ເມືອງຊຽງຮ່ອນ ສົ່ງອອກຢາງພາລາ ມູນຄ່າ 52 ຕື້ກວ່າກີບ

ອີງຕາມຂໍ້ມູນຂອງກອງປະຊຸມສະຫຼຸບການຈັດຕັ້ງປະຕິບັດວຽກງານການຊື້-ຂາຍ ແລະສົ່ງອອກຜະລິດຕະພັນປຸງແຕ່ງຢາງພາລາ ປະຈຳປີ 2023 ແລະ ວາງທິດທາງແຜນການປີ 2024 ໄດ້ຈັດຂຶ້ນໃນວັນທີ 6 ມີນາ 2024ນີ້ ຢູ່ຫ້ອງປະຊຸມຫ້ອງວ່າການໂດຍການເປັນປະທານຂອງ ທ່ານ ແສງອາທິດ ລາວເບຼຍຢາທໍ່ ຮອງເຈົ້າເມືອງໆຊຽງຮ່ອນ ມີຄະນະກຳມະການຂັ້ນເມືອງ, ຫົວໜ້າ-ຮອງຫົວໜ້າຫ້ອງການ, ບໍລິສັດ, ນັກທຸລະກິດ, ຜູ້ປະກອບການດ້ານຢາງພາລາ ແລະ ວິຊາການກ່ຽວຂ້ອງເຂົ້າຮ່ວມ.
ທ່ານ ສີເມືອງ ອິນທະວົງ ຫົວໜ້າຫ້ອງການອຸດສາຫະກຳ ແລະ ການຄ້າເມືອງຊຽງຮ່ອນ ໄດ້ລາຍງານສົ່ງອອກຜະລິດຕະພັນປຸງແຕ່ງຢາງພາລາປະຈຳປີ 2023. ທ່ານໄດ້ກ່າວວ່າ: ການສົ່ງອອກຢາງພາລາກ້ອນ ແລະ ຜະລິດຕະພັນຢາງພາລາ ໃນປີ 2023 ຜ່ານມາ ໄດ້ສົ່ງອອກຢາງພາລາກ້ອນ ທີ່ຍັງບໍ່ໄດ້ປຸງແຕ່ງຈຳນວນ 430 ໂຕນ ລວມມູນຄ່າ 1,72 ຕື້ກີບ ມີ3 ບໍລິສັດຄື: ບໍລິສັດ ບຸນທາ ການຄ້າ ຈຳກັດ ສົ່ງອອກ 350 ໂຕນ, ບໍລິສັດ ສົມພອນສົ່ງອອກຢາງພາລາ ຈຳກັດ 50 ໂຕນ ແລະ ບໍລິສັດ HLB ຈຳກັດ ສົ່ງອອກ 30 ໂຕນ. ສ່ວນບໍລິສັດ ລາວຈູນທົ່ງຢາງພາລາ ຈຳກັດ ສົ່ງອອກຢາງພາລາປຸງແຕ່ງເຄິ່ງສຳເລັດຮູບ ຈຳນວນ 6.400 ໂຕນ ລວມມູນຄ່າ 51,20ຕື້ກີບ. ທົ່ວເມືອງຊຽງຮ່ອນ ມີເນື້ອທີ່ປູກຢາງພາລາທັງໝົດ 6.200 ເຮັກຕາ ໃນນັ້ນເນື້ອທີ່ ທີ່ໄດ້ປາດແລ້ວຈຳນວນ 4.224 ເຮັກຕາ ລະເລຍສະມັດຕະພາບຜົນຜະລິດໄດ້ 4,6 ໂຕນຕໍ່ເຮັກຕາ ສະເລຍຜົນຜະລິດໄດ້ 19.432 ໂຕນຕໍ່ປີ, ມີ 41 ບ້ານ, ມີ 3.229 ຄອບຄົວ, ມີ 4 ບໍລິສັດໄດ້ມາລົງທຶນສົ່ງເສີມການປູກຄື: ບໍລິສັດ ລີລຽງຢູນານ ຈຳກັດ ໃນເນື້ອທີ່ 600 ກວ່າເຮັກຕາ, ບໍລິສັດ ຊຽງຕາລີ ຈຳກັດ ໃນເນື້ອທີ່ 2.885 ເຮັກຕາ, ບໍລິສັດ ບໍ່ແກ້ວ ຈຳກັດ ໃນເນື້ອທີ່ 187 ເຮັກຕາ, ບໍລິສັດ ລາວຈູນທົ່ງຢາງພາລາ ຈຳກັດໃນເນື້ອທີ່ 192 ເຮັກຕາ, ນະໂຍບາຍຂອງທ່ານເຈົ້າແຂວງສົ່ງເສີມໃຫ້ຄອບຄົວທຸກຍາກເຂດປາກເປັດ ໃນເນື້ອທີ່ 6,4 ເຮັກຕາ ແລະ ປະຊາຊົນລົງທຶນປູກເອງຈຳນວນ 2.073 ເຮັກຕາ.
--
ໂດຍ: ດອນ ຂຽວພະນາ.

แชร์