ເຂົ້າໄກ່ນ້ອຍຫົວພັນ ໄດ້ຮັບການຢັ້ງຢືນ GI ຈາກບໍລິສັດບໍລິສັດສາກົນ

ສປປ ລາວ ເປັນປະເທດທີ່ອຸດົມສົມບູນໄປດ້ວຍທຳມະຊາດ, ພູຜາປ່າໄມ້ ອາດກາດບໍລິສຸດ ຫ້ວຍນໍ້າລຳເຊອຸດົມ ສົມບູນ ເຊິ່ງເປັນປັດໃຈທີ່ເອື້ອອຳນວຍຕໍ່ການຜະລິດກະສິກຳທີ່ສະອາດ ໂດຍສະເພາະກໍ່ແມ່ນແຂວງຫົວພັນເປັນແຂວງທີ່ ຫາກໍ່ເປີດກໍ່ວ່າໄດ້ຍ້ອນຖືກປິດມາດົນນານ ດ້ວຍການເຂົ້າໄປຮອດໄປເຖິງທີ່ສຸດລຳບາກຈາກປ້ອມປາການທາງທຳມະຊາດກໍ່ຄືຫົນທາງທີ່ສຸດຂົດໂຄ້ງ ແລະສູງຊັນ ເຮັດໃຫ້ຄົນທີ່ໄປຮອດຫົວພັນແລ້ວບໍ່ຢາກກັບຄືນເພາະອິດເມື່ອອ່ອນແຫງກັບການຂັບຂີ່ຍານພາຫະນະທີ່ຍາວນານ ແຕ່ຫຼັງຈາກທີ່ສະໜາມບິນໃໝ່ (ສະໜາມບິນໜອງຄ້າງ) ສຳເລັດເຮັດໃຫ້ການໄປມາສະດວກສະບາຍກ່ອນເມື່ອກ່ອນຫຼາຍເທົ່າມີທ່ຽວບິນເຂົ້າອອກມື້ລະ 2-3ທ່ຽວ. ການປິດໂຕມາດົນເຮັດໃຫ້ຄົງຄວາມເປັນທຳມະຊາດໄດ້ດີກ່ອນແຂວງອື່ນໆ, ມີຮ້ອງຮອຍປະຫວັດສາດທີ່ຫຍິ່ງໃຫຍ່ນາສົນໃຈໃຫ້ແຂກຄົນເຂົ້າໄປສຳພັດ. ນອກນັ້ນຫົວພັນຍັງເປັນແຂວງທີ່ໜາວທີ່ສຸດຂອງລາວເນື່ອງຈາກຕັ້ງຢູ່ບົນພື້ນທີ່ສູງມີຄວາມສູງສະເລ່ຍຢູ່ທີ່ປະມານ 1,000 ແມັດຈາກໜ້ານໍ້າທະເລ.

ຫົວພັນມີສິນຄ້າຫຼາກຫຼາຍທີ່ມີຄວາມເປັນເອກະລັກໂດຍສະເພາະກໍ່ແມ່ນເຂົ້າໄກ່ນ້ອຍຫົວພັນທີ່ໄດ້ຮັບການຂື້ນທະບຽນຖິ່ນກຳເນີດ(Geographical Idication-GI)ມາແຕ່ປີ 2018 ໂດຍມີການລວມໂຕກັນຂອງກຸ່ມຜູ້ປູກເຂົ້າ ໄກ່ນ້ອຍຢູ່ເມືອງ ຊຳເໜືອ ແລະ ເມືອງວຽງໄຊ ເຂົ້າຮ່ວມສ້າງຕັ້ງເປັນສະມາຄົມສົ່ງເສີມເຂົ້າໄກ່ນ້ອຍແຂວງຫົວພັນ ແລະ ວິສາຫະກິດ ຍອດຊຳ ກໍ່ເປັນໜຶ່ງໃນສະມາຊິກຂອງສະມາຄົມ ໃນນາມຜູ້ປະກອບການເຮັດໜ້າທີ່ແປຮູບ ແລະຈັດຈຳໜ່າຍ ເຂົ້າຂອງສະມາຊິກໃນສະມາຄົມ. ຜ່ານການຄົ້ນຄ້ວາລະບຽບນິຕິກຳຄຸ້ມຄອງສະມາຄົມ, ຄຸ້ມຄອງການຜະລິດ, ລົງຝຶກຫັດ ໃຫ້ຜູ້ປູກ, ສ້າງນັກນັກກວດກາພາຍໃນ ແລະຫັນເຂົ້າສູ່ລະບຽບຂອງການຜະລິດສິນຄ້າຖິ່ນກຳເນີດໂດຍໄດ້ຮັບການເອົາໃຈໃສ່ຊຸກຍູ້ຕິດຕາມຈາກກົມຊັບສິນທາງປັນຍາ ແລະຂະແໜງການກະສິກຳ(ຕັ້ງແຕ່ສູນກາງຈົນຮອດທ້ອງຖິ່ນ) ແລະ ໄດ້ຮັບທຶນຊ່ວຍເຫຼືອຈາກອົງການ AFD ຂອງປະເທດຝຣັ່ງເສດ. ຈົນມາຮອດທ້າຍປີ 2023 ສະມາຄົມເຂົ້າໄກ່ນ້ອຍຫົວພັນ ແລະ ວິສາຫະກິດ ຍອດຊຳ ກໍ່ໄດ້ຖືກການຮັບຮອງຈາກບໍລິສັດ ກວດສອບມາດຕະຖານສາກົນ(Bioagricert) ທີ່ມີຊື່ສຽງ ແລະ ປະສົບການສູງໃນການຢັ້ງຢືນສິນຄ້າອິນຊີ ແລະຖິ່ນກຳເນີດ.

