ລາຄານ້ຳມັນໂລກເພີ່ມສູງຂຶ້ນ

ສັນຍາການຊື້ຂາຍນໍ້າມັນດິບລ່ວງໜ້າ ເພີ່ມຂຶ້ນສູງສຸດໃນຮອບ 5 ເດືອນໃນ ວັນທີ 8 ເມສາທີ່ຜ່ານມາ ເນື່ອງຈາກຄວາມບໍ່ສະຫງົບໃນລີບີຈະສົ່ງຜົນຕໍ່ການຜະລິດ ນໍ້າມັນໃນປະເທດ.

ຕາມຂ່າວຕ່າງປະເທດລາຍງານໃນວັນທີ 8 ເມສາທີ່ຜ່ານມາວ່າ ສັນຍາຊື້ຂາຍ ລ່ວງໜ້ານ້ຳມັນດິບ ເບຣນ ທະເລ ເໜືອລອນດອນງວດສົ່ງ ມອບເດືອນພຶດສະພາປີນີ້ ມີການປັບລາຄາເພີ່ມສູງຂຶ້ນ 71,34 ໂດລາສະຫະລັດຕໍ່ຖັງສູງທີ່ສຸດໃນຮອບ 5 ເດືອນຜ່ານມາ. ຂະນະທີ່ສັນຍາຊື້ຂາຍນ້ຳມັນດິບເວສເທັກຊັດສອິນເຕີມີດຽດ ຫຼື ໄລສະວິດຄຣູດຂອງອາເມລິກາ ສົ່ງມອບໃນເດືອນດຽວກັນ ເປີດຕະຫຼາດທີ່ 64,77 ໂດລາສະຫະລັດຕໍ່ຖັງ ຖືວ່າເພີ່ມຂຶ້ນ ເຊັ່ນດຽວກັນຫຼັງຈາກສົງຄາມການເມືອງໃນລີບີເພີ່ມຄວາມ ຮຸນແຮງຂຶ້ນອີກຄັ້ງ. ໂດຍທີ່ຜ່ານມາລິບີຜະລິດນໍ້າມັນປະມານ 1,1 ລ້ານຖັງຕໍ່ວັນ ຄິດເປັນອັດຕາສ່ວນຫຼາຍກວ່າ 1% ຂອງປະລິມານນໍ້າມັນໃນຕະຫຼາດໂລກ.

ຜົນການສຳຫຼວດພົບວ່າ ປະລິມານຈາກກຸ່ມປະເທດໂອເປັກຫຼຸດລົງຢູ່ໃນລະດັບຕໍ່າສຸດໃນຮອບ 4 ປີໃນເດືອນມີນາທີ່ຜ່ານມາ ເນື່ອງຈາກຊາອຸດິດອາຣັບບີປັບຫຼຸດການຜະລິດນໍ້າມັນລົງຫຼາຍກວ່າທີ່ຕົກລົງກັນໄວ້. ນອກຈາກນີ້ ຕະຫຼາດຍັງໄດ້ຮັບແຮງສະໜັບສະໜູນຈາກການຄາດຄະເນຄວາມຄືບໜ້າໃນການເຈລະຈາການຄ້າລະຫວ່າງອາເມລິກາ ແລະສປ ຈີນ ຊຶ່ງຈະຊ່ວຍຊຸກຍູ້ຄວາມຕ້ອງການໃຊ້ນໍ້າມັນຂອງປະເທດທັງສອງ.

ນສພ ເສດຖະກິດ-ສັງຄົມ

แชร์