ກອງປະຊຸມອະນຸກໍາມະການເສດຖະກິດ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 12

ໃນວັນທີ 28 ກຸມພາ 2024, ທ່ານ ສົມບູນ ສີຫານາດ ຫົວໜ້າກົມເສດຖະກິດ, ກະຊວງການຕ່າງປະເທດ, ຫົວໜ້າອະນຸກໍາມະການດ້ານເສດຖະກິດ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ຂອງ ສປປ ລາວ, ພ້ອມດ້ວຍຄະນະຜູ້ແທນຈາກກະຊວງທີ່ກ່ຽວຂ້ອງ ຂັ້ນສູນກາງ ແລະ ພະແນກການທີ່ກ່ຽວຂ້ອງຈາກ 4 ແຂວງພາກໃຕ້: ຈໍາປາສັກ, ສາລະວັນ, ອັດຕະປື ແລະ ແຂວງເຊກອງ ໄດ້ນໍາພາຄະນະເຂົ້າຮ່ວມກອງປະຊຸມ ອະນຸກໍາມະການເສດຖະກິດ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 12 ທີ່ແຂວງອັດຕະປື.

ກອງປະຊຸມ ໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດຜົນຂອງກອງປະຊຸມອະນຸກໍາມະການເສດຖະກິດ ຄັ້ງທີ 11 ທີ່ຜ່ານມາໂດຍສະເພາະບັນດາຜົນເລັດການຈັດຕັ້ງປະຕິບັດງານບັນດາແຜນວຽກ, ແຜນງານທີ່ຕິດພັນກັບແຜນແມ່ບົດວ່າດ້ວຍການພັດທະນາເສດຖະກິດ-ສັງຄົມ ເຂດສາມຫລ່ຽມພັດທະນາ ກໍາປູເຈຍ-ລາວ-ຫວຽດນາມ ຮອດປີ 2020 ແລະຮ່າງແຜນແມ່ບົດພັດທະນາເສດຖະກິດ-ສັງຄົມ ໃນເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ສະບັບໃໜ່ ຮອດປີ 2030, ແຜນປະຕິບັດງານວ່າດ້ວຍການເຊື່ອມຈອດດ້ານເສດຖະກິດ ຮອດປີ 2030, ແຜນພັດທະນາການທ່ອງທ່ຽວ ໃນເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ, ສັນຍາວ່າດ້ວຍການສົ່ງເສີມ ແລະ ອໍານວຍຄວາມສະດວກດ້ານການຄ້າ ຢູ່ໃນເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ແລະ ແຜນອຸດສະຫະກໍາຢ່າງພາລາ ໃນເຂດສາມຫລ່ຽມພັດທະນາ ດັ່ງກ່າວ; ກອງປະຊຸມຍັງໄດ້ປຶກສາຫາລື ວາງແຜນທິດທາງການຮ່ວມມືໃນຕໍ່ໜ້າ ອັນພົ້ນເດັ່ນ, ກອງປະຊຸມ ໄດ້ເປັນເອກະພາບໃນການປ່ຽນຊື່ ຈາກແຜນແມ່ບົດ ຮອດປີ 2030 ມາເປັນ ວິໄສທັດ ຮອດປີ 2030 ໂດຍແນໃສ່ສະພາບການປ່ຽນແປງໃນແຕ່ລະໄລຍະ ເພື່ອໃຫ້ແຜນດັ່ງກ່າວ ສອດຄ່ອງກັບສະພາບການໃນປະຈຸບັນ.

ພ້ອມກັນນີ້, ກອງປະຊຸມໄດ້ຮັບຮອງ ແລະລົງນາມບົດບັນທຶກກອງປະຊຸມອະນຸກໍາມະການເສດຖະກິດ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 12 ເພື່ອລາຍງານຕໍ່ເຈົ້າໜ້າທີ່ອາວຸໂສ ເຂດສາມຫລ່ຽມພັດທະນາ ກຳປູເຈຍ-ລາວ-ຫວຽດນາມ ທີ່ຈັດຂຶ້ນໃນວັນທີ 29 ກຸມພາ 2024 ນີ້.
ພາບ: ຂັນໄຊ

แชร์