ທພລ ເປີດໜ່ວຍບໍລິການ ອີ່ໄລ

  ໂດຍຕອບສະໜອງຕາມຄວາມຮຽກຮ້ອງຕ້ອງການຂອງການພັດທະນາເສດຖະກິດສັງຄົມຂອງທ້ອງຖິ່ນກໍ່ຄືເພື່ອສ້າງເງື່ອນໄຂສະດວກ-ວ່ອງໄວ ໃຫ້ແກ່ປະ ຊາຊົນ, ພະນັກງານ, ທະຫານ, ຕຳຫຼວດ ແລະພໍ່ຄ້າຊາວຂາຍໃນທົ່ວເມືອງນາຊາຍທອງ; ທະນາຄານພັດທະນາລາວ (ທພລ) ຈິ່ງໄດ້ສ້າງຕັ້ງໜ່ວຍບໍລິການອີ່ໄລ ເມືອງນາຊາຍທອງ ນະຄອນຫຼວງວຽງຈັນຂຶ້ນ.

  ໜ່ວຍບໍລິການດັ່ງກ່າວໄດ້ເປີດບໍລິການປະຊາຊົນຢ່າງເປັນທາງການໃນວັນທີ 10 ເມສາ 2019 ທີ່ປ້ຳນ້ຳມັນເຊື້ອໄຟລາວບ້ານອີ່ໄລໂດຍການໃຫ້ກຽດເຂົ້າ ຮ່ວມຂອງ ທ່ານ ວຽງຄຳ ສີຫາໂຄດ ຮອງເຈົ້າເມືອງນາຊາຍທອງ, ທ່ານນາງ ແນວດີ ວິມານພິມມະຫາ ຮອງອຳນວຍການໃຫຍ່ ທພລ, ທ່ານ ສົມບູນ ເນຕິບັນດິດ ປະທານບໍລິສັດທິພະຈັນ ກໍ່ສ້າງ-ຕິດຕັ້ງ ໄຟຟ້າຈຳກັດຜູ້ດຽວ ແລະບັນດາພະນັກງານ ທພລ ອ້ອມຂ້າງເມືອງນາຊາຍທອງ, ບ້ານອີ່ໄລເໜືອ ແລະໃຕ້ເຂົ້າຮ່ວມ.

 ໃນໂອກາດດັ່ງກ່າວ; ທ່ານ ດວງສີ ສິງດວງແກ້ວ ຫົວໜ້າຫ້ອງການ ທພລ ໄດ້ແຈ້ງໃຫ້ຮູ້ວ່າ: ການເປີດ ທພລ ໜ່ວຍບໍລິການ ອີ່ໄລ ແຫ່ງນີ້ກໍ່ເພື່ອອໍານວຍຄວາມສະດວກໃຫ້ແກ່ພໍ່ແມ່ປະຊາຊົນ, ພໍ່ຄ້າຊາວຂາຍ ແລະບັນດາຫົວໜ່ວຍທຸລະກິດຕ່າງໆຢູ່ຂົງເຂດດັ່ງກ່າວໄດ້ມາໃຊ້ການບໍລິການທາງດ້ານການເງິນຢ່າງຮອບດ້ານໂດຍຜ່ານລະບົບການບໍລິການຂອງ ທພລ ທີ່ສາມາດຕອບສະໜອງຕາມຄວາມຮຽກຮ້ອງຕ້ອງການໃນການເຮັດທຸລະກໍາທາງດ້ານການເງິນໃນຍຸກປະຈຸບັນ ແລະອະນາຄົດທັງເປັນການສ້າງຄວາມສະດວກສະບາຍ-ງ່າຍດາຍ, ປະຢັດເວລາທັງຮັບປະກັນຄວາມປອດໄພ ແລະການຕົກເຮ່ຍເສຍຫາຍ,ຫຼຸດຜ່ອນການຊໍາລະສະສາງດ້ວຍການນໍາໃຊ້ເງິນສົດທີ່ມີຄວາມສ່ຽງສູງ. ພ້ອມໆກັນນັ້ນກໍ່ເພື່ອຮອງຮັບການຂະຫຍາຍຕົວໃນຂົງເຂດທ້ອງຖິ່ນດັ່ງກ່າວທີ່ມີທ່າກ້າວຂະຫ ຍາຍຕົວຢ່າງຮອບດ້ານໂດຍສະເພາະທາງດ້ານເສດຖະກິດ ແລະ ສັງຄົມ ແລະ ການສ້າງຕັ້ງໜ່ວຍບໍ່ລິການແຫ່ງນີ້ໄດ້ຮັບການສະໜັບສະໜູນ ແລະ ອໍານວຍຄວາມສະດວກໃນດ້ານສະຖານທີ່ຈາກບໍລິສັດທິບພະຈັນ.

  ໜ່ວຍບໍລິການດັ່ງກ່າວເປັນໜ່ວຍບໍລິການທີ່ຂຶ້ນກັບ ທພລ ສໍານັກງານໃຫຍ່ຊຶ່ງມີການບໍລິການຮອບດ້ານ, ພະນັກງານທຸກຄົນລ້ວນແຕ່ໄດ້ຮັບການຝຶກອົບ ຮົມມາເປັນຢ່າງດີໂດຍສະເພາະທາງດ້ານຄວາມຮູ້-ຄວາມສາມາດປະສົບການໃນການບໍລິການ ແລະ ມີຄວາມພ້ອມທີ່ຈະບໍລິການໃຫ້ດີທີ່ສຸດບົນພື້ນຖານການນຳໃຊ້ລະບົບ Core Banking ໃໝ່ທີ່ທັນສະໄໝ ແລະມີຊື່ສຽງຢູ່ໃນໂລກ.

  ທພລ ເປັນທະນາຄານທຸລະກິດລັດ, ທີ່ມີຄວາມເຂັ້ມແຂງອັນດັບແຖວໜ້າຂອງ ສປປ ລາວ ຖືກສ້າງຕັ້ງຂຶ້ນໃນວັນທີ 9 ເມສາ 2003 ດໍາເນີນທຸລະກິດການທະນາຄານໂດຍກະຊວງການເງິນຖືຮຸ້ນ 100%, ພາຍໃຕ້ການຄຸ້ມຄອງຮອບດ້ານຈາກທະນາຄານແຫ່ງ ສປປ ລາວ ໃນການດຳເນີນທຸລະກິດໃຫ້ສອດ ຄ່ອງຕາມກົດໝາຍຂອງລາວ, ເນື່ອງຈາກ ທພລ ມີວັດທະນະທຳການບໍລິການທີ່ເປັນເອກະລັກສະເພາະ,ມີຜະລິດຕະພັນທີ່ຫຼາກຫຼາຍ, ສາມາດຕອບສະໜອງຄວາມຮຽກຮ້ອງຕ້ອງການຂອງລູກຄ້າຈິ່ງເຮັດ ໃຫ້ ທພລ ເຕີບໃຫຍ່ເຂັ້ມແຂງເປັນລຳດັບເລື້ອຍມາທັງດ້ານປະລິມານ ແລະ ຄຸນນະພາບ.

ຂ່າວ: ຣັດສະໝີ ດວງສັດຈະ 

แชร์