ນາຍົກ ຊຸກຍູ້ການແກ້ໄຂສິ່ງອຸດຕັນ ຢູ່ດ່ານສາກົນສິນຄ້າ ທ່າບົກ-ທ່ານາແລ້ງ

ເມື່ອວັນທີ 24 ກຸມພາ 2024 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ  ໄດ້ເຄື່ອນໄຫວເຮັດວຽກຢູ່ດ່ານສາກົນສິນຄ້າທ່າບົກ-ທ່ານາແລ້ງ, ນະຄອນຫລວງວຽງຈັນ, ມີທ່ານລັດຖະມົນ ຕີກະຊວງອຸດສາຫະກຳ ແລະການຄ້າ, ບັນດາທ່ານຮອງລັດຖະມົນຕີ, ຜູ້ຕາງໜ້າຂະແໜງການຂັ້ນສູນກາງ, ນະຄອນຫລວງວຽງຈັນ ແລະ ພາກສ່ວນທີ່ກ່ຽວຂ້ອງໃນການຄຸ້ມຄອງ, ອຳນວຍຄວາມສະດວກ ແລະບໍລິການຂົນສົ່ງສິນຄ້າຜ່ານດ່ານສາກົນສິນຄ້າທ່າບົກ-ທ່ານາແລ້ງ, ເສັ້ນທາງລົດໄຟ ລາວ-ຈີນ ແລະ ລົດໄຟລາວ-ໄທ ເຂົ້າຮ່ວມ.

ຈຸດປະສົງ, ການລົງເຄື່ອນໄຫວຄັ້ງນີ້, ກໍເພື່ອເປັນການຕິດຕາມກວດກາສະພາບຄວາມເປັນຈິງກ່ຽວກັບການບໍລິການ ແລະອຳນວຍຄວາມສະດວກໃນການຂົນສົ່ງສິນຄ້າ ຜ່ານດ່ານສາກົນສິນຄ້າທ່າບົກ-ທ່ານາແລ້ງ ເປັນຕົ້ນ ການແຈ້ງພາສີ, ການກວດກາສິນຄ້າ, ການຄ່ຽນຖ່າຍສິນຄ້າ, ລະບົບ ແລະ ເຄື່ອງມືທີ່ນຳໃຊ້, ການຈັດພະນັກງານຮັບຜິດຊອບວຽກງານດ້ານຕ່າງໆ, ລວມທັງ ຂອດຂັ້ນຕ່າງໆທີ່ຕິດພັນການບໍລິການຢູ່ເຂດດັ່ງກ່າວ ໂດຍສະເພາະ ການຂົນສົ່ງສິນຄ້າ ຜ່ານເສັ້ນທາງລົດໄຟ ລາວ-ຈີນ ແລະ ລາວ-ໄທ. ພ້ອມທັງຮັບຟັງບັນດາຂໍ້ສະເໜີ ທີ່ຍັງຄົງຄ້າງກໍຄືສິ່ງທີ່ຍັງເປັນອຸປະສັກອຸດຕັນຕ່າງໆທີ່ຕິດພັນ ທັງເພື່ອເປັນຂໍ້ມູນ ສະເໜີ ແລະ ຊີ້ນຳ ໃຫ້ຂະແໜງການ ແລະ ພາກສ່ວນກ່ຽວຂ້ອງ ນຳໄປແກ້ໄຂຈັດຕັ້ງປະຕິບັດແນໃສ່ເຮັດໃຫ້ການບໍລິການຂົນສົ່ງສິນຄ້າ ຜ່ານດ່ານດັ່ງກ່າວ ມີປະສິດທິພາບ, ມີຄວາມສະດວກວ່ອງໄວ, ໂລ່ງລ່ຽນ, ໂປ່ງໃສ, ຮັບປະກັນຄວາມປອດໄພ ແລະ ຫລຸດຜ່ອນຕົ້ນທຶນການຂົນສົ່ງ, ທັງສາມາດດຶງດູດການໃຊ້ບໍລິການ ໃຫ້ຫລາຍຂຶ້ນກວ່າເກົ່າ.

