ປະທານ ບໍລິສັດພະນົມພອນ ກຣຸບຈົກທຶນ 70 ຕື້ກີບ ສ້າງສູນລວມສິນຄ້າຊຸບເປີສະຕໍ  ອໍານວຍຄວາມສະດວກໃຫ້ຜູ້ບໍລິໂພກ

ຖືເປັນຂ່າວດີ ສຳຫລັບພໍ່ແມ່ພີນ້ອງຊາວແຂວງຄໍາມ່ວນ ແລະ ປະຊົນລາວທົ່ວປະເທດ ທີ່ໄດ້ສໍາຜັດກັບ ສູນລວມສິນຄ້າຄົບວົງຈອນທີ່ມີຄຸນນະພາບມາດຖານສາກົນ. ປະຈຸບັນ ບໍລິສັດ ພະນົມພອນກຣຸບ ການຄ້າ ຈຳກັດ  ໄດ້ສ້າງ ຮ້ານພະນົມພອນ ຊຸບເປີສະຕໍ ຫລື ຕະຫລາດພະນົມພອນ ສະຕໍ ຕັ້ງຢູ່ ເສັ້ນທາງໄປ ພະທາດສີໂຄດຕະບອງ ບ້ານເລົ່າໂພຄໍາ ເມືອງທ່າແຂກ ແຂວງຄໍາມ່ວນ ໄດ້ມີການປັບປຸງ ສ້າງຕະຫຼາດທີ່ທັນສະໄໝ ແລະ ນຳສິນຄ້າທີ່ມີຄຸນນະພາບເຂົ້າມາຈຳໜ່າຍ ແລະ ໄດ້ພັດທະນາໃຫ້ເປັນສູນລວມສິນຄ້າ ທີ່ໃຫຍ່ທີ່ສຸດຂອງລາວ ທີ່ສຳຄັນ ໄດ້ເປີດໂອກາດໃຫ້ແກ່ພໍ່ແມ່ປະຊົນຊາວຄ້າຂາຍທັງຫຼາຍ ໄດ້ມາຈັບຈອງຫ້ອງຂາຍເຄື່ອງຟຣີ ໃນໄລຍະເວລາ 1 ປີທຳອິດ.

ທ່ານ ນາງ ພະນົມພອນ ຢ້ຽມພະບູ່  ປະທານບໍລິສັດ ພະນົມພອນກຣຸບ ການຄ້າ ຈໍາກັດ ໃຫ້ສຳພາດຕໍ່ສື່ມວນຊົນ ວ່າ:  ເພື່ອຄຽງຄູ່ກັບການພັດທະນາສ້າງສາປະເທດຊາດໃຫ້ມີຄວາມຈະເລີນຮຸ່ງເຮືອງ ຕະຫຼອດໄລຍະຜ່ານມາ ທາງບໍລິສັດ ມີຄວາມພະຍາຍາມເອົາໃຈໃສ່ໃນການກໍ່ສ້າງປັບປຸງ ແລະ ເປີດສະຖານທີ່ແຫ່ງນີ້ ເພື່ອເປັນບ່ອນບໍລິການໃຫ້ແກ່ພໍ່ແມ່ປະຊາຊົນຊາວແຂວງຄໍາມ່ວນ ກໍ່ຄືບັນດານັກທ່ອງທ່ຽວ ທີ່ເຂົ້າມາທ່ຽວທ່ຽວຊົມແຂວງຄຳມ່ວນ ເນື່ອງຈາກຢູ່ໃນທ່າມກາງທີ່ແຂວງຄໍາມ່ວນ ກໍາລັງຫ້າງຫາກະກຽມເປີດປີທ່ອງທ່ຽວລາວ 2024 ເຊິ່ງນອກຈາກຈະເປັນສະຖານທີ່ເປີດຂາຍສິນຄ້າ ແລະ ເປັນບ່ອນນໍາເອົາສິນຄ້າຫຼາກຫຼາຍມາວາງຂາຍແລ້ວ, ຍັງເປັນການປະກອບສ່ວນຊ່ວຍເຫຼືອທີ່ສໍາຄັນເຂົ້າໃນການສ້າງວຽກເຮັດງານທໍາແກ່ປະຊາຊົນ ແຂວງຄໍາມ່ວນໃນຫຼາຍຕໍາແໜ່ງງານ, ພ້ອມດຽວກັນນັ້ນຍັງເປັນການເປີດໂອກາດໃຫ້ພໍ່ແມ່ປະຊາຊົນຊາວຄ້າຂາຍ ເປັນສ່ວນໜຶ່ງໃນການຈໍາໜ່າຍ ແລະ ວາງຂາຍສິນຄ້າໃນຕະຫຼາດແຫ່ງນີ້ ໂດຍຈະປຶກສາຫາລືສົມທົບກັບຂະແໜງການທີ່ກ່ຽວຂ້ອງຂອງພາກລັດ ເພື່ອຊຸກຍູ້ສົ່ງເສີມຜະລິດຕະພັນພາຍໃນແຂວງ ກໍ່ຄື ປະເທດເຮົາ ແລະ ຈະສືບຕໍ່ພັດທະນາ ເຮັດໃຫ້ກິດຈະການດັ່ງກ່າວມີຄວາມຍືນຍົງ ແລະ ໃຫ້ບໍລິການປະຊາຊົນຕະຫລອດໄປ.

