ຊຽງຂວາງເອົາໃຈໃສ່ສົ່ງເສີມການປູກຝັງ-ລ້ຽງສັດສົ່ງອອກ

ໃນປີ 2023 ຜ່ານມາ, ແຂວງຊຽງຂວາງ ໄດ້ເອົາໃຈໃສ່ປຸກລະດົມຊາວກະສິກອນ ປູກຝັງ-ລ້ຽງສັດຢ່າງເປັນຂະບວນກວ້າງຂວາງ ຊຶ່ງປີຜ່ານມາ, ສາມາດປູກເຂົ້າ ໄດ້ທັງໝົດ 27.872 ເຮັກຕາ, ເທົ່າກັບ 99,15% ຂອງແຜນ​ການ​ປີ. ໃນນີ້, ປູກເຂົ້ານາປີ ໄດ້ 20.064 ເຮັກຕາ, ເທົ່າກັບ 97,79% ຂອງແຜນ​ການປີ, ​ປູກ​​ເຂົ້ານາ​ແຊງ ​ໄດ້​ 440 ​ເຮັກຕາ, ​ລື່ນ​ແຜນ​ການ​ປີ 95,56% ແລະ ປູກເຂົ້າໄຮ່ເນີນສູງ ໄດ້ 7.368 ເຮັກຕາ ເທົ່າກັບ 100% ຂອງແຜນ​ການ​ປີ, ເກັບ​ກູ້​ຜົນ​ຜະ​ລິດ​ເຂົ້າ ໄດ້​ທັງ​ໝົດ 102.030 ໂຕນ, ເທົ່າ​ກັບ 94,06% ຂອງ​ແຜນ​ການ​ປີ, ສະ​ເລ່ຍ​ກິນ​ຕໍ່​ຫົວ​ຄົນ​ໄດ້ 361 ກິ​ໂລ/ຄົນ/ປີ, ໃນ​ນີ້,ຜົນ​ຜະ​ລິດ​ເຂົ້າ​ນາ​ປີ 83.010 ໂຕນ ໃນເນື້ອທີ 20.064 ເຮັກຕາ, ຜົນ​ຜະ​ລິດ​ເຂົ້າ​ນາ​ແຊງ 1.760 ໂຕນ ໃນເນື້ອທີ່ 440 ​ເຮັກຕາ ແລະ ຜົນ​ຜະ​ລິດ​ເຂົ້າ​ເນີນ​ສູງ 17.260 ໂຕນ ໃນເນື້ອທີ 7.368 ເຮັກຕາ,  ປູກສາລີຫວານ ແລະ ສາລີແຂງ ໄດ້ທັງໝົດ 24.533 ເຮັກຕາ ລື່ນ​ແຜນ​ການ​ປີ 4,03%. ໃນນີ້, ປູກສາລີຫວານໄດ້ 502 ເຮັກຕາ ແລະ ປູກສາລີແຂງ ໄດ້ 24.031 ເຮັກຕາ, ເກັບ​ກູ້​ຜົນ​ຜະ​ລິດ​ໄດ້ 123.928 ໂຕນ, ເທົ່າ​ກັບ 98,34% ຂອງ​ແຜນ​ການ​ປີ. ໃນ​ນີ້: ຜົນ​ຜະ​ລິດ​ສາ​ລີ​ຫວານ​ ໄດ້ 3.653 ໂຕນ ແລະ ຜົນ​ຜະ​ລິດ​ສາ​ລີ​ແຂງ​ໄດ້ 120.276 ໂຕນ. ປູກພືດອຸດສາຫະກຳໄດ້ 29.883 ເຮັກຕາ, ລື່ນ​ແຜນ​ການ​ປີ 0,85%, ເກັບກູ້ຜົນຜະລິດພືດ ໄດ້ທັງໝົດ 151.153 ໂຕນ, ເທົ່າກັບ 96,60% ຂອງແຜນການປີ.

