ເປີດຖ້ຽວບິນ ສະຫວັນນະເຂດ - ບາງກອກ

ຕອນບ່າຍວັນທີ 15 ກຸມພາ 2024 ທີ່ສະຫວັນຣີສອດ ນະຄອນໄກສອນ ພົມວິຫານ ແຂວງສະຫວັນນະເຂດ. ລັດວິສາຫະກິດການບິນລາວ ໄດ້ຈັດພິທີຖະແຫຼງຂ່າວເປີດຖ້ຽວບິນຄືນໃໝ່ ເສັ້ນທາງ ສະຫວັນນະເຂດ-ບາງກອກ ລາຊະອານາຈັກໄທ, ເຂົ້າຮ່ວມພິທີມີທ່ານ ປອ. ແສນສັກ ສຸລິສັກ ຮອງເຈົ້າແຂວງສະຫວັນນະເຂດ, ທ່ານ ໂພສີສ້ອຍ ກຸທິລາດ ຫົວໜ້າພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວແຂວງ, ທ່ານ ສະເຫຼີມ ໄຕຍະລາດ ຮອງຜູ້ອໍານວຍການລັດວິສາຫະກິດການບິນລາວ, ມີທ່ານຮອງກົງສູນໃຫຍ່ແຫ່ງລາຊະອານາຈັກໄທ ປະຈໍາແຂວງສະຫວັນນະເຂດ, ບັນດາທ່ານຈາກພະແນກການອ້ອມຂ້າງແຂວງ, ນັກທຸລະກິດ, ເຈົ້າຂອງທຸລະກິດທ່ອງທ່ຽວ ພ້ອມດ້ວຍແຂກທີ່ຖືກເຊີນຈາກພາກສ່ວນຕ່າງໆເຂົ້າຮ່ວມ.

ໂອກາດນີ້ທ່ານ ສະເຫຼີມ ໄຕຍະລາດ ຮອງຜູ້ອໍານວຍການລັດວິສາຫະກິດການບິນລາວ ໄດ້ກ່າວຖະແຫຼງຕໍ່ພິທີຄັ້ງນີ້ວ່າ: ການເດີນທາງທ່ອງທ່ຽວໃນປັດຈຸບັນແມ່ນໄດ້ມີການພັດທະນາ ແລະ ຂະຫຍາຍຕົວ ຢ່າງກວ້າງຂວາງຢູ່ໃນໂລກ, ເຊິ່ງການທ່ອງທ່ຽວແມ່ນຕິດພັນກັບການຂະຫຍາຍຕົວຂອງການຂົນສົ່ງທາງອາກາດຊຶ່ງເປັນທາງເລືອກອັນດັບໜຶ່ງຂອງນັກທ່ອງທ່ຽວ. ດັ່ງນັ້ນ, ເພື່ອຮອງຮັບ ແລະອຳນວຍຄວາມສະດວກໃຫ້ແກ່ນັກທ່ອງທ່ຽວ, ນັກທຸລະກິດ ທີ່ຕ້ອງການເດີນທາງໄປບາງກອກ ແລະ ຜູ້ມີຈຸດປະສົງຢາກເຂົ້າມາເຮັດທຸລະກິດ ແລະມາທ່ອງທ່ຽວ ທີ່ສະຫັວນນະເຂດ. ດັ່ງນັ້ນຈຶ່ງໄດ້ຕົກລົງຈະເປີດຖ້ຽວບິນຄືນໃໝ່ເສັ້ນທາງບິນ ສະຫວັນນະເຂດ-ບາງກອກ-ສະຫວັນນະເຂດ.

ໂອກາດນີ້ ທ່ານ ປອ. ແສນສັກ ສຸລິສັກ ຮອງເຈົ້າແຂວງສະຫວັນນະເຂດ ໄດ້ມີຄໍາເຫັນວ່າ: ການເປີດຄືນຖ້ຽວບິນ ໃນປີ 2024 ນີ້ ຖືວ່າເປັນໂອກາດທີ່ເໝາະສົມ ເພື່ອຮອງຮັບນັກທ່ອງທ່ຽວທີ່ຈະເດີນທາງເຂົ້າມາທ່ອງທ່ຽວ ສປປ ລາວ ກໍຄືແຂວງສະຫວັນນະເຂດເຊິ່ງເປັນປີທ່ອງທ່ຽວລາວ 2024, ຜ່ານມາເສັ້ນບິນດັ່ງກ່າວນີ້ໄດ້ຢຸດບິນເປັນເວລາເກືອບ 4 ປີ ນັບຕັ້ງແຕ່ທ້າຍເດືອນມີນາ 2020 ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງພະຍາດ ໂຄວິດ 19, ດັ່ງນັ້ນທາງສາຍການບິນຈະຕ້ອງເຮັດວຽກໜັກໃນການກະຈາຍຂໍ້ມູນໃຫ້ບັນດາທຸກໆຕົວແທນຈໍາໜ່າຍທັງພາຍໃນ ແລະຕ່າງປະເທດ, ທັງຊ່ອງທາງອອນລາຍ ແລະຊ່ອງທາງອື່ນໆ ເຊິ່ງຕ້ອງມີຄວາມສະດວກ-ວ່ອງໄວ ຕອບໂຈດໃຫ້ທາງເລືອກແກ່ຜູ້ໂດຍສານສາມາດຊໍາລະຄ່າຊື້ປີ້ຍົນໄດ້ຢ່າງສະດວກ.

ໃນນີ້ລັດວິສາຫະກິດການບິນລາວໄດ້ມີແຜນເປີດຖ້ຽວບິນ ເລີ່ມບິນຕັ້ງແຕ່ ວັນທີ 15 ມິນາ ປີ 2024 ນີ້ ຈຳນວນ 3 ຖ້ຽວຕໍ່ອາທິດ ຄືວັນຈັນ, ວັນພຸດ ແລະ ວັນສຸກ ເປັນຕົ້ນໄປ, ໂດຍຈະບິນຂື້ນຈາກສະຫວັນນະເຂດ ໃນເວລາ 10 ໂມງ 40 ນາທີ ແລະຮອດບາງກອກ ເວລາ 12 ໂມງ 10 ນາທີ ແລະ ບິນກັບຈາກບາງກອກ ໃນເວລາ 13 ໂມງ 10 ນາທີ ມາຮອດ ສະຫວັນນະເຂດ ໃນເວລາ 14 ໂມງ 40 ນາທີ. ການບິນຈະໃຊ້ເວລາ 1 ຊົ່ວໂມງ 30 ນາທີ ໂດຍນໍາໃຊ້ເຮືອບິນ ATR-72 ແລະ ໃນອະນາຄົດຖ້າເຫັນວ່າມີຄວາມຕ້ອງການຂອງຕະຫຼາດສູງຂຶ້ນກໍຈະພິຈາລະນາເພີ່ມຖ້ຽວບິນຕື່ມອິກ.
ຂ່າວ-ພາບ: ອັກສອນສິນ ພົມມະຈັນ

แชร์