ສອງກໍາມາທິການສະພາແຫ່ງຊາດລາວ-ກໍາປູເຈຍ ແລກປ່ຽນບົດຮຽນຮ່ວມກັນ

ໃນລະຫວ່າງວັນທີ 25-29 ກຸມພາ 2024 ນີ້, ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ຄໍາຈັນ ໂສຕາປະເສີດ ປະທານກໍາມາທິການບັນດາເຜົ່າ (ກບຜ) ໄດ້ໄປຢ້ຽມຢາມ ແລະແລກປ່ຽນບົດຮຽນ ຢູ່ຣາຊະອານາຈັກກໍາປູເຈຍ ກັບກໍາມາທິການສຶກສາອົບຮົມ, ຊາວໜຸ່ມ, ກິລາ, ສາສະໜາ, ວັດທະນະທໍາ, ສິລະປະ ແລະທ່ອງທ່ຽວ ສະພາແຫ່ງຊາດກໍາປູເຈຍ ກ່ຽວກັບການປະຕິບັດພາລະບົດບາດ, ສິດ ແລະໜ້າທີ່ຂອງສອງກໍາມາທິການ.

ໃນໂອກາດດັ່ງກ່າວ, ຄະນະຜູ້ແທນສະພາແຫ່ງຊາດລາວ ໄດ້ເຂົ້າຢ້ຽມຂໍ່ານັບ ທ່ານ ກິດຕິເສດຖາບັນດິດ ຈຽມຢຽບ ຮອງປະທານສະພາແຫ່ງຊາດກໍາປູເຈຍ ຜູ້ທີ 1 ແລະ ພົບປະສອງຝ່າຍກັບ ທ່ານ ປາ ໂສຈຽດຕິວົງ ປະທານກໍາມາທິການສຶກສາອົບຮົມ, ຊາວໜຸ່ມ, ກິລາ, ສາສະໜາ, ວັດທະນະທໍາ, ສິລະປະ ແລະ ທ່ອງທ່ຽວ. ໃນການພົບປະຄັ້ງນີ້,ສອງຝ່າຍໄດ້ແຈ້ງທີ່ຕັ້ງ,ພາລະບົດບາດ, ສິດ ແລະໜ້າທີ່ ໃນການຕິດຕາມກວດກາກະຊວງ-ອົງການກ່ຽວຂ້ອງ ໃຫ້ກັນ ແລະກັນຊາບ, ພ້ອມທັງໄດ້ແລກປ່ຽນບົດຮຽນ ແລະຮັບຟັງການລາຍງານໂດຍຫຍໍ້ສະພາບພົ້ນເດັ່ນການປະຕິບັດໜ້າທີ່ຂອງສອງອົງການນິຕິບັນຍັດ ແລະສອງກໍາມາທິການໃນໄລຍະຜ່ານມາເປັນຕົ້ນການສ້າງກົດໝາຍ ແລະນິຕິກໍາໃຕ້ກົດໝາຍ, ການພັດທະນາຊົນນະບົດ ແລະແກ້ໄຂຄວາມທຸກຍາກຢູ່ເຂດຫ່າງໄກສອກຫລີກ, ບົດຮຽນການຄຸ້ມຄອງວຽກງານສາສະໜາ, ການປົກປັກຮັກສາວັດທະນະທໍາ, ຮີດຄອງປະເພນີອັນດີງາມຂອງຊົນເຜົ່າຕິດພັນກັບການສົ່ງເສີມວຽກງານການທ່ອງທ່ຽວ, ປຶກສາຫາລືການສືບຕໍ່ພົວພັນຮ່ວມມືລະຫວ່າງສອງກໍາມາທິການໃນຕໍ່ໜ້າ.

ນອກຈາກນີ້, ຄະນະຜູ້ແທນສະພາແຫ່ງຊາດລາວຍັງໄດ້ລົງເຄື່ອນໄຫວຢ້ຽມຊົມພະລາຊະວັງເຈົ້າຊີວິດ, ວັດພະນົມ, ແຫລ່ງທ່ອງທ່ຽວທາງດ້ານວັດທະນະທໍາ, ສາສະໜາ ແລະພື້ນຖານເສດຖະກິດຈໍານວນໜຶ່ງ ເຊັ່ນ: ທ່າກໍາປັ່ນປົກຄອງຕົນເອງ ສີຫານຸວິນ ແລະບໍລິສັດ ອັງກໍເບຍ ຕື່ມອີກ.
ທີ່ມາ: ຂປລ

แชร์