ນອກຈາກການປູກຝັງຍັງແລ້ວໄດ້ຊຸກຍູ້ສົ່ງເສີມການລ້ຽງສັດ​ໃຫຍ່ຢ່າງເປັນຂະບວນກວ້າງຂວາງ. ມາຮອດປະຈຸບັນ,ທົ່ວແຂວງມີສັດໃຫຍ່ປະ​ເພດງົວ, ຄວາຍ, ມ້າ, ມີທັງໝົດ 310.767 ໂຕ, ລື່ນ​ແຜນ​ການ​ທີ່​ວາງ​ໄວ້ 9,34%. ໃນນັ້ນ: ​ມີ​ຄວາຍ​ທັງ​ໝົດ 44.945 ໂຕ, ​ງົວ 260.365 ໂຕ (ງົວ​ພື້ນ​ເມືອງ​ 259.165 ​ໂຕ, ງົວ​ພັນ​ນົມ 1.200 ໂຕ), ມ້າ 5.457 ໂຕ, ໝູ 153.688 ໂຕ, ແບ້ ແລະ ແກະ ​21.384 ໂຕ, ມີສັດປີກປະມານ 1.960.696 ໂຕ. ສາມາດສົ່ງສັດລ້ຽງອອກນອກປະເທດ ໄດ້ 20.293 ໂຕ. ໃນ​ນັ້ນ​: ງົວ 9.682 ໂຕ, ຄວາຍ 4.411 ໂຕ, ໝູ 1.041 ໂຕ, ມ້າ 41 ໂຕ ແລະ ຈຳ​ນວນ​ສັດຜ່ານ​ແຂວງ 5.118 ໂຕ. ຄຽງຄູ່ກັບການລ້ຽງສັດໃຫຍ່ ແມ່ນໄດ້ເອົາໃຈໃສ່ການປູກຫຍ້າເພື່ອເປັນອາຫານສັດ ມາ​ຮອດປັດຈຸບັນທົ່ວແຂວງມີທົ່ງຫຍ້າປັບປຸງທັງໝົດ 36.621 ເຮັກຕາ.
 ສໍາລັບປີ 2024 ນີ້ ແຂວງຊຽງຂວາງ ຈະອອກແຮງສູ້ຊົນປູກພືດສະບຽງອາຫານ ແລະ ພືດເປັນສິນຄ້າ ເປັນຕົ້ນແມ່ນປູກເຂົ້າໃຫ້ໄດ້ 28.368 ຮຕ, ຄາດຄະເນຜົນຜະລິດໃຫ້ໄດ້ 109.659 ໂຕນ. ໃນນັ້ນ,ເນື້ອທີ່ນາປີ 20.518 ຮຕ,ຄາດຄະເນຜົນຜະລິດ 92.039 ໂຕນ,ເນື້ອທີ່ປູກເຂົ້າເນີນສູງ 7.368 ເຮັກຕາ, ຄາດຄະເນຜົນຜະລິດ 15.508 ໂຕນ ແລະ ເນື້ອທີ່ປູກເຂົ້ານາແຊງ 482 ເຮັກຕາ, ຄາດຄະເນຜົນຜະລິດ 2.112 ໂຕນ. ຊຸກຍູ້ສົ່ງເສີມການປູກພືດເປັນສິນຄ້າຕົ້ນຕໍແມ່ນສາລີ​ແຂງ ແລະ ສາ​ລີ​ຫວານ ໃຫ້ໄດ້ 23.336 ຮຕ, ຄາດຄະເນຜົນຜະລິດໝົດ​ປີໃຫ້ໄດ້ 126.250 ໂຕນ ແລະ ປູກພືດອຸດສາຫະກໍາຕ່າງໆ ໃຫ້ໄດ້ 29.365 ເຮັກຕາ, ຄາດຄະເນຜົນຜະລິດໃຫ້ໄດ້ທັງໝົດ 155.117 ໂຕນ. ເຊິ່ງປະກອບມີ: ສາລີ​ແຂງ, ຢາສູບ, ອ້ອຍ, ກາເຟ, ຜັກທຽມ, ປະ​ເພດຖົ່ວ, ໝາກເຜັດ ແລະ ພືດຜັກອື່ນໆ. ສົ່ງເສີມການລ້ຽງສັດໃຫຍ່ເປັນຕົ້ນແມ່ນ ງົວ, ຄວາຍ ແລະ ມ້າ ໃຫ້ມີການຂະຫຍາຍຕົວຢ່າງຕໍ່ເນື່ອງ ເພື່ອຕອບສະໜອງການສົ່ງອອກຕ່າງແຂວງ, ຕ່າງປະເທດ ແລະ ບໍລິໂພກພາຍໃນແຂວງ. ໃນປີ 2024 ງົວໃຫ້ມີ​ທັງ​ໝົດ 272.568 ໂຕ, ຄວາຍ ໃຫ້ມີ 52.872 ໂຕ, ມ້າ ໃຫ້​ມີ 5.935 ໂຕ, ໝູ ໃຫ້​ມີ 159.836 ໂຕ, ແບ້ ແລະ ແກະ ໃຫ້ມີ 22.239 ໂຕ ແລະ ສັດປີກ ໃຫ້ມີປະມານ 2.058.730 ໂຕ.         
 ໂດຍ: ວັນໄຊ

แชร์