີການສາຍຮູບເງົາກາງແປງເຊິ່ງຮູບເງົາທີນຳມາສາຍຈະກ່ຽວກັບປະຫວັດສາດຂອງພະທາດຫລວງວຽງຈັນ ແລະອື່ນໆ.

ການຈັດງານດັ່ງກ່າວ, ຍັງເປັນການເປີດໂອກາດໃຫ້ບັນດາຜູ້ປະກອບການ ພໍ່ຄ້າ-ຊາວຂາຍ ທີມີຜະລິດຕະພັນ ແຕ່ຫຍັງບໍ່ສາມາດເຂົ້າເຖິງຜູ້ບໍລິໂພກກໍສາມາດນຳເອົາຜະລິດຕະພັນຂອງຕົນມາວາງຂາຍໄດ້ ແນໃສ່ສ້າງເສດຖະກິດຄອບຄົວໃຫ້ເພີ່ມຂຶ້ນເປັນກ້າວໆ. ສຳລັບທ່ານໃດທີ່ສົນໃຈຢາກນຳເອົາສິນຄ້າ ແລະຜະລິດຕະພັນຂອງຕົນ ມາວາງຈຳໜ່າຍ, ລາຄາເລີ່ມຕົ້ນ 3 ແສນກີບ. ພື້ນທີ ພາຍໃນງານ ສາມາດຮອງຮັບໄດ້ທັງໝົດ 50 ກວ່າຮ້ານ ໃນນັ້ນ, ຮ້ານຫັດຖະກຳມີ 20 ຮ້ານ, ສິນຄ້າກະສິກຳ 20 ຮ້ານ, ຮ້ານອາຫານລາວ 10 ຮ້ານ. ພ້ອມນັ້ນ, ພາຍໃນງານຍັງຈະມີການກຳລອງການຕຳແຜ່ນແພ, ການປັ້ນດິນເຜົາ ແລະອື່ນໆ.

แชร์