ທ່ານນາງ ວຽງຄຳ ທອງນາລີ ຍຶດໝັ້ນຊື່ສັດ ພັດທະນາອົງກອນທັນຍຸກ ເຮັດໃຫ້ທຸລະກິດເຕີບໃຫຍ່

ທ່ານ ນາງ ວຽງຄຳ ທອງນາລີ ປະທານ ບໍລິສັດ ວີເຄກຣຸບ ຫຼື ວີເຄການຄ້າ ຂາອອກ-ຂາເຂົ້າ ຈຳກັດ ໜຶ່ງນັກທຸລະກິດຍິງຖືວ່າເພິ່ນມີບົດບາດ ແລະເປັນທີ່ຮູ້ຈັກກັນດີວົງການນັກທຸລະກິດໂດຍສະເພາະການນຳເຂົ້າລົດ ເຮັດໃຫ້ສັງຄົມຍອມຮັບ ແລະໄດ້ຮັບລາງວັນຫລາຍລາງວັນໃນເວທີສາກົນເພິ່ນມີວິໄສທັດໃນການບໍລິຫານທຸລະກິດແມ່ນຕ້ອງຊື່ສັດ, ຈິງໃຈ, ຄັດສັນສິນຄ້າທີ່ມີຄຸນນະພາບມາໃຫ້ບໍລິການ, ຕ້ອງມີການປັບປຸງ ແລະພັດທະນາອົງກອນໃຫ້ທັນຍຸກທັນສະໄໝຢູ່ຕະຫຼອດເວລາ.

ທ່ານນາງ ວຽງຄຳ ທອງນາລີ ປະທານບໍລິສັດ ວີເຄກຣຸບ ຫຼືວີເຄການຄ້າ ຂາອອກ-ຂາເຂົ້າ ຈຳກັດ ໃຫ້ສຳພາດວ່າ: ການເປັນນັກທຸລະກິດຍິງຕໍ່ຄວາມຄິດຂອງຂ້າພະເຈົ້າແມ່ນມີຂໍ້ໄດ້ປຽບຄືເຮັດໃຫ້ແມ່ຍິງມີບົດບາດຢູ່ໃນເວລາທີສາກົນ ແລະເທົ່າທຽມກັບເພດຊາຍກໍຄືເຮັດໄດ້ໃນທຸກຢ່າງທີ່ເພດຊາຍສາມາດເຮັດໄດ້ແຕ່ກໍມີສິ່ງທີ່ທ້າທາຍກໍ່ຄືການທີ່ຕ້ອງແບ່ງເວລາ ແລະໄດ້ໃຊ້ເວລາໃນການເຮັດວຽກໜ້ອຍກວ່າເພດຊາຍ ເພາະຈະຕ້ອງແບ່ງເວລາໃຫ້ຄອບຄົວລູກເຕົ້າ ແລະຕົນເອງນຳເຊິ່ງເປັນສິ່ງທີ່ທ້າທາຍແຕ່ກໍຊົມເຊີຍທີ່ມີແມ່ຍິງຫຼາຍຄົນເຮັດໄດ້ ແລະປະສົບຜົນສຳເລັດ.

ບໍລິສັດ ວີເຄກຣຸບ ຫຼື ວີເຄການຄ້າ ຂາອອກ-ຂາເຂົ້າ ຈຳກັດ ສ້າງຕັ້ງມາແຕ່ປີ 2009 ກິດຈະການຫຼັກແມ່ນນຳເຂົ້າ ແລະຈຳໜ່າຍລົດໃຫຍ່ຫຼາຍຍີ່ຫໍ້ເຊັ່ນ: ຍີ່ຫໍ້ JAC ເປັນລົດບັນທຸກ, ລົດບັນທຸກໜັກຍີ່ຫໍ້ HOWO, ລົດກົນຈັກ ໜັກຍີ່ຫໍ້ LIUGONG, ລົດຫຼູຍີ່ຫໍ້ HONGQI, GAC, AION, VOLKS Wagen, TOYOTA, Tesla, AUDI ແລະອື່ນໆນອກນີ້ພວກເຮົາຍັງມີໂຮງງານຜະລິດຕົວຖັງລົດທີ່ມີເຄື່ອງມືທັນສະໄໝທີ່ສຸດໃນ ສປປ ລາວ, ໂຮງ ງານອັດສະຝານ ທີ່ໃຫຍ່ທີ່ສຸດນຳເຂົ້າ ແລະ ຈຳໜ່າຍຢາງໝາກຕອຍ, ມີກິດຈະການບໍ່ແຮ່, ບໍລິການລົດແທັກຊີ, ສະຖານີ ສາກໄຟຂອງລົດໄຟຟ້າ, ມີສູນຈຳໜ່າຍ ແລະບໍລິການຫຼັງການຂາຍລົດໃຫຍ່ 20 ສາຂາທົ່ວປະເທດ ໃນນີ້ ມີ 8 ໂຊລູມໃນນະຄອນຫຼວງວຽງຈັນ.