ໃນໂອກາດນີ້, ຄະນະຄຸ້ມຄອງ ແລະ ພັດທະນາດ່ານສາກົນສິນຄ້າ ທ່າບົກ-ທ່ານາແລ້ງ ໄດ້ລາຍງານໃຫ້ຊາບ ກ່ຽວກັບສະພາບລວມຂອງດ່ານ, ບັນດາກິດຈະກຳຢູ່ໃນທ່າບົກ ກໍຄື ສະພາບການດຳເນີນ ແລະ ບໍລິການວຽກງານແຕ່ລະດ້ານ ເຊັ່ນ: ລົດຂົນສົ່ງຜ່ານທ່າບົກ, ລົດຂົນສົ່ງສະຫລັບຫົວ, ລົດຂົນສົ່ງສິນຄ້າລົງສາງ ຫລື ຄ່ຽນຖ່າຍ, ລົດຂົນສົ່ງຍົກຕູ້ຂຶ້ນລົງ, ລວມທັງ ຂັ້ນຕອນ ແລະ ວິທີການ ທາງດ້ານການເສຍພາສີ, ອັດຕາຄ່າບໍລິການຕ່າງໆ, ຕະຫລອດຮອດ ການນຳສະເໜີບາງວຽກງານ ທີ່ຍັງຄົງຄ້າງ, ວຽກທີ່ຍັງບໍ່ທັນເປັນເອກະພາບ ເຊິ່ງຈະຕ້ອງໄດ້ພ້ອມກັນສືບຕໍ່ປຶກສາຫາລືແກ້ໄຂ. ນອກນັ້ນ, ຍັງໄດ້ຮັບຟັງການນຳສະເໜີຂໍ້ມູນ ຈາກຜູ້ປະກອບການ ບໍລິການທາງດ້ານເອກະສານນຳເຂົ້າ ແລະສົ່ງອອກສິນຄ້າ; ການລາຍງານຈາກເຈົ້າໜ້າທີ່ພາສີປະຈຳດ່ານ, ຜູ້ຕາງໜ້າບໍລິສັດ ລົດໄຟລາວ-ຈີນ ທັງຝ່າຍລາວ ແລະ ຈີນ ໂດຍສະເພາະການເຊື່ອມຕໍ່ການຂົນສົ່ງ ລະຫວ່າງ ສະຖານີລົດໄຟວຽງຈັນໃຕ້ກັບຈຸດຄ່ຽນຖ່າຍສິນຄ້າດ່ານສາກົນສິນຄ້າທ່າບົກ-ທ່ານາແລ້ງ.

ໂອກາດດຽວກັນ, ທ່ານນາຍົກລັດຖະມົນຕີ ກໍໄດ້ມີຄຳເຫັນເຈາະຈີ້ມຕື່ມບາງດ້ານ ເພື່ອສະເໜີພາກ ສ່ວນກ່ຽວຂ້ອງໃຫ້ຄວາມກະຈ່າງແຈ້ງ ຕໍ່ບັນຫາທີ່ມີຄວາມສົນໃຈ ແລະ ຕັ້ງຂຶ້ນ, ພ້ອມທັງຍົກໃຫ້ເຫັນເຫດ ຜົນ ແລະ ຄວາມຈຳເປັນ ໃນການເກັບຄ່າບໍລິການຕ່າງໆ ດັ່ງທີ່ໄດ້ກຳນົດໄວ້ໃນນະໂຍບາຍ ກໍຄືນິຕິກຳທີ່ກ່ຽວຂ້ອງ; ເຫດຜົນ ໃນການຈັດວາງເຈົ້າໜ້າທີ່ກ່ຽວຂ້ອງ ຮັບຜິດຊອບວຽກງານດ້ານຕ່າງໆ ຢູ່ແຕ່ລະເຂດ; ຄຽງຄູ່ກັນນັ້ນ, ກໍໄດ້ເນັ້ນໜັກໃຫ້ພາກສ່ວນກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ເອົາໃຈໃສ່ກວດ ກາລົດຂົນສົ່ງສິນຄ້າຜ່ານດ່ານ ຢ່າງຄົບຖ້ວນ, ເປັນມາດຕະຖານດຽວທີ່ເອກະພາບ(ບໍ່ເລືອກປະຕິບັດ), ປັບ ປຸງວິທີການກວດໃຫ້ສອດຄ່ອງກວ່າເກົ່າ ບົນພື້ນຖານນໍາໃຊ້ເຄື່ອງມືທີ່ທັນສະໄໝ. ໃນຕໍ່ໜ້າຈະໄດ້ມອບໝາຍ ແລະ ແຕ່ງຕັ້ງຄະນະຮັບຜິດຊອບ ເພື່ອແກ້ໄຂບັນຫາທີ່ຍັງຄົງຄ້າງ ໃນການຂົນສົ່ງສິນຄ້າ ຜ່ານເສັ້ນທາງລົດໄຟ ລາວ-ຈີນ ທີ່ເຊື່ອມຕໍ່ລະຫວ່າງສະຖານີລົດໄຟວຽງຈັນໃຕ້ ກັບດ່ານສາກົນສິນຄ້າທ່າບົກ-ທ່ານາແລ້ງ, ທັງຊອກຫາສາເຫດ ແລະ ຄົ້ນຄວ້າວິທີແກ້ໄຂບັນຫາທີ່ຕິດພັນກັບຄ່າບໍລິການຂົນສົ່ງໃນລະດັບທີ່ສົມເຫດສົມຜົນ, ສາມາດດຶງດູດການໃຊ້ບໍລິການ ຜ່ານເສັ້ນທາງລົດໄຟ ໃຫ້ຫລາຍຂຶ້ນ ແລະມີປະສິດທິຜົນ.
ຂ່າວ-ພາບ: ກົມປະຊາສຳພັນ ຫສນຍ.

• 26/02/2024