ຕະຫຼາດນັດເຮືອນລາວ ສົ່ງເສີມການທ່ອງທ່ຽວ ຈະຈັດຂຶ້ນ 7-10 ມີນານີ້

ເທສະການຕະຫລາດນັດເຮືອນລາວ ຈະຈັດຂຶ້ນໃນລະຫວ່າງ 7-10 ມີນາ 2024 ນີ້, ຢູ່ເຮືອນຊົງລາວເຂດກົມມະລຽນພະທາດຫຼວງວຽງຈັນ ເພື່ອສົ່ງເສີມຜະລິດຕະພັນຂອງຄົນລາວ ເປັນຕົ້ນຜະລິດຕະພັນກະສິກຳ, ຫັດຖະກຳ, ເຄື່ອງອຸປະໂພກ, ບໍລິໂພກ ແລະອື່ນໆ, ທັງເປັນການເຕົ້າໂຮມ ເອົາຜະລິດຕະພັນຕ່າງໆ ທີ່ເປັນຂອງຄົນລາວ 100% ຢູ່ຂອບເຂດທົ່ວປະເທດ ມາວາງຈຳໜ່າຍ ໃຫ້ນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວ, ມາຊົມ, ມາຊີມອາຫານທີ່ເປັນເອກະລັກຂອງລາວ ແລະຈັບຈ່າຍຊື້ສິນຄ້າຜະລິດຕະພັນ ເຄື່ອງທີ່ລະນຶກຕ່າງໆ ຢູ່ພາຍໃນງານໄດ້ ເຊິ່ງຈະຈັດ ທຸກໆວັນເສົາ ແລະວັນອາທິດ ໃນຕອນເຊົ້າ ເລີ່ມແຕ່ເວລາ 7:00-10:00 ໂມງ ແລະຕອນແລງເລີ່ມແຕ່ເວລາ 16:00-23:00 ໂມງ.

ທ່ານ ນາງ ເພັນນະພາ ວົງສະໝໍລະພູມ ຜູ້ຈັດການບໍລິສັດຊີເອັນພີ ການຄ້າ ຂາອອກ-ຂາເຂົ້າ ຈຳກັດ, ທັງເປັນຜູ້ຈັດເທສະການຕະຫລາດນັດເຮືອນລາວ ໃຫ້ສຳພາດຕໍ່ສື່ມວນຊົນ ເມື່ອບໍ່ດົນນີ້ວ່າ: ເທສະການຕະຫລາດນັດບ້ານເຮືອນລາວ ຈັດຂຶ້ນເພື່ອດຶງດູງນັກທ່ອງທ່ຽວ ທັງພາຍໃນ ແລະຕ່າງປະເທດເຂົ້າມາທ່ອງທ່ຽວ ສປປ ລາວ ກໍຄື ນະຄອນຫລວງວຽງຈັນ ໃຫ້ຫລາຍຂຶ້ນ ເພື່ອປະກອບສ່ວນເຮັດໃຫ້ປີທ່ອງທ່ຽວລາວ 2024 ແລະ ການເປັນປະທານອາຊຽນຂອງ ສປປ ລາວ ມີຂະບວນການຟົດຟື້ນ ແນໃສ່ເຮັດໃຫ້ນັກທ່ອງທ່ຽວຕ່າງປະເທດ ໄດ້ຮັບຮູ້ວິຖີການດຳລົງຊີວິດ ກໍຄື ການນຸ່ງຖື, ການກິນຢູ່ຂອງປະຊາຊົນລາວບັນດາເຜົ່າເຊິ່ງງານດັ່ງກ່າວ, ຈະເປີດທຸກໆວັນເສົາ ແລະ ອາທິດ ເລີ່ມແຕ່ວັນທີ 7-10 ມີນາ 2024 ຢູ່ເຮືອນຊົງລາວ (ບໍລິເວນກົມມະລຽນພະທາດຫລວງ).

ພ້ອມນີ້, ພາຍໃນງານຍັງຈະມີການສະແດງສິລະປະວັດທະນະທຳລາວເພື່ອໃຫ້ນັກທ່ອງທ່ຽວທີ່ມາຮ່ວມງານໄດ້ເຫັນການສະແດງບົດຟ້ອນ-ລຳ ທີ່ເປັນເອກະລັດຂອງລາວ ກໍຄື ຂອງແຕ່ລະຊົນເຜົ່າ ແລະຈະມີການສາຍຮບເງົາກ່ຽວກັບປະຫວັດສາດຂອງພະທາດຫລວງວຽງຈັນ ແລະ ອື່ນໆ.

ການຈັດງານດັ່ງກ່າວ, ຍັງເປັນການເປີດໂອກາດໃຫ້ບັນດາຜູ້ປະກອບການ ພໍ່ຄ້າ-ຊາວຂາຍ ທີ່ມີຜະລິດຕະພັນ ແຕ່ຍັງບໍ່ສາມາດເຂົ້າເຖິງຜູ້ບໍລິໂພກກໍສາມາດນຳເອົາຜະລິດຕະພັນຂອງຕົນມາວາງຂາຍໄດ້ ແນໃສ່ສ້າງເສດຖະກິດຄອບຄົວໃຫ້ເພີ່ມຂຶ້ນເປັນກ້າວໆ. ສໍາລັບຜູ້ທີ່ສົນໃຈຢາກນຳເອົາສິນຄ້າ ແລະ ຜະລິດຕະພັນ ຂອງຕົນ ມາວາງຈຳໜ່າຍ, ລາຄາເລີ່ມຕົ້ນ 3 ແສນກີບ ເຊິ່ງພື້ນທີ່ພາຍໃນງານສາມາດຮອງຮັບໄດ້ທັງໝົດ 50 ກວ່າຮ້ານ. ໃນນັ້ນ, ຮ້ານຫັດຖະກຳມີ 20 ຮ້ານ, ສິນຄ້າກະສິກຳ 20 ຮ້ານ, ຮ້ານອາຫານລາວ 10 ຮ້ານ. ພ້ອມນັ້ນ, ພາຍໃນງານຍັງຈະມີການຈໍາລອງການຕໍ່າແຜ່ນແພ, ການປັ້ນດິນເຜົາ ແລະອື່ນໆ.

ທ່ານນາງ ເພັນນະພາ ວົງສະໝໍລະພູມຍັງໃຫ້ຮູ້ອີກວ່າ: ຖ້າງານຕະຫລາດນັດເຮືອນລາວໄດ້ຮັບຄວາມນິຍົມຈາກນັກທ່ອງທ່ຽວຫລາຍຂຶ້ນພວກເຮົາກໍຈະສືບຕໍ່ເປີດທຸກໆວັນ, ທັງນີ້ກໍເພື່ອແນໃສ່ຕອບສະໜອງຕາມຄວາມຮຽກຮ້ອງຕ້ອງການຂອງນັກທ່ອງທ່ຽວທັງພາຍໃນ ແລະຕ່າງປະເທດ.
ທີ່ມາ: ຂປລ

แชร์