ພິເສດກຸ່ມບໍລິສັດ ວີເຄ ຍັງມີກິດຈະການກໍ່ສ້າງໃນນາມບໍລິສັດ VKISC ເຊິ່ງມີຜົນງານຮ່ວມກໍ່ສ້າງທາງເລກ 11 ນະຄອນຫລວງວຽງຈັນ-ເມືອງປາກລາຍ ແຂວງໄຊຍະບູລີ ແລະປະຈຸບັນແມ່ນຮັບເໝົາກໍ່ສ້າງຂົວຂ້າມນໍ້າຂອງຂົວມິດຕະພາບ ລາວ-ໄທ ແຫ່ງທີ 5 ປາກຊັນ-ບຶງການ ໂຄງການນີ້ເປັນໂຄງການທີ່ຂ້າພະເຈົ້າມີຄວາມພາກພູມໃຈຫຼາຍທີ່ໄດ້ມີສ່ວນຮ່ວມໃນການກໍ່ສ້າງພື້ນຖານໂຄງຮ່າງສາຍສຳພັນ ລະຫວ່າງ 2 ປະເທດ ລາວ-ໄທ ແລະເປັນບໍລິສັດລາວບໍລິສັດທຳອິດທີ່ມີຄວາມສາມາດໃນການກໍ່ສ້າງຂົວຂ້າມແມ່ນໍ້າຂອງ ຂົວແຫ່ງນີ້ຈະມີອາຍຸການໃຊ້ງານປະມານ 100 ປີ (ປະຫວັດສາດຈະຈາລຶກພວກເຮົາຢ່າງໜ້ອຍ 100 ປີ) ແລະ ຈະສຳເລັດການກໍ່ສ້າງໃນທ້າຍປີ2024ນີ້

ເຊິ່ງຜ່ານມາວຽກງານສັງຄົມພວກເຮົາກໍ່ໄດ້ມີການປະກອບສ່ວນສະໝໍ່າສະເໝີໃນການຊ່ວຍເຫຼືອໄພພິບັດທາງສັງຄົມປະກອບສ່ວນຫຼາຍກິດຈະກຳໃນຫຼາຍພາກສ່ວນ ພິເສດແມ່ນຂ້າພະເຈົ້າມັກຊື້ເຄື່ອງໄປບໍລິຈາກໃຫ້ເດັກນ້ອຍຜູ້ທຸກຍາກຢູ່ເຂດໄກສອກຫຼີກ.

ສຳລັບວິໄສທັດໃນການບໍລິຫານທຸລະກິດຂອງຂ້າພະເຈົ້າແມ່ນຕ້ອງຊື່ສັດ, ຈິງໃຈ, ຄັດສັນສິນຄ້າທີ່ມີຄຸນນະພາບມາໃຫ້ບໍລິການ, ຕ້ອງມີການປັບປຸງ ແລະພັດທະນາອົງກອນໃຫ້ທັນຍຸກທັນສະໄໝຢູ່ຕະຫຼອດເວລາຂ້າພະເຈົ້າຂໍສະແດງຄວາມຂອບໃຈມາຍັງທີມງານອ້າຍເອື້ອຍນ້ອງ VK GROUP ຂອງພວກເຮົາ ແລະ ລູກຄ້າທຸກໆທ່ານທີ່ໃຫ້ການສະຫນັບສະຫນູນພວກເຮົາດ້ວຍດີຕະຫລອດມາຂໍໃຫ້ທຸກທ່ານໂຊກດີມີໄຊໃນທຸລະກິດແລະຊີວິດຄອບຄົວ

ໃນໂອກາດວັນແມ່ຍິງຄົບຮອບ 114 ປີ ທີ່ຈະມາເຖິງນີ້ຂ້າພະເຈົ້າຂໍອວຍພອນໃຫ້ການນຳພັກ-ລັດ ໂດຍສະເພາະການນຳເພດຍິງຂໍໃຫ້ມີສຸຂະພາບແຂງແຮງສຸກສົມຫວັງໃນໜ້າທີ່ການງານເປັນແບບຢ່າງທີ່ດີໃຫ້ແມ່ຍິງທຸກຄົນ ແລະຂໍຝາກເປັນກຳລັງໃຈໃຫ້ແມ່ຍິງລາວເຮົາທົ່ວປະເທດຈົ່ງເຂັ້ມແຂງ, ມີເປົ້າໝາຍ, ມີຄວາມຝັນໃນຊີວິດ ສິ່ງສຳຄັນທີ່ສຸດແມ່ນຕ້ອງລົງມືປະຕິບັດ (ບໍ່ມີຫຍັງທີ່ຈະເຮັດບໍ່ໄດ້ຖ້າເຮົາຕັ້ງໃຈຈິງ) ແລະຖ້າທ່ານຕ້ອງສິ່ງທີ່ແຕກຕ່າງຈາກການເປັນຢູ່ທຸກມື້ນີ້ທ່ານກໍຄວນເຮັດໃນສິ່ງທີ່ແຕກຕ່າງ.

แชร์