ເລັ່ງຫຼາຍໜ້າວຽກກະກຽມກອງປະຊຸມຮ່ວມມືເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ

ເພື່ອກະກຽມຄວາມພ້ອມໃສ່ກອງປະຊຸມຮ່ວມມືເຂດສາມຫຼ່ຽມພັດທະນາ ກຳປູເຈຍ- ລາວ- ຫວຽດ ນາມ (CLV) ຄັ້ງທີ 13 ທີ່ແຂວງອັດຕະປືເປັນເຈົ້າພາບ ແລະ ໄດ້ຈະໄຂຂຶ້ນໃນມໍ່ໆນີ້ ອພບຕ ເມືອງສາມັກຄີໄຊ ເລັ່ງມີຫຼາຍວຽກໄດ້ຮັບຜົນສຳເລັດ ແລະຍັງບາງວຽກກຳລັງເລັ່ງຈັດຕັ້ງປະຕິບັດຢູ່.

ທ່ານ ສັກປະເສີດ ໄຊຍັນທອນ ຮອງປະທານອົງການພັດທະນາ ແລະບໍລິຫານຕົວເມືອງ (ອພບຕ) ເມືອງສາມັກຄີໄຊ ແຂວງອັດຕະປື ໄດ້ໃຫ້ສຳພາດຕໍ່ນັກຂ່າວຂອງແຂວງເມື່ອວັນທີ 21 ກຸມພາ 2024 ໃຫ້ຮູ້ວ່າ: ເພື່ອຕ້ອນຮັບກອງປະຊຸມຄະນະກຳມະການປະສານງານຮ່ວມເຂດສາມຫຼ່ຽມພັດທະນາ (CLV) ຄັ້ງທີ 13 ໃນລະຫວ່າງວັນທີ 26 ກຸມພາ-1 ມີນາ 2024 ເຊິ່ງແຂວງອັດຕະປື ກໍ່ເປັນແຂວງໜຶ່ງທີ່ຕັ້ງຢູ່ໃຈກາງຂອງ 13 ແຂວງ ໃນອົງປະກອບເຂດສາມຫຼ່ຽມພັດທະນາ ແລະ ເມືອງສາມັກຄີໄຊ ກໍ່ແມ່ນເມືອງຕັ້ງຢູ່ໃນເທດສະບານຂອງແຂວງ ແລະ ມີຄວາມຈຳເປັນຢ່າງຍິ່ງກ່ອນຈະໃຫ້ແຂວງມີໂສມໝ້າໃໝ່ ເຊິ່ງກ່ອນໜ້ານີ້ການຈັດຕັ້ງປະຕິບັດບັນດາໜ້າວຽກຂອງຄະນະ ອພບຕ ພວກເຮົາໄດ້ສົມທົບກັບອຳນາດການປົກຄອງຂັ້ນເມືອງ, ຮາກຖານບ້ານ ແລະ ພໍ່ແມ່ປະຊາຊົນບັນດາເຜົ່າ ພ້ອມກັນຈັດຕັ້ງປະຕິບັດ ເຊິ່ງແຕ່ລະໜ້າວຽກທີ່ໄດ້ຖືກມອບໝາຍ ແລະ ໄດ້ຮັບງົບປະມານຈາກແຂວງຈຳນວນໜຶ່ງນັ້ນແມ່ນມີຫຼາຍວຽກໄດ້ຮັບຜົນສຳເລັດ ແລະ ຍັງບາງວຽກກຳລັງເລັ່ງຈັດຕັ້ງປະຕິບັດຢູ່ ເປັນຕົ້ນ ໄດ້ສຳເລັດ ວຽກອະນາໄມຮ່ອງນໍ້າເສຍແມ່ເຂດບ້ານເຊກອງ ສຳເລັດ100%, ວຽກຂະບວນອະນາໄມ ແມ່ນໄດ້ອອກແຈ້ງການອະນາໄມຜ່ານສື່ຕ່າງໆ ແລະ ໂຄສະນາແຈ້ງການເຄື່ອນທີ່ ກ່ຽວກັບການຖາກຖາງດິນເປົ່າຫວ່າງ, ອະນາໄມຂອບເຂດຄວາມຮັບຜິດຊອບສໍານັກງານຫ້ອງການ ແລະ ບ້ານເຮືອນພໍ່ແມ່ປະຊາຊົນໃຫ້ມີຄວາມສະອາດຈົບງາມ, ວຽກປະດັບປະດາ ໄດ້ກະກຽມລົງປັກ-ກູ້ທຸງ 3 ຊາດ: ລາວ, ຫວຽດນາມ, ກຳປູເຈຍ ແລະທຸງທິວ, ສຳເລັດວຽກໂຄງການສ້ອມແປງປ້າຍ LED, ຕິດຮູບພາບ, ຕິດຕັ້ງໄຟເຍືອງທາງໃສ່ປະຕູໂຂງ ( ຈຸດຫຼັກ 10 ແລະ ຈຸດນາພອກ ), ສ້ອມແປງລະບົບນໍ້າພຸ ແລະຍ້າຍຕູ້ຄວບຄຸມປ້າຍ LED ຢູ່ສວນສາທາລະນະປະຕິບັດສຳເລັດ100%, ວຽກໂຄງການສ້ອມແປງ ໄດ້ຕິດຕັ້ງປ້າຍຮູບດອກຈຳປາ, ປ້າຍທຸງຊາດ, ທຸງພັກຕິດເສົາໄຟດອນກາງທາງຕາມເສັ້ນທາງເທດສະບານແຂວງ ປະຕິບັດໄດ້ 100%, ນອກຈາກບັນດາໜ້າວຽກທີ່ອະນຸກຳມະການມອບໝາຍໃຫ້ ອພບຕ ເຮົາໄດ້ກະກຽມຄວາມພ້ອມໃນການເປັນເຈົ້າພາບທີ່ດີເພື່ຶອສ້າງໃຫ້ແຂວງມີໂສມໜ້າໃໜ່ຂຶ້ນຕື່ມ ເຊັ່ນ: ວຽກບຳລຸງຮັກສາ ແລະ ສ້ອມແປງໄຟເຍືອງທາງໃນເສັ້ນທາງເທດສະບານແຂວງຈັດຕັ້ງປະຕິບັດໄດ້ 80%, ສຳເລັດວຽກຕິດຕັ້ງໄຟອຳນາດ ແລະກ້ອງວົງຈອນທັງ 4 ຈຸດ ພາບໃນເທດສະບານແຂວງ 100%, ວຽກງານກວດກາຄວາມບໍ່ເປັນລະບຽບຮຽບຮ້ອຍໃນຕົວເມືອງເປັນຕົ້ນແມ່ນຕໍ່ເທີບ-ຕໍ່ເງີບ, ກອງແຮ່-ກອງຊາຍທີ່ລະເມີດຕໍ່ລະບຽບຜັງເມືອງ, ວຽກບັນຫາສັດລ້ຽງທີ່ປ່ອຍຊະຊາຍໃນຕົວເມືອງ ຈະໄດ້ລົງຈັບພ້ອມສ້າງບົດບັນທຶກສຶກສາອົບຮົມແກ້ໄຂກັບເຈົ້າຂອງສັດລ້ຽງ, ວຽກຄຸ້ມຄອງປ້າຍໂຄສະນາ ໄດ້ລົງກວດກາຄືນ ແລະຮື້ຖອນປ້າຍທີ່ມີຄວາມເກົ່າແກ່ບໍ່ຈົບງາມໃຫ້ສໍາເລັດ, ວຽກຄຸ້ມຄອງປົກປັກຮັກສາດອກໄມ້ປະດັບຕົວເມືອງ ໄດ້ສຳເລັດການຕັດສາງ ແລະ ປູກທົດແທນຕົ້ນໄມ້ທີ່ຕາຍໃນບາງຈຸດ, ວຽກການບໍລິການເກັບມ້ຽນຂີ້ເຫຍື່ອໄດ້ຊຸກຍູ້ບໍລິສັດຜູ້ສຳປະທານເພີ່ມພາຫານະ ແລະເພີ່ມຈຳນວນຖ້ຽວລົດເພື່ອຮັບປະກັນບໍ່ໃຫ້ມີຂີ້ເຫຍື່ອຕົກຄ້າງໃນແຕ່ລະບ້ານນອກຈາກນີ້ກໍ່ຍັງມີວຽກງານປິ່ນອ້ອມອື່ນໆແມ່ນໄດ້ເອົາໃຈໃສ່ຢ່າງຕໍ່ເນື່ອງ.