ວິສາຫະກິດ ຍອດຊຳ ໄດ້ຮັບການສ້າງຕັ້ງຂື້ນ ໃນຕົ້ນປີ 2017, ເປັນວິສາຫະກິດທີ່ຢູ່ຂັ້ນທ້ອງຖິ່ນແຕ່ພັດທະນາ ແລະບືນໂຕມາແຮງຕີຕະຫຼາດລະດັບປະເທດໄດ້ຫຼາຍໆທ່ານຈະຄຸ້ນຊື່, ເຫັນຜ່ານຫູຜ່ານຕາ ແລະ ເຫັນຈຳໜ່າຍຕາມ ບັນດາຮ້ານຄ້າຊັ້ນນຳຂອງລາວ ໂດຍສະເພາະແມ່ນໃນນະຄອນຫຼວງວຽງຈັນ ແລະແຂວງໃຫຍ່ໆຂອງລາວ. ເຊິ່ງກ່ອນຈະມາຮອດຈຸດນີ້ກໍ່ດ້ວຍວິໃສທັດ ແລະເປົ້າໝາຍທີ່ຊັດເຈນຂອງທີມຜູ້ບໍລິຫານຍອດຊຳທີ່ຕັ້ງເປົ້າພັດທະນາສິນຄ້າກະສິກຳທ້ອງຖິ່ນ ໃຫ້ມີຄວາມເປັນເອກະລັກ, ມີຄວາມໂດດເດັ່ນ ແລະມີການຢັ້ງຢືນຢ່າງເປັນທາງການເຊິ່ງຈະສ້າງໃຫ້ເກີດມີມູນຄ່າເພີ່ມໃຫ້ກັບສິນຄ້າກະສິກຳລາວຊະນິດນີ້ໄດ້, ສ້າງຊື່ສຽງໃຫ້ກັບທ້ອງຖິ່ນ ແລະປະເທດ ຜ່ານການນຳສະເໜີຜ່ານ ເວທີ-ງານວາງສະແດງຕ່າງໆ ທັງພາຍໃນ ແລະພາກພື້ນ-ສາກົນ.

