ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ພາຍຫລັງທີ່ທ່ານເຈົ້າແຂວງຫລວງນໍ້າທາ ຕົກລົງຮັບຮອງເອົາ ນົກຂວາ ເປັນສັນຍາລັກຂອງແຂວງຢ່າງເປັນທາງການ ຕາມຂໍ້ຕົກລົງ ເລກທີ 45/ຈຂ ລົງວັນທີ 9 ມັງກອນ 2024 ວ່າດ້ວຍການຮັບຮອງເອົາສັດປະເພດ ນົກຂວາ ເປັນສັດປະຈໍາແຂວງຫລວງນໍ້າທາ ແລະໄດ້ມອບໝາຍໃຫ້ພະແນກກະສິກໍາ ແລະ ປ່າໄມ້ແຂວງຮ່ວມກັບພະແນກຖະແຫລ່ງຂ່າວ, ວັດທະນະທໍາ ແລະທ່ອງທ່ຽວແຂວງ ອອກລະບຽບຄຸ້ມຄອງ, ການຂະຫຍາຍພັນ, ການອະນຸລັກປົກປັກຮັກສາ ແລະວາງມາດຕະການຢ່າງເຂັ້ມງວດຕໍ່ຜູ້ລະເມີດທໍາລາຍນົກຂວາ.

 

ທ່ານ ພິມແກ້ວ ທຳລະສິນ ຫົວໜ້າພະແນກກະສິກຳ ແລະປ່າໄມ້ແຂວງ ໄດ້ໃຫ້ສຳພາດຕໍ່ສື່ມວນຊົນໃນວັນທີ 21 ກຸມພາ 2024 ນີ້ວ່າ: ນົກຂວາ ເປັນນົກປະເພດທີ່ດໍາລົງຊີວິດ, ອາໄສຢູ່ຕາມທໍາມະຊາດ, ທັງຢູ່ໃນເຂດປ່າໄມ້ດົງດິບ, ປ່າສະສົມ, ປ່າໄມ້ປ່ອງ ແລະ ທົ່ງຫຍ້າ, ນັບແຕ່ປີ 2020-2022 ປະຊາກອນຂອງນົກຂວາແມ່ນມີຈໍານວນເພີ່ມຂຶ້ນ. ມາໃນປີ 2023 ກອງກວດກາປ່າໄມ້ແຂວງ, ກອງຄຸ້ມຄອງປ່າສະຫງວນແຫ່ງຊາດ, ຫ້ອງການກະສິກຳ ແລະ ປ່າໄມ້ 5 ເມືອງ ພ້ອມດ້ວຍທີມງານໄດ້ລົງກວດກາລາດຕະເວນຕາມຈຸດຫລໍ່ແຫລມ, ຕາມເສັ້ນທາງ, ຕະຫລາດ ແລະຮ້ານອາຫານຕ່າງໆສາມາດຍືດໄດ້ສັດປ່າຈາກຜູ້ບຸກລຸກລ່າສັດປາ ແລະໄດ້ຈັດພິທີທໍາລາຍ. ນອກນັ້ນ, ກໍໄດ້ຕິດປ້າຍໂຄສະນາ ຫ້າມຊື້-ຂາຍສັດປ່າ ຕາມຕະຫລາດ ແລະຖະໜົນຫົນທາງ, ພ້ອມທັງໄດ້ອອກແຈ້ງການຂອງພະແນກກະສິກຳ ແລະປ່າໄມ້ ຫ້າມການຄ້າຂາຍສັດປ່າ, ຊິ້ນສ່ວນ ແລະຜະລິດຕະພັນສັດປ່າປະເພດຫວງຫ້າມເພື່ອປູກຈິດສຳນຶກ ໃຫ້ແກ່ປະຊາຊົນພາຍໃນແຂວງຫລວງນໍ້າທາຊ່ວຍກັນປົກປັກຮັກສາສັດປ່າໃຫ້ມີຄວາມຍືນຍົງ ແລະໄດ້ເພີ່ມຄວາມເອົາໃຈໃສ່ຢ່າງເຂັ້ມງວດໃນການຄຸ້ມຄອງສັດປ່າ ໂດຍສະເພາະແມ່ນນົກຂວາ, ເດັດຂາດລຸດຜ່ອນການ ຊື້-ຂາຍນົກຂວາ ຕາມທ້ອງຕະຫລາດ, ຮ້ານອາຫານ, ຕາມເສັ້ນທາງ ແລະ ຈຸດຫຼລໍ່ແຫລມຕ່າງໆ, ພ້ອມທັງຫລຸດຜ່ອນການລ່າໃຫ້ລຸດໜ້ອຍຖອຍລົງເທື່ອລະກ້າວ ໂດຍການຍົກລະດັບການກວດກາລາດຕະເວນ ແລະ ບັງຄັບໃຊ້ລະບຽບກົດໝາຍໃຫ້ເຂັ້ມງວດກວ່າເກົ່າ, ພ້ອມທັງຖືເອົາການໂຄສະນາເຜີຍແຜ່ຄວາມໝາຍຄວາມສໍາຄັນຂອງສັດປ່າ ແລະນົກຂວາ ໃຫ້ປະຊາຊົນພານໃຍແຂວງຫລວງນໍ້າທາ ຮັບຊາບຢ່າງກວ້າງຂວາງ.

