ເຊກອງ ຝຶກອົບຮົມການແຈ້ງມອບອາກອນດ້ວຍຕົນເອງ ຜ່ານລະບົບອອນລາຍຂອງອົງການຈັດຕັ້ງພາກລັດ

ໃນວັນທີ 14 ກຸມພານີ້, ສ່ວຍສາອາກອນປະຈໍາແຂວງເຊກອງ ໄດ້ຈັດຝຶກອົບຮົມການແຈ້ງມອບພັນທະອາກອນດ້ວຍຕົນເອງຜ່ານລະບົບອອນລາຍໃຫ້ອົງການຈັດຕັ້ງພາກລັດ ຜ່ານລະບົບແທັກເຊີວິດ (Taxservice.mof.gov.la) ໃຫ້ພະແນກການ, ກົມກອງພາກລັດທົ່ວແຂວງ, ໂດຍການເປັນປະທານຂອງ ທ່ານ ລໍາທອງ ຍົນມະຫາໄຊ ຫົວຫນ້າສ່ວຍສາອາກອນ ປະຈໍາແຂວງ, ມີຄະນະນໍາພ້ອມດ້ວຍພະນັກງານວິຊາການຂະແຫນງການເງິນເຂົ້າຮ່ວມ.

ທ່ານ ລໍາທອງ ຍົນມະຫາໄຊ ກ່າວວ່າ: ຈຸດປະສົງໃນການຈັດຝຶກອົບຮົມໃນຄັ້ງນີ້ແມ່ນເພື່ອປະຕິບັດຕາມສິດ, ພາລະບົດບາດຂອງຂະແໜງການສ່ວນສາອາກອນເພື່ອຫັນເອົາການຄຸ້ມຄອງການແຈ້ງມອບພັນທະອາກອນປະເພດຕ່າງໆ ເຂົ້າສູ່ລະບົບທັນສະໄໝຕາມຍຸດທະສາດພັດທະນາການເງິນແຫ່ງລັດ ເພື່ອກ້າວສູ່ລະບົບຄຸ້ມຄອງການເງິນແຫ່ງລັດ ໃຫ້ມີຄວາມເຂັ້ມແຂງ, ໂປ່ງໃສ, ທັນສະໄໝ ແລະຍຸຕິທຳ, ພ້ອມນີ້ ກໍເປັນການສ້າງເງື່ອນໄຂອຳນວຍຄວາມສະດວກໃຫ້ແກ່ອົງການຈັດຕັ້ງພາກລັດ ໃນການແຈ້ງມອບພັນທະອາກອນ ຜ່ານລະບົບແທັກເຊີວິດ (Taxservice.mof.gov.la) ແນໃສ່ເຮັດໃຫ້ຫຼຸດຜ່ອນຂັ້ນຕອນຕ່າງໆລົງ ທັງປະຢັດເວລາ, ສ້າງຄວາມໂປ່ງໃສ, ສາມາດກວດສອບໄດ້, ສະດວກໃນການຊຸກຍູ້, ກວດກາ, ຕິດຕາມ, ການສະຫຼຸບລາຍງານ, ການສ້າງແຜນ, ພ້ອມທັງເປັນການຮັບປະກັນການຮົ່ວໄຫຼລາຍຮັບງົບປະມານແຫ່ງລັດຕື່ມອີກ.

ທ່ານ ໄພວັນ ສີວິໄລ ຮອງຫົວຫນ້າຂະແຫນງຄຸ້ມຄອງລາຍຮັບສ່ວຍສາອາກອນປະຈໍາແຂວງໄດ້ເຜີຍແຜ່ແນະນໍາວິທີການນໍາໃຊ້ລະບົບ ແທັກເຊີວິດ (Taxservice.mof.gov.la) ເຊິ່ງທ່ານໃຫ້ຮູ້ວ່າ: ລະບົບການແຈ້ງມອບພັນທະອາກອນ ຜ່ານລະບົບ ແທັກເຊີວິດ ແມ່ນສ່ວນໜຶ່ງຂອງລະບົບການຄຸ້ມຄອງອາກອນ TMIS ເຊິ່ງສ້າງຄວາມສະດວກສະບາຍໃຫ້ແກ່ອົງການຈັດຕັ້ງພາກລັດສາມາດແຈ້ງມອບພັນທະອາກອນດ້ວຍຕົນເອງຜ່ານລະບົບອິນເຕີເນັດໄດ້ໃນທຸກສະຖານທີ່ ຖ້າມີສັນຍານອິນເຕີເນັດ ໂດຍບໍ່ຕ້ອງມາຫາປ່ອງບໍລິການຂອງສ່ວຍສາອາກອນ, ເຊິ່ງຄຸນປະໂຫຍດຂອງການແຈ້ງດັ່ງກ່າວມີຫຼາຍຢ່າງເຊັ່ນ: ຫຼຸດຜ່ອນຂັ້ນຕອນຕ່າງໆລົງ ທັງປະຢັດເວລາ, ສ້າງຄວາມໂປ່ງໃສ, ຫຼຸດຜ່ອນພະນັກງານທີ່ເຮັດວຽກດັ່ງກ່າວ, ສະດວກໃນການຕິດຕາມ ແລະກວດກາໄດ້, ຫຼຸດຜ່ອນການສິ້ນເປືອງຄ່າໃຊ້ຈ່າຍຕ່າງໆ, ຊໍາລະອາກອນໄດ້ວ່ອງໄວຂຶ້ນ, ສາມາດຊໍາລະໄດ້ຕະຫຼອດ 24 ຊົ່ວໂມງບໍ່ເວັ້ນວັນລັດຖະການ, ນອກນີ້ຍັງໄດ້ແນະນໍາການມອບອາກອນ ຜ່ານລະບົບ ແທັກເຊີວິດ (Taxservice.mof.gov.la) ) ໃຫ້ຮັບຮູ້ເຂົ້າໃຈ ແລະສາມາດແຈ້ງມອບອາກອນໄດ້ດ້ວຍຕົນເອງ.

ຂ່າວ-ພາບ : ພຸດທະສອນ

แชร์