ປະທານປະເທດ ແຫ່ງ ສປປ ລາວ ລົງຢ້ຽມຢາມກອງພັນ 609 ທະຫານແຂວງໄຊຍະບູລີ

ໃນວັນທີ 16 ກຸມພາທີ່ຜ່ານມາ, ທ່ານ ທອງລຸນ ສີສຸລິດ ປະທານປະເທດ ແຫ່ງສາທາ ລະນະລັດ ປາຊາທິປະໄຕ ປະຊາຊົນລາວ ພ້ອມດ້ວຍຄະນະໄດ້ລົງຢ້ຽມຢາມກອງພັນນ້ອຍປືນໃຫຍ່ໜ້າດິນ 609 ທະຫານແຂວງໄຊຍະບູລີ, ໂດຍການຕ້ອນຮັບຂອງ ທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ, ພົຈວ ກູດ ພົມມາ ຫົວໜ້າການທະຫານ ກອງບັນຊາການທະຫານແຂວງໄຊຍະບູລີ, ມີຄະນະນຳກອງບັນຊາການທະຫານແຂວງ, ຄະນະພັກ-ຄະນະບັນຊາກອງພັນ 609 ເຂົ້າຮ່ວມ.

ໂອກາດນີ້, ພັທ ຈັນທອງ ຈັນຟອງ ຫົວໜ້າການເມືອງກອງພັນນ້ອຍປືນໃຫຍ່ໜ້າດິນ 609 ທະຫານແຂວງໄຊຍະບູລີ ໄດ້ລາຍງານຫຍໍ້ທີ່ຕັ້ງ, ພາລະບົດບາດ, ສິດ, ໜ້າທີ່, ຄວາມຮັບ ຜິດຊອບ ແລະສະພາບລວມຂອງກົມກອງ, ຈາກນັ້ນທ່ານ ທອງລຸນ ສີສຸລິດ ພ້ອມຄະນະກໍໄດ້ລົງຢ້ຽມຢາມເບິ່ງພື້ນຖານການຜະລິດປູກຜັກໃນເຮືອນຮົ່ມຂອງກົມກອງ ແລະຢ້ຽມຢາມເບິ່ງດ້ານລະບຽບແບບແຜນໃນເຮືອນນອນຂອງກົມກອງນຳອີກ.

ໃນໂອກາດດຽວກັນ, ທ່ານປະທານປະເທດໄດ້ຍົກໃຫ້ເຫັນສະພາບເສດຖະກິດໄພເງິນເຟີ້, ສິນຄ້າລາຄາແພງ ແລະພ້ອມທັງໃຫ້ຄວາມຢ້ຽມຢາມຖາມຂ່າວເຖິງຊີວິດການເປັນຢູ່ຂອງພະນັກງານ-ນັກຮົບ ແລະ ການຈັດຕັ້ງເຄື່ອນໄຫວຂອງກົມກອງດ້ວຍຄວາມເປັນຫ່ວງເປັນໄຍ, ຄວາມຮັກແພງອັນອົບອຸ່ນ, ພ້ອມທັງຍ້ອງຍໍຊົມເຊີຍຕໍ່ຜົນງານທີ່ກົມກອງຍາດມາໄດ້ໃນໄລຍະຜ່ານມາ ແລະ ໃຫ້ທິດຊີ້ນຳຫຼາຍບັນຫາທີ່ສຳຄັນຕໍ່ຄະນະພັກ-ຄະນະບັນຊາ ກອງພັນ 609 ເປັນຕົ້ນໃຫ້ເອົາໃຈໃສ່ສືບຕໍ່ຂະຫຍາຍພື້ນຖານການຜະລິດປູກຝັງ-ລ້ຽງສັດຕາມທ່າແຮງຂອງກົມກອງ ເພື່ອສະໜອງພືດຜັກໃຫ້ທ້ອງຕະ ຫຼາດໃຫ້ຫຼາຍເພື່ອສ້າງລາຍຮັບເຂົ້າກົມກອງ.

ພ້ອມນັ້ນ, ທ່ານຍັງໄດ້ເນັ້ນຄະນະພັກ-ຄະນະບັນຊາ, ພະນັກງານ-ນັກຮົບໃຫ້ຮັກສາມູນເຊື້ອອັນດີງາມຂອງກອງທັບເປັນຕົ້ນແມ່ນມູນເຊື້ອພິລະອາດຫານບໍ່ຍອມຈຳນົນຕໍ່ສັດຕູ, ມູນເຊື້ອຄວາມສາມັກຄີປອງດອງລະຫວ່າງກອງທັບກັບປະຊາຊົນປຽບເໝືອນປາກັບນ້ຳທີ່ຕັດແຍກອອກຈາກກັນບໍ່ໄດ້, ເສີມຂະຫຍາຍບົດບາດການນຳພາຂອງຕົນຕໍ່ໜ້າທີ່ປ້ອງກັນຊາດ-ປ້ອງກັນຄວາມສະຫງົບ ປັບປຸງກໍ່ສ້າງກຳລັງແຮງສັງລວມຂອງກົມກອງໃຫ້ເຂັ້ມແຂງສືບຕໍ່ຄວາມສາມັກຄີປອງດອງກັບອຳນາດການປົກຄອງທ້ອງຖິ່ນໃຫ້ແໜ້ນແຟ້ນ ແລະພ້ອມກັນປົກປັກຮັກສາອຳນາດອະທິປະໄຕ ຂອບເຂດຮັບຜິດຊອບຂອງຕົນໃວ້ໃຫ້ໝັ້ນຄົງຕະຫຼອດໄປ.

แชร์