ດ່ານພາສີສາກົນນາເພົ້າ ເກັບລາຍຮັບໄດ້ 160,8 ຕື້ກີບ

ໃນປີ 2023 ດ່ານພາສີສາກົນນາເພົ້າ ໄດ້ຮັບການມອບໝາຍເກັບລາຍຮັບເຂົ້າງົບປະມານທັງໝົດ 162,4 ຕື້ກີບ, ຜ່ານການຈັດຕັ້ງປະຕິບັດສາມາດຈັດເກັບຮັບໄດ້ທັງໝົດ 160,8 ຕື້ກີບ ເທົ່າກັບ 99,06% ຂອງແຜນການປີ, ທຽບໃສ່ປີ 2022 ການເກັບລາຍຮັບເພີ່ມຂຶ້ນ 66,1 ຕື້ກີບ ຫລືເທົ່າກັບ 69,82%, ການເກັບລາຍຮັບສ່ວນຫລາຍແມ່ນໄດ້ຈາກຄ່າທຳນຽມຕ່າງໆ, ນໍ້າມັນເຊື້ອໄຟ, ສິນຄ້າຕາມສັນຍາອາຊຽນ, ຄ່າສັກພິເສດປະເພດແຮ່ທາດຕ່າງໆ (ປະເພດໄມ້ແປຮູບ, ອຸປະກອນກໍ່ສ້າງ, ອຸປະກອນໄຟຟ້າ ແລະອື່ນໆ).

ທ່ານ ສຸພັດ ສຸແສງໄທ ຫົວໜ້າດ່ານພາສີສາກົນນາເພົ້າ ແຂວງຄຳມ່ວນ ໄດ້ໃຫ້ຮູ້ໃນວັນທີ 21 ກຸມພາ 2024 ຜ່ານມານີ້ວ່າ: ສາເຫດທີ່ພາໃຫ້ການຈັດເກັບລາຍຮັບ ບໍ່ບັນລຸຕາມແຜນແມ່ນມີຫລາຍປັດໄຈເປັນຕົ້ນແຜນການຈັດເກັບລາຍຮັບເພີ່ມຂຶ້ນສູງຖ້າທຽບໃສ່ປີທີ່ຜ່ານມາ, ການນໍາເຂົ້າສິນຄ້າຈໍານວນໜຶ່ງແມ່ນນຳເຂົ້າຕາມຂອບຂອງອາຊຽນ ເຊິ່ງໄດ້ຮັບບຸລິມະສິດໃນການຍົກເວັ້ນ ແລະຫລຸດ ຜ່ອນອັດຕາພາສີນຳເຂົ້າ, ການນຳເຂົ້າສິນຄ້າຕາມໂຄງການການລົງທຶນກໍໄດ້ຮັບການຍົກເວັ້ນອາກອນມູນຄ່າເພີ່ມຕາມກົດໝາຍອາກອນ ແລະກົດໝາຍສົ່ງເສີມການລົງທຶນ.

ໃນປີ 2024 ດ່ານພາສີສາກົນນາເພົ້າແມ່ນໄດ້ຮັບໂຕເລກມອບໝາຍຈັດເກັບລາຍຮັບທັງໝົດ 305 ຕື້ກີບ ທຽບໃສ່ປີ 2023 ເພີ່ມຂຶ້ນ 142,6 ຕື້ກີບ ຫລື ເພີ່ມຂຶ້ນ 87,80% ເຊິ່ງເປັນຕົວເລກທີ່ເພີ່ມຂຶ້ນສູງພໍສົມຄວນ. ສະນັ້ນ ເພື່ອເຮັດໃຫ້ຕົວເລກລາຍຮັບປະຕິບັດ ໄດ້ຕາມແຜນການທີ່ໄດ້ວາງໄວ້ ດ່ານພາສີສາກົນນາເພົ້າຈຶ່ງໄດ້ກຳນົດມາດຕະການຈຳນວນໜຶ່ງ ເປັນວຽກງານຈຸດສຸມໃນຕໍ່ໜ້າ ເປັນຕົ້ນ ຈັດວາງໜ້າວຽກແບ່ງຄວາມຮັບຜິດຊອບ ໃຫ້ພະນັກງານໃນໜ້າວຽກແຕ່ລະບ່ອນໃຫ້ແທດເໝາະກັບຄວາມຮູ້, ຄວາມສາມາດຂອງແຕ່ລະຄົນ, ເພີ່ມທະວີການປະຕິບັດໜ້າທີ່ວຽກງານວິຊາສະເພາະໃຫ້ເຂັ້ມງວດຕາມກົດໝາຍພາສີ ແລະລະບຽບການອື່ນໆທີ່ກ່ຽວຂ້ອງ, ສືບຕໍ່ປະຕິບັດຄໍາສັ່ງເລກທີ 12/ນຍ ວ່າດ້ວຍການອຳນວຍຄວາມສະດວກໃຫ້ແກ່ການນຳເຂົ້າ-ສົ່ງອອກ, ເພີ່ມທະວີວຽກງານປະສານສົມທົບກັບອໍານາດການປົກຄອງ ແລະພາກສ່ວນຂະແໜງການທີ່ກ່ຽວຂ້ອງເພື່ອສ້າງສິ່ງອຳນວຍຄວາມສະ ດວກໃນການຈັດຕັ້ງປະຕິບັດ.

ໂອກາດນີ້, ທ່ານ ສຸພັດ ສຸແສງໄທ ໄດ້ສະເໜີມາຍັງການປົກຄອງຂັ້ນເທິງ ແລະພາກສ່ວນທີ່ກ່ຽວຂ້ອງຊ່ວຍຄົ້ນຄວ້າແກ້ໄຂບັນຫາລະບົບສັນຍານອິນເຕີເນັດ, ຮຽກຮ້ອງພະນັກງານພາຍໃນດ່ານ ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະທີ່ການຈັດຕັ້ງຂັ້ນເທິງມອບໜາຍໃຫ້ສຳເລັດຕາມເປົ້າໝາຍ, ເອົາໃຈໃສ່ເພີ່ມທະວີທາງດ້ານຂອດການບໍລິການໃຫ້ວ່ອງໄວ, ຫລີກລ່ຽງການບໍລິການແບບຫລາຍຂັ້ນຫລາຍຂອດ, ຮັບປະກັນບົນພື້ນຖານໃຫ້ຖືກຕ້ອງສອດຄ່ອງຕາມລະບຽບກົດໝາຍຫລີກລ່ຽງຫາງສຽງ ແລະປະກົດການຫຍໍ້ທໍ້ທີ່ເປັນສາຍເຫດກົດໜ່ວງຖ່ວງດຶງຜູ້ປະກອບການແນໃສ່ເຮັດໃຫ້ການຈັດເກັບລາຍຮັບປີນີ້ໃຫ້ບັນລຸຕາມແຜນ ແລະລື່ນແຜນການທີ່ວາງໄວ້.

ແຫລ່ງຂ່າວຈາກ ແຂວງຄຳມ່ວນ

แชร์