ສື່ມວນຊົນ ກຽມຄວາມພ້ອມໃຫ້ແກ່ການເປັນປະທານອາຊຽນ ຂອງ ສປປ ລາວ

ກົມສື່ມວນຊົນ, ກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ (ຖວທ) ຮ່ວມກັບກົມການຂ່າວ, ກະຊວງການຕ່າງປະເທດ ແລະ ສະຖານທູດອົດສະຕຣາລີ ປະຈໍາ ສປປ ລາວ ຈັດກອງປະຊຸມສໍາມະນາວຽກງານສື່ມວນຊົນໃຫ້ແກ່ສື່ມວນຊົນລາວເພື່ອກຽມຄວາມພ້ອມໃຫ້ແກ່ການເປັນປະທານອາຊຽນຂອງ ສປປ ລາວ 2024 ຂຶ້ນທີ່ນະຄອນຫລວງວຽງຈັນໃນລະຫວ່າງວັນທີ 15-16 ກຸມພານີ້ ໂຍການເປັນປະທານຮ່ວມຂອງ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ແລະ ທ່ານ ນາງ ເມແກນ ຈອນສ ເອກອັກຄະລັດຖະທູດອົດສະຕຣາລີປະຈຳລາວ, ມີວິທະຍາກອນຈາກກະຊວງການຕ່າງປະເທດ, ກະຊວງ ອຸດສາຫະກຳ ແລະການຄ້າ ຖະຊວງ ຖວທ ພ້ອມດ້ວຍວິທະຍາກອນຈາກຕ່າງປະເທດໂດຍມີສື່ມວນຊົນພາກສ່ວນຕ່າງໆ ເຂົ້າຮ່ວມສຳມະນາ.

ທ່ານ ໂພສີ ແກ້ວມະນີວົງ ໄດ້ກ່າວວ່າ: ກອງປະຊຸມຄັ້ງນີ້ ຖືວ່າເປັນກອງປະຊຸມສໍາມະນາທີ່ມີຄວາມໝາຍ ຄວາມສໍາຄັນຢ່າງເລິກເຊິ່ງ ຕໍ່ຂົງເຂດສື່ມວນຊົນ ເວົ້າລວມ ເວົ້າສະເພາະ ກໍຄື ກະຊວງ ຖວທ ທີ່ຮັບຜິດຊອບວຽກງານຊຸກຍູ້ໂຄສະນາຜ່ານສື່ມວນຊົນ ເພື່ອຮັບປະກັນເຮັດໃຫ້ການກະຈາຍຂໍ້ມູນຂ່າວສານຖືກຕ້ອງ ວ່ອງໄວ ແລະ ສາມາດເຂົ້າເຖິງຜູ້ອ່ານຜູ້ຊົມຜູ້ຟັງຢູ່ພາຍໃນ ແລະຕ່າງປະເທດໃຫ້ກວ້າງຂວາງທີ່ສຸດນອກນັ້ນກໍເພື່ອຮັບປະກັນບໍ່ໃຫ້ຂໍ້ມູນມີຄວາມຜິດພາດ ຫຼື ຂາດເຄື່ອນໄປໃນທາງທີ່ບໍ່ຖືກຕ້ອງ ແລະບໍ່ສ້າງສັນ.

ເຖິງຢ່າງໃດກໍຕາມສື່ມວນຊົນທີ່ຈະເຄື່ອນໄຫວເກັບກໍາຂ່າວ ກ່ຽວກັບກອງປະຊຸມສຸດຍອດ ອາຊຽນປີ 2024 ຂອງ ສປປ ລາວ ເປັນເຈົ້າພາບນີ້ກໍຈະມີທັງສື່ມວນຊົນ ມາຈາກຕ່າງປະເທດ ເຂົ້າຮ່ວມອີກ ສະນັ້ນ ການສໍາມະນາວຽກງານສື່ມວນຊົນ ຄັ້ງນີ້ ທີ່ບັນດາວິທະຍາກອນຈະໄດ້ນໍາສະເໜີບົດຮຽນໃຫ້ສື່ມວນຊົນລາວເຮົາ ຖືວ່າເປັນໂອກາດທີ່ດີຫຼາຍ ແລະ ເຫັນວ່າບັນດາຫົວຂໍ້ທີ່ບັນດາວິທະຍາກອນນໍາສະເໜີ ລ້ວນແຕ່ຕິດພັນກັບວຽກງານສື່ມວນຊົນເປັນຕົ້ນຄວາມເຂົ້າໃຈຕໍ່ຄວາມເປັນມາຂອງອາຊຽນ (ASEAN), ວຽກງານຂອງແຕ່ລະເສົາຄໍ້າ ການໂຄສະນາໃຫ້ແກ່ກອງປະຊຸມລະດັບສາກົນ ການກະກຽມ ແລະອື່ນໆ.

ນອກນັ້ນຜູ້ເຂົ້າຮ່ວມຈະໄດ້ຮັບຟັງຫົວຂໍ້ການໄຈ້ແຍກຂໍ້ມູນບິດເບືອນ ແລະຂ່າວປອມ ຈາກບັນດາວິທະຍາກອນຜູ້ຊ່ຽວຊານ ແລະຜູ້ຈະນໍາສະເໜີກໍເຫັນວ່າລ້ວນແຕ່ຜູ້ມີປະສົບການດ້ານວຽກງານສູງສົມຄວນແລ້ວສະນັ້ນສື່ມວນຊົນພວກເຮົາທີ່ເຂົ້າຮ່ວມຄັ້ງນີ້ສະເໜີໃຫ້ເອົາໃຈໃສ່ເພື່ອຄົ້ນຄວ້າຖອດຖອນເປັນບົດຮຽນ ແລະນໍາໄປໝູນໃຊ້ເຂົ້າໃນວຽກງານຕົວຈິງທີ່ຕົນເອງຮັບຜິດຊອບໂດຍສະເພາະແມ່ນການກະກຽມຮັບໃຊ້ກອງປະຊຸມສຸດຍອດອາຊຽນ ທີ່ ສປປ ລາວ ເປັນເຈົ້າພາບໃຫ້ມີຄຸນນະພາບ ແລະ ໃຫ້ບັນລຸຜົນສໍາເລັດຢ່າງຈົບງາມ.

แชร์