ທ່ານ ສົມໄຊ ຈັນທະລັງສີ ຜູ້ກໍ່ຕັ້ງ ແລະຜູ້ບໍລິຫານຍອດຊຳໃຫ້ໃຫ້ສຳພາດວ່າ ໃນເບື່ອງຕົ້ນຍອດຊຳດຳເນີນທຸລະກິດເປັນໂຮງງານນໍ້າດື່ມຜ່ານການດຳເນີນກິດຈະການກໍ່ເຫັນວ່າປະເພດນໍ້າດື່ມ ຈະໃຫ້ບໍລິການໄດ້ສະເພາະພາຍໃນທ້ອງຖິ່ນເທົ່ານັ້ນ. ຈະບໍ່ສາມາດຂະຫຍາຍຂອບເຂດການຕະຫຼາດໄປຍັງແຂວງອື່ນໄດ້. ສະນັ້ນ, ຈິ່ງໄດ້ສຶກສາບັນດາສິນຄ້າທີ່ເປັນເອກະລັກ ແລະ ເປັນທ່າແຮງຂອງແຂວງ ຈິ່ງເຫັນວ່າເຂົ້າໄກ່ນ້ອຍຫົວພັນ ມີຄວາມເປັນເອກະລັກ ແລະມີປະຫວັດຄວາມເປັນມາທີ່ຍາວນານ ແລະ ກໍ່ໄດ້ຮັບຈົດທະບຽນເປັນສິນຄ້າຖິ່ນກຳເນີດ (Geographical Idication-GI) ແຕ່ກໍ່ຍັງບໍ່ທັນມີຜູ້ປະກອບການທີ່ຈະມາພັດທະນາການຫຸ້ມຫໍ່ ແລະ ຈັດຈຳໜ່າຍ ເພື່ອໃຫ້ເປັນໄປຕາມຈຸດປະສົງ ແລະ ເປົ້າໝາຍຂອງໂຄງການຄື: ສົ່ງເສີມ ແລະ ປົກປ້ອງເຂົ້າໄກ່ນ້ອຍຫົວພັນ ທີ່ມີເປົ້າໝາຍທີ່ຈະສ້າງໃຫ້ເປັນເຂົ້າທີ່ສ້າງມູນຄ່າເພີ່ມ, ສ້າງລາຍຮັບໃຫ້ແກ່ຊາວກະສິກອນ, ສ້າງວຽກເຮັດງານທຳໃຫ້ແກ່ທ້ອງຖິ່ນ ແລະ ປະກອບສ່ວນພັດທະນາເສດຖະກິດສັງຄົມຂອງແຂວງ ແລະໃນຂະນະດຽວກັນເຂົ້າໄກ່ນ້ອຍກໍ່ຈະໄດ້ຮັບການປົກປ້ອງ ບໍ່ໃຫ້ຊື່ສຽງຖືກທຳລາຍ ດັ່ງນັ້ນ, ຍອດຊຳຈິ່ງສົນໃຈເຂົ້າໄປມີສ່ວນຮ່ວມໃນຂະບວນການ ຕ່ອງໂຊ້ມູນຄ່າເພີມດັ່ງກ່າວ ແລະ ມີຜະລິດຕະພັນເຂົ້າອອກມາ 5 ປະເພດຄື: ໄກ່ນ້ອຍຫົວພັນ(ເຂົ້າຖິ່ນກຳເນີດ-GI), ໄກ່ນ້ອຍກ້ອງ(ໂດຍເປັນເຂົ້າໄກ່ນ້ອຍ-GIປະສົມກັບເຂົ້າຈ້າວກໍ່າ), ເຂົ້າໜຽວກໍ່າ, ເຂົ້າຈ້າວກໍ່າ ແລະ ເຂົ້າຈ້າວກ້ອງ. ນອກຈາກການຈັດຈຳໜ່າຍໃນຮູບແບບເຂົ້າສານແລ້ວ ຍັງໄດ້ແຕກສາຍການຜະລິດອອກມາອີກໜຶ່ງ ຜະລິດຕະພັນ ຄືຜະລິດ ຕະພັນເຫຼົ້າຂາວຍອດຊຳ ແລະ ຈະມີອີກຫຼາຍໆສິນຄ້າຄຸນນະພາບອອກມາໄວໆນີ້.
ຜົນງານ ແລະ ຜົນສຳເລັດທີ່ຜົ້ນເດັ່ນໃນໄລຍະຜ່ານມາ.

ດ້ວຍວິໃສທັດ ແລະຜົນງານທີ່ຂ້ອນຂາງຫຼາກຫຼາຍສະນັ້ນ ທ່ານ ສົມໄຊ ຈິ່ງໄດ້ຮັບລາງວັນທຸລະກິດອາຊຽນດີເດັ່ນລາວ 03 ປີຕໍ່ເນື່ອງ 2020-2022(Asean Business Awards Laos): ປີ 2020 ສາຂາການປະກອບສ່ວນພັດທະນາສັງຄົມ(Corporate Social Responsibility-CSR), ປີ 2021 ລາງວັນຜູ້ປະກອບການໜຸ່ມດີເດັ່ນໃນປີ ( Young Enterpreneur Excellence Awards 2021) ແລະ ປີ 2022 ໄດ້ຮັບສອງລາງວັນຄື: Sustianable Social Enterprise Awords ແລະ Food and Beverages Excellence Award.
ທາງດ້ານມາດຕະຖານຂອງສິນຄ້າກໍ່ໄດ້ຮັບການຮັບຮອງເປັນສິນຄ້າ ໜຶ່ງເມືອງໜຶ່ງຜະລິດຕະພັນແຫ່ງຊາດ(ODOP) ແລະ ໄດ້ຮັບການຮັບຮອງຈາກບໍລິສັດກວດສອບສາກົນໃຫ້ເປັນຜູ້ຫຸ້ມຫໍ່ ແລະຈັດຈຳໜ່າຍເຂົ້າໄກ່ນ້ອຍຖິ່ນກຳເນີດຫົວພັນຢ່າງເປັນທາງການ.

แชร์