ທ່ານ ວີເພັດ ສີຫາຈັກ ໄດ້ຮັບການເລືອກໃຫ້ເປັນປະທານ ສຕລ ຕໍ່ອີກ 1 ສະໄໝ

ທ່ານ ວີເພັດ ສີຫາຈັກ ເປັນປະທານ ສະຫະພັນບານເຕະແຫ່ງຊາດລາວ ຫຼື ສຕລ ຖືກເລືອກໃຫ້ເປັນປະທານ ສຕລ ສະໄໝທີ 5 ຕິດຕໍ່ກັນ ຊຶ່ງຈະໄດ້ຮ່ວມກັບຮອງປະທານ 4 ທ່ານ ຄື: ທ່ານ ຄຳໄພ ປະເສີດ, ທ່ານ ຄຳແພງ ວົງຂັນຕີ, ທ່ານ ປະສາດໄຊ ພິລາພັນເດຊ, ທ່ານນາງ ກັນຍາ ແກ້ວມະນີ ພ້ອມກັບກຳມະການຄະນະບໍລິຫານອີກ 6 ທ່ານ ຊ່ວຍກັນບໍລິຫານງານວຽກງານການພັດທະນາວົງການກິລາບານເຕະລາວ ໃນໄລຍະ 5 ປີ ລະຫວ່າງ 2024-2028.

ພິທີເລືອກຕັ້ງຄະນະບໍລິຫານງານ ສຕລ ຊຸດໃໝ່ ສົກປີ 2024-2028 ມີຂຶ້ນໃນວັນທີ 24 ກຸມພາ 2024 ໂດຍໃຫ້ກຽດເຂົ້າຮ່ວມເປັນສັກຂີພິຍານມີ ທ່ານ ສົມສະຫວາດ ເລັ່ງສະຫວັດ ປະທານກິດຕິມະສັກ ສະຫະພັນບານເຕະແຫ່ງຊາດລາ ແລະທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີຕົວແທນຈາກສະຫະພັນບານເຕະສາກົນ (ຟີຟ່າ), ສະຫະພັນບານເຕະອາຊີ (ເອເອັບຊີ) ພ້ອມດ້ວຍຄະນະບໍລິຫານງານທັງຊຸດເກົ່າ ແລະ ຊຸດໃໝ່ ສຕລ, ສະຫະພັນບານເຕະແຂວງ, ສະໂມສອນບານເຕະ ແລະ ສື່ມວນຊົນທຸກຂະແໜງການເຂົ້າຮ່ວມ.

ຜ່ານການເລືອກຕັ້ງຄະນະບໍລິຫານງານໃໝ່ຊຸດນີ້ ມີທັງໝົດ 11 ທ່ານ, ເລືອກ ທ່ານ ວີເພັດ ສີຫາຈັກ ເປັນປະທານສະຫະພັນບານເຕະແຫ່ງຊາດລາວ ອີກໜຶ່ງສະໄໝ ປີ 2024-2028 ໂດຍມີຮອງປະທານ 4 ທ່ານຄື: ທ່ານ ຄຳໄພ ປະເສີດ, ທ່ານ ຄຳແພງ ວົງຂັນຕີ, ທ່ານ ປະສາດໄຊ ພິລາພັນເດຊ, ທ່ານນາງ ກັນຍາ ແກ້ວມະນີ ພ້ອມກັບມີກຳມະການຄະນະບໍລິຫານອີກ 6 ທ່ານຄື: ທ່ານ ດຣ ໄຊຊະນະ ທອງຄຳຈັນ, ທ່ານ ປອ ບຸນຍູ້ ສີສານ, ທ່ານ ນາງ ພູໄຊ ແພງພົງ, ທ່ານ ພັນໂທ ຖາວອນ ຫລວງຈັນດາວົງ, ທ່ານ ແກ້ວລັດຕະນະ ສີຫາວົງ ແລະທ່ານ ຄໍລະເດດ ພອນພະຈັນ.

ພາຍຫລັງທີ່ຖືກເລືອກໃຫ້ເປັນປະທານສະຫະພັນອີກສະໄໝ, ທ່ານ ວີເພັດ ສີຫາຈັກ ໄດ້ກ່າວວ່າຕົນເອງພ້ອມດ້ວຍຄະນະຈະພະຍາຍາມພັດທະນາວົງການບານເຕະລາວໃຫ້ດີຂຶ້ນ ແລະກວ້າງຂວາງກວ່າເກົ່າພ້ອມກັບຮຽກຮ້ອງໃຫ້ການນຳທຸກພາກສ່ວນທັງພາກລັດ, ເອກະຊົນ, ອົງການຈັດຕັ້ງສາກົນ ແລະແຟນບານທຸກທ່ານ ຮ່ວມຊຸກຍູ້ສະໜັບສະໜູນ, ປະກອບສ່ວນເພື່ອພັດທະນາບານລາວຮ່ວມກັນ.

ຂ່າວໂດຍ : ສົງການ ພັນແພງດີ

แชร์