ເປີດມູນນິທິພັດທະນາ ແຂວງໄຊສົມບູນ

ພິທີເປີດມູນນິທິພັດທະນາ ແຂວງໄຊສົມບູນ ຈັດຂຶ້ນໃນວັນທີ 15 ກຸມພາ 2024 ທີ່ຫ້ອງວ່າການແຂວງໂດຍມີ ພຣະອາຈານ ບຸນເສີຍ ເພົາພາສິດ ຄະນະກໍາມະການສູນກາງ ຮອງຫົວໜ້າກໍາມາທິການສາທາລະນຸປະການ ສູນກາງ ອົງການພຸດທະສາສະໜາສຳພັນແຫ່ງ ສປປ ລາວ ພ້ອມດ້ວຍຄະນະສົງຈາກວັດປ່າຄວາຍແດງ, ວັດໃໝ່ໂຊກຄໍາ ແລະ ທ່ານ ແດງ ປະທຸມທອງ ປະທານສະພາປະຊາຊົນແຂວງ, ທ່ານ ພົຕ ສິນທະວົງ ໄຊຍະກອນ ອະດີດຮອງລັດຖະມົນຕີກະຊວງປ້ອງກັນຄວາມສະຫງົບ, ທ່ານ ນາງ ອານິສາ ໄຊຍະກຸມມານ ປະທານມູນນິທິພັດທະນາ ແຂວງໄຊສົມບູນ ເຂົ້າຮ່ວມ.

ທ່ານ ນາງ ອານິສາ ໄຊຍະກຸມມານ ປະທານມູນນິທິພັດທະນາ ແຂວງໄຊສົມບູນ ໄດ້ກ່າວວ່າ: ຈຸດປະສົງ ແລະ ເປົ້າໝາຍຂອງການສ້າງ ມູນນິທິພັດທະນາແຂວງ ໃນຄັ້ງນີ້ ເພື່ອຈັດຕັ້ງເປັນອົງການຈັດຕັ້ງສັງຄົມໜຶ່ງ ທີ່ມີພາລະບົດບາດຊ່ວຍສັງຄົມ, ເພື່ອສາທາລະນະປະໂຫຍດ, ປະກອບສ່ວນສ້າງສາພັດທະນາແຂວງ ແລະ ລຶບລ້າງຄວາມທຸກຍາກ ດ້ວຍການລະດົມ, ຂົນຂວາຍທຶນຊັບສິນທັງພາຍໃນ ແລະຕ່າງປະເທດເຂົ້າມູນນິທິ ແລະ ນໍາໄປສົມທົບກັບອົງການປົກຄອງແຂວງ, ເມືອງ ແລະ ອົງການປົກຄອງບ້ານເພື່ອສຸມໃສ່ວຽກງານ 2 ເປົ້າໝາຍ ຄື: ວຽກງານສຶກສາທິການ ແລະກິລາ ແລະວຽກງານແຮງງານ ແລະສະຫວັດດີການສັງຄົມໃນນີ້, ວຽກງານສຶກສາທິການ ແລະກິລາ ໂດຍການສົ່ງເສີມການພັດທະນາການສຶກສາຂັ້ນພື້ນຖານໃຫ້ເດັກນ້ອຍຢູ່ແຂວງໄຊສົມບູນ, ປະກອບສ່ວນໃນການສ້າງ, ສ້ອມແປງ, ບູລະນະ ໂຮງຮຽນ ແລະ ສະພາບແວດລ້ອມຂອງໂຮງຮຽນ, ຈັດຫາອຸປະກອນການຮຽນ-ການສອນ, ກິລາ ແລະ ກິດຈະກໍາອື່ນໆ ທີ່ອໍານວຍ ພ້ອມທັງສ້າງເງື່ອນໄຂໃນການຍົກລະດັບ ແລະ ຄວາມຮູ້ຮອບຕົວໃຫ້ນັກຮຽນເປັນຢ່າງດີ. ສຳລັບວຽກງານແຮງງານ ແລະສະຫວັດດີການສັງຄົມໂດຍຊ່ວຍເຫລືອບັນເທົາທຸກໃຫ້ປະຊາຊົນໃນເວລາເກີດເຫດການທາງໄພທໍາມະຊາດ, ອຸທົກກະໄພ, ມະຫັນຕະໄພ ແລະ ຊ່ວຍເຫລືອປະຊາຊົນຜູ້ທຸກຍາກ. ນອກຈາກນີ້, ໃນຕໍ່ໜ້າຫາກວຽກງານດັ່ງກ່າວໄດ້ຮັບການພັດທະນາ, ມີການຂະຫຍາຍຕົວ ແລະມີຜົນສໍາເລັດສູງ ມູນນິທິຈະມີແຜນການສືບຕໍ່ຂະຫຍາຍດ້ານວຽກງານກະສິກໍາ ແລະ ປ່າໄມ້, ວຽກງານອຸດສາຫະກໍາ ແລະ ການຄ້າ, ວຽກງານໂຍທາທິການ ແລະຂົນສົ່ງ, ວຽກງານພະລັງງານ ແລະບໍ່ແຮ່, ວຽກງານສາທາລະນະສຸກ ແລະວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວຕື່ມອີກ.

ໂອກາດນີ້, ທ່ານ ແດງ ປະທຸມທອງ ໄດ້ສະແດງຄວາມຍິນດີ ແລະຊົມເຊີຍພ້ອມທັງສະແດງຄວາມຂອບໃຈເປັນຢ່າງສູງຕໍ່ຄະນະນໍາຂັ້ນສູນກາງ-ຄະນະນໍາໂຄງການຈິດອາສາ, ຄອບຄົວການນໍາຮ່ວມກັບນັກທຸລະກິດລາວທີ່ໄດ້ມາຢ້ຽມຢ້າມ ແລະເຮັດວຽກຢູ່ແຂວງໄຊສົມບູນໂດຍສະເພາະການເຂົ້າມາມີສ່ວນຮ່ວມໃນການແກ້ໄຂພັດທະນາຊົນນະບົດ ແລະແກ້ໄຂຄວາມທຸກຍາກໃຫ້ປະຊາຊົນໂດຍເຂົ້າມາລະດົມທຶນຈາກພາຍໃນ ແລະຕ່າງປະເທດມາຊ່ວຍເຫລືອແຂວງໄຊສົມບູນໃນແຕ່ລະໄລຍະເຮັດໃຫ້ປະຊາຊົນຜູ້ຖືກໄພພິບັດ ແລະຜູ້ທຸກຍາກໄດ້ຮັບການແກ້ໄຂດີຂຶ້ນໃນເທື່ອລະກ້າວ.

ໃນພິທີດັ່ງກ່າວຍັງມີການມອບເງິນໃຫ້ມູນນິທິພັດທະນາ ແຂວງໄຊສົມບູນ ໂດຍການມອບຂອງແຕ່ລະພາກສ່ວນເປັນຕົ້ນຈາກບັນດາພຣະສົງ, ບັນດາຄະນະນໍາ ແລະ ບັນດານັກທຸລະກິດລາວ ລວມມູນຄ່າທັງໝົດ 370 ລ້ານກວ່າກີບຕື່ມອີກ.

ຂ່າວ: ຕູດ ຄໍາພໍໃຈ

แชร์