ໂຮງຮຽນ ແສງສະໄໝ ເປີດງານກິລາ-ສິລະປະ ປະຈໍາສົກຮຽນ 2023-2024

ໃນວັນທີ 7 ກຸມາ 2024, ໂຮງຮຽນແສງສະໄໝ ໄດ້ເປີດງານກິລາ-ສິລະປະປະຈໍາສົກຮຽນ 2023-2024 ຂຶ້ນທີ່ເດີ່ນກິລານິວອາລີນາ ບ້ານວັດນາກ ເມືອງສີສັດຕະນາກ ນະຄອນຫລວງວຽງຈັນ ໂດຍການເປັນປະທານຂອງທ່ານ ແສງສະໄໝ ພິມມະແສງ ເຈົ້າຂອງ ໂຮງຮຽນ ແສງສະໄໝ, ມີບັນດາສະຫາຍຄູ - ອາຈານ ແລະ ນ້ອງນັກຮຽນເຂົ້າຮ່ວມ.

ການເປີດກິລາ - ສິລະປະ ປະຈຳສົກຮຽນ 2023 - 2024 ເພື່ອປະຕິບັດຕາມ 3 ລັກສະນະ 5 ຫຼັກມູນການສຶກສາ ທີ່ພັດລັດກໍ່ຄືກະຊວງສຶກສາທິການ ແລະກິລາ ວາງອອກ, ໃນນັ້ນວຽກງານກິລາ - ສິລະປະ ກໍ່ເປັນວຽກ 1 ທີ່ນອນຢູ່ໃນ 5 ຫຼັກມູນການສຶກສາ ຊຶ່ງ ພວກເຮົາກໍ່ໄດ້ຖືເປັນວຽກສໍາຄັນ ເພື່ອປະຕິບັດຕາມແຜນການຂອງຫ້ອງການສຶກສາທິການ ແລະ ກິລາ ເມືອງສີສັດຕະນາກວາງອອກ. ໂດຍຈຸດປະສົງແມ່ນສ້າງໃຫ້ນ້ອງນັກຮຽນ ມີພອນສະຫວັນທາງດ້ານກິລາ - ສິລະປະ ຕິດພັນກັບການຮຽນ-ການສອນຂອງຄູ-ອາຈານ ແລະ ຊອກຮູ້ຮໍ່າຮຽນເອົາຫຼາຍແບບມາຜັນຂະຫຍາຍຢູ່ໃນໂຮງຮຽນທັງເປັນການເສີມສ້າງໃຫ້ນັກຮຽນມີສຸຂະພາບແຂງແຮງ, ມີພາລະນາໄມສົມບູນ, ຮູ້ກະຕິກາມາລະຍາດ, ຮູ້ແພ້, ຮູ້ ຊະນະ, ຮູ້ໃຫ້ອະໄພ, ຮູ້ໃຊ້ເວລາວ່າງໃຫ້ເປັນປະໂຫຍດ ແລະ ຫ່າງໄກຈາກສິ່ງເສບຕິດ; ເພື່ອເລືອກເຟັ້ນເອົານັກກິລາ ແລະນັກສິລະປະທີ່ດີເດັ່ນເຂົ້າມາຮັບໃຊ້ເປັນຕົວແທນຂອງໂຮງຮຽນໄປແຂ່ງຂັນກັບພາກສ່ວນອື່ນໆທີ່ຂັ້ນເທິງຈັດຂຶ້ນ ຫຼືໄປສະແດງຮັບໃຊ້ສັງຄົມ.

ງານຄັ້ງນີ້ໄດ້ຈັດການແຂ່ງຂັນກິລາມວນຊົນ 7 ປະເພດ ແລະສິລະປະ 3 ປະເພດ ໃນນີ້ດ້ານກິລາແມ່ນຈະຈັດໃຫ້ມີ ການແຂ່ງຂັນ ຫ້ອງ ຕໍ່ ຫ້ອງ ເຊິ່ງເປັນຊົ່ວໂມງ ທີ 7 ຂອງທຸກວັນ ຈັນ -ວັນສຸກ ແລະຈະສິ້ນສຸດລົງໃນເດືອນເມສາກ່ອນປີໃໝ່ລາວ ເຊິ່ງຈະມີການມອບຂອງຂັວນ ລາງວັນໃຫ້ທີ 1, 2, 3 ຂອງທຸກປະເພດກິລາ; ສ່ວນດ້ານສິລະປະ: ຈັດການແຂ່ງຂັນແບ່ງເປັນຂັ້ນ, ຊັ້ນຕາມລໍາດັບຈະແຂ່ງຂັນໃຫ້ສໍາເລັດພາຍໃນເດືອນເມສາ ພ້ອມທັງມອບລາງວັນ ທີ 1, 2, 3 ຂອງສິລະປະທຸກປະເພດ. ຊຶ່ງໃນສົກຮຽນ 2022-2023 ຜ່ານມາປະເພດບົດຟ້ອນຊັ້ນມັດທະຍົມໄດ້ອັນດັບທີ 1 ຂອງຂັ້ນເມືອງ ຮ້ອງເພງຊັ້ນປະຖົມໄດ້ອັນດັບທີ 1 ຂອງຂັ້ນກຸ່ມ ແລະບານເຕະຊາຍ ໄດ້ອັນດັບທີ 1 ຂອງຂັ້ນ ເມືອງກະຕໍ້ຊາຍໄດ້ອັນດັບທີ 2 ຫຼັງຈາກນັ້ນຍັງເຂົ້າຮັບໃຊ້ໃນກອງປະຊຸມ ຮັບພິທີ ແລະການຕ້ອນຮັບແຂກຕ່າງໆ.

แชร์