ທ່ານ ສັກປະເສີດ ໄຊຍັນທອນ ຮອງປະທານອົງການພັດທະນາ ແລະບໍລິຫານຕົວເມືອງ (ອພບຕ) ເມືອງສາມັກຄີໄຊ ເພື່ອກະກຽມຄວາມພ້ອມໃນການເປັນເຈົ້າພາບທີ່ດີ ຕ້ອນຮັບກອງປະຊຸມ CLV ຂໍຮ້ອງເຖິງພໍ່ແມ່ປະຊາຊົນທົ່ວສັງຄົມໃຫ້ມີສ່ວນຮ່ວມໃນການຮັກສາອະນາໄມໜ້າບ້ານເຮືອນຕາມຂອບອະນາໄມຖາກຖາງດິນເປົ່າຫວ່າງ, ບໍາບັດນໍ້າເປື້ອນນໍ້າເສຍທີ່ເປັນພິດຕໍ່ສັງຄົມຢູ່ໃນເຂດຄວາມຮັບຊອບຂອງຕົນເອງພ້ອມກັນດັດສ້າງສິ່ງແວດລ້ອມ ແລະ ຕົບແຕ່ງບ້ານເຮືອນ, ສຳນັກງານຫ້ອງການໃຫ້ມີຄວາມສວຍງາມດີຂຶ້ນກວ່າເກົ່າ.
ໂດຍ: ມັດສາ

แชร์