ໂຮງໝໍມິຕະພາບກຽມພ້ອມຮັບຮອງຄົນເຈັບສຸກເສີນຊ່ວງປີໃໝ່

  ໃນໂອກາດສະເຫຼີມສະຫຼອງບຸນເທສະການບຸນປີໃໝ່ລາວໂຮງໝໍມິດຕະພາບ (150 ຕຽງ) ແມ່ນໄດ້ກຽມຄວາມພ້ອມຫຼາຍດ້ານເພື່ອຮອງຮັບຄົນເຈັບສຸກ ເສີນໂດຍສະເພາະເກີດຈາກອຸບັດເຫດຊຶ່ງໃນນັ້ນແມ່ນໄດ້ແບ່ງພະແນກສຸກເສີນອອກເປັນສອງຟາກຄື: ສຸກເສີນສະເພາະກະທົບດ້ວຍອຸບັດເຫດ ແລະສຸກເສີນພາຍໃນ.

  ທ່ານ ດຣ ຫວັງນະຄອນ ດິດຕະພົງ ຮອງອໍານວຍການໂຮງໝໍມິດຕະພາບ (150 ຕຽງ) ຮັບຜິດຊອບການແພດສຸກເສີນໄດ້ໃຫ້ສໍາພາດວ່າ: ເພື່ອຮອງຮັບຄົນເຈັບຈາກອຸບັດເຫດໃນໄລຍະບຸນເທສະການປີໃໝ່ລາວ, ຕາມທິດຊີ້ນໍາຂອງກະຊວງສາທາລະນະສຸກໂຮງໝໍຂອງຕົນໂດຍສະເພາະອານຸກໍາມະການຕອບໂຕ້ພາວະສຸກໄດ້ກະກຽມຄວາມພ້ອມດ້ານບຸກຄະລາກອນທ່ານໝໍ, ພະຍາບານ ແລະທີມແພດຊຶ່ງນອກຈາກທີມແພດປະຈໍາການປົກກະຕິແລ້ວຍັງໄດ້ແຕ່ງຕັ້ງທີມແພດສໍາຮອງຂຶ້ນຕື່ມອີກຖ້າຫາກມີເຫດການຄົນເຈັບມາເພີ່ມຂຶ້ນກໍຈະໃຊ້ທີມເສີມເຂົ້າມາຊ່ວຍນອກນີ້ຍັງມີນັກສຶກສາຈາກມະຫາວິທະຍາໄລວິທະຍາສາດສຸຂະ ພາບຈໍານວນໜຶ່ງມາຊ່ວຍໃຫ້ບໍລິການໃນຊ່ວງໄລຍະສະຫຼອງບຸນປີໃໝ່ນີ້ພ້ອມນັ້ນຍັງໄດ້ກະກຽມອຸປະກອນການແພດທີ່ຈໍາເປັນຕ່າງໆຄື: ລໍ້, ຕຽງນອນ, ຜ້າປູຕຽງ, ຫ້ອງນອນຄົນເຈັບ, ຢາປົວພະຍາດ ແລະ ອື່ນໆ ໃນນັ້ນສະເພາະພະແນກສຸກເສີນແມ່ນໄດ້ແບ່ງເປັນສອງຟາກຄື: ຫ້ອງສຸກເສີນສະເພາະກະທົບດ້ວຍອຸ ບັດເຫດ ແລະ ສຸກເສີນພາຍໃນເພື່ອກະກຽມລະບົບຫ້ອງຜ່າຕັດໃຫ້ຮັບປະກັນ ແລະເພີ່ມທະວີການປະສານງານເຮັດວຽກຊຶ່ງແຕ່ລະໂຮງໝໍດັ່ງກ່າວໄດ້ກະກຽມທີມແພດສຸກເສີນຂອງຕົນໄວ້ເປັນຢ່າງດີສໍາລັບການນໍາສົ່ງຄົນເຈັບທີ່ມີອາການຂັ້ນວິກິດໂຮງໝໍໃດໃກ້ທີ່ສຸດໃຫ້ນໍາສົ່ງໂຮງໝໍນັ້ນໂດຍປະສານກັບໜ່ວຍກູ້ໄພທີ່ ກຽມໃຫ້ບໍລິການໃນໄລຍະບຸນປີໃໝ່ທົ່ວນະຄອນຫຼວງວຽງຈັນມີທັງໝົດ 22 ຈຸດ.

 ຮອງຜູ້ອໍານວຍການໂຮງໝໍດັ່ງກ່າວໃຫ້ຮູ້ອີກວ່າ: ໃນໄລຍະການສະເຫຼີມສະຫຼອງບຸນປີໃໝ່ປີຜ່ານມາມີຄົນເຈັບມາບໍລິການຢູ່ສຸກເສີນຂອງໂຮງໝໍມິດຕະພາບຈໍານວນ 1 ພັນກວ່າຄົນ, ໃນນັ້ນ, ຄົນເຈັບຖືກະທົບ 589 ຄົນ, ຄົນເຈັບອຸບັດເຫດຕາມທ້ອງຖະໜົນມີ 447 ຄົນ, ໃນນັ້ນ, ມີຄົນເຈັບຂັ້ນສາຫັດ 23 ຄົນ, ເສຍຊີວິດຢູ່ສຸກເສີນ 3 ຄົນ ສະນັ້ນປີນີ້ນອກຈາກບຸກຄະລາກອນ, ອຸປະກອບການແພດ ແລະສະຖານທີ່ບໍລິການແລ້ວຊຶ່ງສິ່ງຕ້ອງໄດ້ກະກຽມຫຼາຍທີ່ສຸດກໍຄື ເລືອດ, ເພາະຄົນເຈັບປະເພດກະທົບ, ເລືອດໄຫຼ ແລະຜ່າຕັດດ່ວນແມ່ນໄດ້ໃຊ້ຫຼາຍ.

ຂ່າວ: ແພງຕາ

แชร์