ຄັງເງິນ ຄຳມ່ວນ ປະຕິບັດລາຍຮັບໄດ້ 2.724 ຕື້ກີບ

ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ກອງປະຊຸມສະຫລຸບວຽກງານຄັງເງິນ ປະຈຳປີ 2023 ໄດ້ຈັດຂຶ້ນໃນວັນທີ 13 ກຸມພາ 2024 ໂດຍການເຂົ້າຮ່ວມຂອງທ່ານ ສີສະຫວາດ ໄຊຍະວົງ ຮອງຫົວໜ້າພະແນກການເງິນແຂວງ. ຂະນະທີ່ໃນ 1 ປີຜ່ານມາ, ຄັງເງິນ ແຂວງຄຳມ່ວນ ປະຕິບັດລາຍຮັບງົບປະມານໄດ້ 2.724 ຕື້ກວ່າກີບ ເທົ່າກັບ 156,38% ຂອງແຜນການປີ( 1.742 ຕື້ກວ່າກີບ). ສ່ວນດ້ານລາຍຈ່າຍ ປະຕິບັດໄດ້ຕົວຈິງ 739 ຕື້ກວ່າກີບ ເທົ່າກັບ 99,64% ຂອງແຜນ ການປີ( 742 ຕື້ກວ່າກີບ).

ໃນໄລຍະ 1 ປີຜ່ານມາ, ຄັງເງິນໄດ້ມີການຄຸ້ມຄອງລາຍຮັບງົບປະມານໃຫ້ໄປຕາມທິດສົ່ງເສີມການລົງທຶນ ແລະການດຳເນີນທຸລະກິດເພື່ອຂະຫຍາຍແຫລ່ງລາຍຮັບ ແລະ ສາມາດຈັດເກັບລາຍຮັບເຂົ້າງົບປະມານ ແນໃສ່ສ້າງເງື່ອນໄຂຊຸກຍູ້ສົ່ງເສີມຫົວໜ່ວຍທຸລະກິດໃຫ້ມີການຂະຫຍາຍຕົວຢ່າງຕໍ່ເນື່ອງ ແລະດຳເນີນທຸລະກິດໄດ້ຢ່າງມີປະສິດທິຜົນ, ປັບປຸງກົນໄກການຄຸ້ມຄອງ ແລະ ຈັດເກັບລາຍຮັບງົບປະມານແຫ່ງລັດຜ່ານລະບົບທະນາຄານເປັນສ່ວນຫລາຍເພື່ອຫລຸດຜ່ອນການຮັບເປັນເງິນສົດຢູ່ຄັງເງິນປະຈຳແຂວງ,ຄັງເງິນບັນດາເມືອງ, ດ່ານພາສີສາກົນ, ບ່ອນທີ່ມີລະບົບທະນາຄານໃຫ້ບໍລິການ, ປັບປຸງຂັ້ນຕອນ ແລະວິທີການນໍາໃຊ້ເຄື່ອງມືທີ່ທັນສະໄໝເຂົ້າຊ່ວຍໃນການຄຸ້ມຄອງ ແລະຈັດເກັບລາຍຮັບເຮັດໃຫ້ການຈັດເກັບລາຍຮັບເຂົ້າງົບປະມານບັນລຸ ແລະ ລື່ນແຜນການປີ ແລະ ເຮັດໃຫ້ການສະຫລຸບລາຍງານຕົວເລກລາຍຮັບງົບປະມານມີຄວາມຊັດເຈນ ແລະທັນຕາມກຳນົດເວລາ.

ສຳລັບທິດທາງແຜນການໃນຕໍ່ໜ້າແມ່ນເພີ່ມທະວີເອົາໃຈໃສ່ ນຳພາ-ຊີ້ນຳ, ສຶກສາອົບຮົມການ ເມືອງ-ແນວຄິດ ໃຫ້ພະນັກງານ-ລັດຖະກອນພາຍໃນຄັງເງິນແຂວງ, ເມືອງ ຢ່າງເລິກເຊິ່ງ, ຍົກສູງຄວາມຮັບຜິດຊອບທັງເປັນເຈົ້າການປະຕິບັດກົດໝາຍ ແລະລະບຽບການຂອງລັດຢ່າງເຂັ້ມງວດ, ດຳເນີນການທົດສອບຄວາມຮູ້, ຄວາມສາມາດທາງດ້ານວິຊາສະເພາະຂອງພະນັກງານ-ລັດຖະກອນ ເພື່ອເປັນບ່ອນອີງໃນການກຳນົດ ແລະຈັດວາງພະນັກງານ ໃຫ້ສອດຄ່ອງກັບການກຳນົດມາດຕະຖານຕຳແໜ່ງງານສະເພາະ, ຕິດຕາມ, ກວດກາຕີລາຄາປະເມີນຜົນການຈັດຕັ້ງປະຕິບັດວຽກງານວິຊາສະເພາະທີ່ໄດ້ຮັບມອບໝາຍຍົກໃຫ້ເຫັນຂໍ້ຄົງຄ້າງເພື່ອປັບປຸງ ແລະ ແກ້ໄຂໃນຕໍ່ໜ້າ, ເປັນເຈົ້າການປະສານສົມທົບກັບຂະແໜງລາຍຮັບ, ຫົວໜ່ວຍງົບປະມານ, ທະນາຄານທຸລະກິດ ແລະຄັງເງິນບັນດາເມືອງໃນການຄຸ້ມຄອງລາຍຮັບ, ປະຕິບັດລາຍຈ່າຍ, ການສະຫລຸບລາຍງານ ແລະ ອື່ນໆ.

ພ້ອມນີ້, ກອງປະຊຸມຍັງໄດ້ຜ່ານບົດແນະນຳວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2024, ບົດແນະນໍາກ່ຽວກັບການຄຸ້ມຄອງບັນຊີເງິນຝາກ ຂອງຫົວໜ່ວຍງົບປະມານກອງທຶນຂອງລັດເພື່ອຮັບປະກັນການຄຸ້ມຄອງຈັດເກັບລາຍຮັບໃຫ້ຄົບຖ້ວນ, ໂປ່ງໃສ, ຕ້ານທຸກຊ່ອງຫວ່າງຂອງການຮົ່ວໄຫລ ທາງດ້ານລາຍຮັບງົບປະມານແຫ່ງລັດ ແລະຮັບປະກັນການຄຸ້ມຄອງບັນຊີເງິນຝາກໃຫ້ລວມສູນຢູ່ລະບົບຄັງເງິນ.
ຂ່າວ-ພາບ: ກອງຄຳ

แชร์