ຜະລິດຕະພັນໝາກໄມ້ຂອງຈີນ ແລະປະເທດອາຊຽນ ຕ່າງກໍໄດ້ຮັບຄວາມນິຍົມຊົມຊອບຈາກຜູ້ບໍລິໂພກ

ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ໄລຍະບຸນກຸດຈີນພໍດີຖືກກັບລະດູການທີ່ຜະລິດໝາກກ້ຽງນ້ອຍຫວານດີ. ປີນີ້, ໝາກກ້ຽງນ້ອຍລົດຊາດຫວານຫອມດີຂອງເຂດກວາງຊີຈີນໄດ້ສຸກແລ້ວ, ລົດບັນທຸກໝາກກ້ຽງຫວານໄດ້ເດີນທາງອອກຈາກເຂດກວາງຊີ ໄປສູ່ແຫ່ງຕ່າງໆໃນທົ່ວປະເທດຈົນເຖິງປະເທດອາຊີຕາເວັນອອກສຽງໃຕ້.

ໃນຊຸມປີຜ່ານມາ, ໝາກກ້ຽງ “ໂວ້ກ່ານ”, ໝາກກ້ຽງນ້ອຍຫວານ, ໝາກມັງກອນ ແລະໝາກໄມ້ທີ່ເປັນເອກະລັກຂອງເຂດກວາງຊີ ໄດ້ຖືກສົ່ງອອກໄປຈຳໜ່າຍຢູ່ຕະຫລາດປະເທດອາຊຽນເປັນຈຳນວນຫລວງຫລາຍ, ເຊິ່ງເປັນຜະລິດຕະພັນໝາກໄມ້ທີ່ໄດ້ຮັບຄວາມນິຍົມຊົມຊອບຫລາຍຢູ່ປະເທດອາຊຽນ.

ໝາກທຸລຽນຂອງໄທ, ໝາກກ້ວຍຂອງລາວ, ໝາກເງາະຂອງມະເລເຊຍ, ໝາກມັງກອນຂອງອິນໂດເນເຊຍ, ໝາກລຳໄຍຂອງກຳປູເຈຍ, ໝາກໄມ້ຕ່າງປະເທດທີ່ເຄີຍເຮັດໃຫ້ຜູ້ບໍລິໂພກຊາວຈີນ ຮູ້ສຶກລາຄາແພງນັ້ນ, ປັດຈຸບັນພວມຄ່ອຍໆເພີ່ມຂຶ້ນໃນຕະຫລາດ.

ຜູ້ບໍລິໂພກຂອງຈີນ ແລະປະເທດອາຊຽນ ສາມາດບໍລິໂພກໝາກໄມ້ໄດ້ຕາມໃຈມັກ, ທັງໝົດເຫລົ່ານີ້ແມ່ນບໍ່ສາມາດປັດສະຈາກການຮ່ວມມື ລະຫວ່າງ ຈີນກັບອາຊຽນ ທີ່ນັບມື້ນັບແໜ້ນແຟ້ນຍິ່ງຂຶ້ນ, ຄຽງຄູ່ກັບສັນຍາ ສາຍພົວພັນຄູ່ຮ່ວມເສດຖະກິດຮອບດ້ານໃນພາກພື້ນ ຫລື RCEP ໄດ້ເສີມ ຂະຫຍາຍບົດບາດຫລາຍຂຶ້ນ, ຂະໜາດການຄ້າ ລະຫວ່າງ ຈີນ-ອາຊຽນ ໄດ້ເພີ່ມຂຶ້ນຕື່ມອີກ. ນັບແຕ່ RCEP ມີຜົນສັກສິດເປັນຕົ້ນມາ, ແນວພັນ ໝາກໄມ້ຂອງອາຊຽນ ທີ່ໄດ້ຮັບການອະນຸຍາດນຳເຂົ້າສູ່ປະເທດຈີນ ມີໝາກລຳໄຍຂອງກຳປູເຈຍ, ໝາກທຸລຽນຂອງຫວຽດນາມ ແລະອື່ນໆ, ປັດຈຸບັນ ອາຊຽນມີໝາກໄມ້ສົດ 20 ກວ່າຊະນິດໄດ້ຮັບການອະນຸຍາດ ນຳເຂົ້າສູ່ຕະຫລາດຈີນ ແລະຍັງພວມເພີ່ມຂຶ້ນເລື້ອຍໆ. ເດືອນເມສາປີ 2023, ໝາກມີ້ສົດຂອງມະເລເຊຍ ໄດ້ຮັບການອະນຸຍາດໃຫ້ນຳເຂົ້າສູ່ ຕະຫລາດຈີນ ກາຍເປັນປະເທດທີ 3 ທີ່ໄດ້ຮັບການອະນຸຍາດໃຫ້ສົ່ງອອກ ໝາກມີ້ຕໍ່ຈີນ ເຊິ່ງຮອງຈາກໄທ ແລະ ຫວຽດນາມ. ນອກນັ້ນ, ຜູ້ປູກໝາກ ທຸລຽນຂອງມະເລເຊຍ ມີຫວັງຈະສາມາດສົ່ງອອກໝາກທຸລຽນສົດ ຕໍ່ຈີນ ໃນປີ 2024. ນອກນັ້ນ, ຕາມສະຖິຕິຂອງອົງການພາສີແຫ່ງຊາດຫວຽດນາມ ໃຫ້ຮູ້ວ່າ ໃນ 10 ເດືອນຂອງປີ 2023, ມູນຄ່າສົ່ງການອອກໝາກໄມ້ ແລະ ຜັກ ຂອງຫວຽດນາມ ຕໍ່ຈີນ ມີເຖິງ 3,2 ຕື້ໂດລາ, ເພີ່ມຂຶ້ນ 165% ເມື່ອທຽບ ໃສ່ໄລຍະດຽວກັນຂອງປີ 2022.

