ສືບຕໍ່ກວດກູ້ລະເບີດບໍ່ທັນແຕກທີ່ຕົກຄ້າງ ຢູ່ແຂວງຄໍາມ່ວນ ໄລຍະ VI

ພິທີລົງນາມບົດບັນທຶກຄວາມເຂົ້າໃຈສຳລັບໂຄງການກວດກູ້ລະເບີດບໍ່ທັນແຕກທີ່ຕົກຄ້າງ ຢູ່ແຂວງຄໍາມ່ວນ ສປປ ລາວ ໄລຍະ VI ຈັດຂຶ້ນວັນທີ 14 ກຸມພາ 2024 ຢູ່ໂຮງແຮງລາວພລາຊາ ນະຄອນຫຼວງວຽງຈັນ ລະຫວ່າງ ທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນ ຫາລະ ເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ແລະທ່ານ Eli Mechanic ຫົວໜ້າອົງການ ເກັບກູ້ລະເບີດແມັກ ປະສໍາ ສປປ ລາວ ມີທ່ານ Cashel Gleeson ຮອງເອກອັກຄະລັດຖະທູດແຫ່ງຣາຊະອານາຈັກອັງກິດ ປະຈໍາ ສປປ ລາວ ທ່ານນາງ ແກ້ວໃສສີ ປາດຖະໜາ ຮອງຫົວໜ້າພະແນກການຕ່າງປະເທດ ແຂວງຄໍາມ່ວນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ໂຄງການກວດກູ້ລະເບີດບໍ່ທັນແຕກທີ່ຕົກຄ້າງຢູ່ແຂວງຄໍາມ່ວນ ສປປ ລາວ ໄລຍະ VI ທີ່ໄດ້ຮັບການສະໜັບສະໜູນຈາກກະຊວງການຕ່າງປະເທດ ແລະການພັດທະ ນາ ແຫ່ງຣາຊະອານາຈັກ ອັງກິດ (FCDO) ໃນມູນຄ່າ 1.212.841 ໂດລາສະຫະລັດ ເຊິ່ງມີໄລຍະຈັດຕັ້ງປະຕິບັດແຕ່ມື້ໄດ້ຮັບອະນຸມັດຈົນເຖິງວັນທີ 31 ມີນາ 2025 ໂຄງ ການປະກອບມີ 5 ກິດຈະກໍາຫຼັກ ຄື: ໂຄສະນາສຶກສາຄວາມສ່ຽງໄພຈາກລະເບີດບໍ່ທັນແຕກສໍາຫຼວດທາງດ້ານວິຊາການກວດກູ້ລະເບີດບໍ່ທັນແຕກທໍາລາຍລະເບີດເຄື່ອນທີ່ ແລະສ້າງຂີດຄວາມສາມາດໃຫ້ຄະນະກໍາມະການຄຸ້ມຄອງການຈັດຕັ້ງປະຕິບັດໂຄງການຂັ້ນທ້ອງຖິ່ນ.

ຈຸດປະສົງຂອງໂຄງການແມ່ນເພື່ອເປັນການສະໜັບສະໜູນແຜນພັດທະນາເສດຖະກິດ-ສັງຄົມຂອງທ້ອງຖິ່ນຂອງແຂວງຄໍາມ່ວນໂດຍການກວດກູ້ລະເບີດບໍ່ທັນແຕກທີ່ຕົກຄ້າງ ອອກຈາກເນື້ອທີ່ດິນ ບ່ອນທີ່ມີແຜນພັດທະນາຕ່າງໆ ແລະ ດິນທໍາການຜະລິດທາງດ້ານກະສິກໍາ ຂອງພໍ່-ແມ່ປະຊາຊົນບັນດາເຜົ່າພ້ອມດຽວກັນນີ້ ເພື່ອເປັນການສະໜັບສະໜູນການປະຕິບັດວຽກງານຂອງລັດຖະບານແຫ່ງ ສປປ ລາວ ເພື່ອໃຫ້ບັນລຸເປົ້າໝາຍການພັດທະນາແບບຍືນຍົງທີ 18 ໂດຍການຫຼຸດຜ່ອນຜົນກະທົບຈາກລະເບີດບໍ່ທັນແຕກທີ່ຕົກຄ້າງໃນໄລຍະຍາວ ຢູ່ ສປປ ລາວ.

ສຳລັບໂຄງການພາຍໃຕ້ທຶນສະໜັບສະໜູນຈາກລັດຖະບານອັງກິດ ຢູ່ ແຂວງຄຳມ່ວນ ແຕ່ປີ 2019 ຮອດປີ 2023 ເຫັນວ່າມີຫຼາຍກິດຈະກໍາໄດ້ຮັບການຈັດຕັ້ງປະຕິ ບັດ ຈົນມີຜົນສຳເລັດ ເປັນທີ່ໜ້າພໍໃຈ ເປັນຕົ້ນແມ່ນວຽກງານໂຄສະນາສຶກສາຄວາມສ່ຽງໄພ ໄດ້ສໍາເລັດການລົງໂຄສະນາໃນ 100 ເທື່ອບ້ານ (ຈຳນວນ 585 ຄັ້ງ) ວຽກງານສໍາຫຼວດແບບບໍ່ແມ່ນວິຊາການ ສໍາເລັດຈໍານວນ 78 ບ້ານ ຈຳນວນ 78 ສະໜາມ ພົບຈຸດຫຼັກຖານ 96 ຈຸດພົບເຫັນ ແລະທໍາລາຍລະເບີດລູກຫວ່ານໄດ້ 1.838 ໜ່ວຍ ວຽກງານການສໍາຫຼວດແບບວິຊາການ ສໍາເລັດ 105 ເຮັກຕາ ວຽກ ງານກວດກູ້ລະເບີດບໍ່ທັນແຕກອອກຈາກພື້ນທີ່ໄດ້ 1.243 ເຮັກຕາ ວຽກງານການທໍາລາຍລະເບີດເຄື່ອນທີ່ໄດ້ 1.480 ຄັ້ງ ທໍາລາຍລະເບີດໄດ້ 2.395 ໜ່ວຍ ໃນນີ້ເປັນລະເບີດລູກຫວ່ານ 1.919 ໜ່ວຍ.

ສະເພາະໃນປີ 2023 ທີ່ຜ່ານມາອົງການໄດ້ສໍາເລັດການຈັດຕັ້ງປະຕິບັດວຽກງານຕ່າງໆ ເປັນຕົ້ນແມ່ນວຽກງານໂຄສະນາສຶກສາຄວາມສ່ຽງໄພສຳເລັດໃນຈຳນວນ 8 ບ້ານ ວຽກງານການສຳຫຼວດແບບວິຊາການ ສຳເລັດ 105,44 ເຮັກຕາ ກຳນົດເປັນທີ່ອັນຕະລາຍມີລະເບີດຕົກຄ້າງ (CHA) 73,28 ເຮັກຕາວຽກງານການກວດກູ້ລະເບີດ ອອກຈາກພື້ນທີ່ດິນສຳເລັດ 126,93 ເຮັກຕາ ວຽກງານການທຳລາຍລະເບີດແບບເຄື່ອນທີ່ໄດ້ 1.023 ຄັ້ງ ໃນ 27 ບ້ານ.
ທີ່ມາ: VientianeMai

แชร์