ບໍລິສັດ ພະນົມພອນ ຊຸບເປີສະຕໍ ຫລື ຕະຫຼາດພະນົມພອນ ສະຕໍ ມີທີ່ຕັ້ງຢູ່ ທິດໃຕ້ຂອງເທດສະບານແຂວງ, ຂຶ້ນກັບບ້ານເລົ່າໂພຄໍາ, ເມືອງທ່າແຂກ ແຂວງ ຄຳມ່ວນ. ເລີ່ມແຕ່ປີ 2014 ທີ່ບໍລິສັດໄດ້ສ້າງບົດວິພາກເສດຖະກິດ ແລະ ສະເໜີຂໍສໍາປະທານທີ່ດິນຂອງລັດ ເພື່ອລົງທຶນສ້າງຕະຫຼາດ ພາຍຫຼັງໄດ້ຮັບອະນຸມັດ ໃນປີ 2015-2017 ກໍ່ໄດ້ດໍາເນີນການກໍ່ສ້າງຈົນສຳເລັດ ແລະ ໃນປີ 2018 ຈຶ່ງໄດ້ເປີດບໍລິການຕະຫຼາດຢ່າງເປັນທາງການ. ໃນຊ່ວງໄລຍະທ້າຍປີ 2020 ຫາ ປີ 2022 ໄດ້ມີການລະບາດຂອງເຊື້ອພະຍາດໂຄວິດ 19 ເຮັດໃຫ້ກິດຈະການໄດ້ຢຸດເຊົາຊົ່ວຄາວ ແລະ ໄດ້ປະກອບສ່ວນໃຫ້ແກ່ລັດຖະບານໃຊ້ເປັນສະຖານກັກກັນ ແລະ ປິ່ນປົວຜູ້ຕິດເຊື້ອໂຄວິດ 19, ຈາກນັ້ນ ໃນທ້າຍປີ 2022 ຈິ່ງໄດ້ຂໍອະນຸຍາດລົງທຶນໃໝ່ ໂດຍປ່ຽນຈາກຕະຫຼາດທຳມະດາມາເປັນຮ້ານຊັບພະສິນຄ້າຂະໜາດໃຫຍ່ ຫລື ຊຸບເປີສະຕໍ ດ້ວຍມູນຄ່າການລົງທຶນເບື້ອງຕົ້ນ 65 ຕື້ກວ່າກີບ.

ຮ້ານຊັບພະສິນຄ້າແຫ່ງນີ້ ນອກຈາກຈະເປັນສະຖານທີ່ເປີດຂາຍສິນຄ້າ ແລະ ນໍາເອົາສິນຄ້າຫລາກຫລາຍມາວາງຂາຍແລ້ວ, ໃນເວລາອັນໃກ້ ຈະເປີດບໍລິການຮ້ານກາເຟອິນທະນິນ, ຮ້ານອາຫານ ແລະ ໂຮງແຮມຕື່ມອີກ ຊຶ່ງເປັນການປະກອບສ່ວນສໍາຄັນໃນການສ້າງວຽກເຮັດງານທໍາໃຫ້ແກ່ປະຊາຊົນໃນຊຸມຊົນ ກໍຄື ປະຊາຊົນພາຍໃນແຂວງຄໍາມ່ວນ ໄດ້ຫລາຍຕໍາແໜ່ງງານ, ທັງເປັນການຊຸກຍູ້ສົ່ງເສີມການຜະລິດເປັນສິນຄ້າພາຍໃນ ທີ່ເປັນຜະລິດຕະພັນຂອງລາວໃນຂອບເຂດທົ່ວປະເທດ ເຂົ້າມາວ່າງຂາຍໄດ້, ພ້ອມດຽວກັນນີ້ ຕະຫລາດພະນົມພອນ ຍັງມີຫ້ອງຫວ່າງໃຫ້ເຊົ່າ ຈຳນວນ 30 ກວ່າຫ້ອງ ແຕ່ລະຫ້ອງຈະມີຫ້ອງນໍ້າໃນໂຕ, ໃນປີທຳອິດ ຈະມີນະໂຍບາຍໃຫ້ພໍ່ຄ້າ-ແມ່ຄ້າສາມາດເຂົ້າມາຈັບຈອງ ແລະ ຂາຍສິນຄ້າ ໂດຍບໍ່ເສຍຄ່າເຊົ່າ, ພຽງແຕ່ເກັບຄ່ານໍ້າ ແລະ ຄ່າໄຟຟ້າເທົ່ານັ້ນ.

ໃຜທີ່ມີຄວາມສົນໃຈ ສາມາດຕິດຕໍ່ ພະນົມພອນ ຊຸບເປີສະຕໍ ໄດ້ທີ່ເບີ: 020 78969423

ອີເມວ: phanomphonesuperstore@gmail.com.

แชร์