ການຈໍລະຈອນສິນຄ້າທີ່ໂລ່ງລ່ຽນກໍເປັນປັດໄຈສຳຄັນທີ່ຜູ້ບໍລິໂພກ ຂອງຈີນແລະອາຊຽນ ສາມາດບໍລິໂພກໝາກໄມ້ໄດ້ຕາມໃຈມັກ. ໝາກໄມ້ ທີ່ມາຈາກຈີນແລະ ອາຊຽນ ສາມາດປ້ອນເຂົ້າສູ່ກະຕ່າໝາກໄມ້ຂອງຜູ້ ບໍລິໂພກເຊິ່ງກັນແລະກັນ, ນີ້ບໍ່ສາມາດປັດສະຈາກການປັບປຸງພື້ນຖານ ໂຄງລ່າງຢູ່ດ່ານເຂົ້າອອກເມືອງ, ເສັ້ນທາງລົດໄຟ ແລະອື່ນໆ, ພ້ອມດ້ວຍ ການສະໜັບສະໜູນຈາກນະໂຍບາຍດ້ານການຈໍລະຈອນສິນຄ້າທີ່ກ່ຽວຂ້ອງ. ປັດຈຸບັນ, ການຂົນສົ່ງແບບປະສົມປະສານເສັ້ນທາງລົດໄຟ ແລະທາງ ທະເລ ຕາມຊ່ອງທາງໃໝ່ທາງທະເລ ແລະທາງບົກພາກຕາເວັນຕົກຂອງ ຈີນ, ທາງຫລວງຂ້າມຊາດ ແລະ ເສັ້ນທາງລົດໄຟຂ້າມຊາດ ລ້ວນແຕ່ໄດ້ ເຮັດວຽກຢ່າງເປັນປົກກະຕິແລ້ວ, ຄົມມະນາຄົມທີ່ສະດວກສະບາຍເຮັດໃຫ້ ການຄ້າໝາກໄມ້ ລະຫວ່າງ ຈີນ ແລະອາຊຽນ ມີຄວາມຟົດຟື້ນກວ່າເກົ່າ. ຫລັງຈາກເປີດນຳໃຊ້ເສັ້ນທາງລົດໄຟ ຈີນ-ລາວ ແລ້ວ, ໝາກໄມ້ຊະນິດ ຕ່າງໆສາມາດຜ່ານເສັ້ນທາງລົດໄຟສາຍນີ້ຂົນສົ່ງໄປຮອດຈີນ ແລະປະເທດ ອາຊຽນ. ການຈໍລະຈອນສິນຄ້າແບບແຊ່ເຢັນໄດ້ສະໜອງການຄ້ຳປະກັນ ດ້ານເຕັກໂນໂລຊີທີ່ສຳຄັນໃຫ້ແກ່ການສົ່ງອອກ ແລະນຳເຂົ້າໝາກໄມ້. ຕົວຢ່າງວ່າ ເລີ່ມແຕ່ເດືອນທັນວາປີ 2022, ແຂວງເສສວນ ແລະ ກຳແພງ ນະຄອນຈຸ່ງກິ່ງ ໄດ້ນຳເຂົ້າໝາກໄມ້ໂດຍຜ່ານຂະບວນລົດໄຟແຊ່ເຢັນຕາມ ເສັ້ນທາງລົດໄຟ ຈີນ-ລາວ. ເຊິ່ງຂະບວນລົດໄຟນີ້ໄດ້ນຳໃຊ້ຕູ້ແຊ່ເຢັນ ປະກອບເຄື່ອງຜະລິດໄຟຟ້າດ້ວຍນ້ຳມັນກາຊວນທີ່ຕິດຕູ້ລົດໄຟ, ສາມາດ ຕື່ມນ້ຳມັນຢູ່ລະຫວ່າງທາງເພື່ອຮັບປະກັນການຮັກສາອຸນຫະພູມ, ເຊິ່ງສາ ມາດຮັບປະກັນຄຸນນະພາບຂອງໝາກໄມ້ທີ່ນຳເຂົ້າໄດ້ເປັນຢ່າງດີ.

ຜະລິດຕະພັນໝາກໄມ້ຂອງຈີນ ແລະປະເທດອາຊຽນ ຕ່າງກໍໄດ້ຮັບ ຄວາມນິຍົມຊົມຊອບຈາກຜູ້ບໍລິໂພກເຊິ່ງກັນແລະກັນ, ຢູ່ເບື້ອງຫລັງແມ່ນຕະຫລາດຜະລິດຕະພັນກະສິກຳຂອງຈີນ ແລະອາຊຽນ ທີ່ເປີດກວ້າງກວ່າເກົ່າ. ຈີນ ແລະປະເທດອາຊຽນເພີ່ມທະວີການສົ່ງອອກໝາກໄມ້,ບໍ່ພຽງແຕ່ມີຜົນດີຕໍ່ການຍົກສູງລະດັບເສດຖະກິດ ແລະລະດັບການຜະລິດຂອງປະເທດທີ່ສົ່ງອອກໝາກໄມ້ເທົ່ານັ້ນ, ແຕ່ຍັງໄດ້ເຮັດໃຫ້ກະຕ່າໝາກໄມ້ຂອງປະຊາຊົນມີຄວາມອຸດົມສົມບູນຂຶ້ນຕື່ມອີກດ້ວຍ.

แชร์