ນອກນັ້ນ, ກໍໄດ້ມີການຕິດຕາມປະເມີນປະຊາກອນ ນົກຂວາ ເປັນໄລຍະໄລຍະເພື່ອຮັບປະກັນບໍ່ໃຫ້ນົກຂວາສູນພັນຈາກແຂວງຫລວງນໍ້າທາ ແລະເພື່ອຮັບປະກັນ ໃຫ້ມີນົກຂວາ ມີຄວາມຍືນຍົງ ໄດ້ມີແຜນສົ່ງເສີມໃຫ້ ມີການລ້ຽງ ຫລືເພາະພັນນົກຂວາໃນກໍລະນີຈຳເປັນສາມາດປ່ອຍຄືນສູ່ທຳມະຊາດ, ທັງສົ່ງເສີມການທ່ອງທ່ຽວຊົມນົກຂວາເຊິ່ງຂະບວນການທັງໝົດນີ້ແມ່ນຕ້ອງໄປຕາມກົດໝາຍວ່າດ້ວຍ ສັດປ່າ ແລະກົດໝາຍວ່າດ້ວຍການສົ່ງເສີມການລົງທຶນ.

ໂອກາດນີ້, ທ່ານ ພິມແກ້ວ ທຳລະສິນ ໄດ້ຮຽກຮ້ອງມາຍັງພາກສ່ວນຕ່າງໆພາຍໃນແຂວງຫລວງນໍ້າທາ, ແຂວງອື່ນໆໃນຂອບເຂດທົ່ວປະເທດ, ລວມທັງຊາວຕ່າງຊາດ ຈົ່ງໃຫ້ການຮ່ວມມືໃນການປົກປັກຮັກສາ, ບໍ່ຊື້-ບໍ່ຂາຍສັດປ່າ ໂດຍສະເພາະນົກຂວາ ແລະຮຽກຮ້ອງໃຫ້ ປະຊາຊົນບັນດາເຜົ່າ ຕະຫລອດຮອດພະນັກງານລັດຖະກອນ, ທະຫານ ແລະຕໍາຫລວດ ທຸກທົ່ວໜ້າ ຢຸດຕິການລ່າສັດປ່າ ເພື່ອໃຫ້ສັດຊະນິດດັ່ງກ່າວສາມາດແຜ່ຂະຫຍາຍປະຊາກອນໃຫ້ຫລາຍຂື້ນ ແລະນົກຂວາ ສັນຍາລັກຂອງແຂວງຫລວງນໍ້າທາ ໃຫ້ຍືນຍົງຢູ່ຄູ່ແຂວງຫລວງນໍ້າທາຕະຫລອດໄປ.
ຂ່າວ: ສົມພອນ ຂູນດາວົງ