ສອບເສັງວັດລະດັບຄວາມຮູ້ພະນັກງານ-ລັດຖະກອນພາສີ ປະຈໍານະຄອນຫຼວງວຽງຈັນ

ວັນທີ 10 ກຸມພາ ທີ່ຜ່ານມາ, ທີ່ສະຖາບັນການເງິນ-ການບັນຊີ, ຄະນະຮັບຜິດຊອບສອບເສັງວັດລະດັບຄວາມຮູ້ກົມຈັດຕັ້ງ ແລະພະນັກງານ, ກົມພາສີ, ກົມກວດກາ ກະຊວງການເງິນ, ໄດ້ດຳເນີນການສອບເສັງວັດລະດັບຄວາມຮູ້ພະນັກງານ-ລັດຖະກອນພາສີ ປະຈໍານະຄອນຫຼວງວຽງຈັນ ໃນຂັ້ນຕໍາແໜ່ງບໍລິຫານປະເພດ 6, 7, 8 ແລະ ພະນັກງານວິຊາການ; ໂດຍການເປັນປະທານຂອງ ທ່ານ ກົງຄໍາ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ, ມີທ່ານ ພູເຂົາຄໍາ ວັນນະວົງໄຊ ຫົວ ໜ້າກົມພາສີ ແລະ ທ່ານ ອຸບັນ ສຸພິດາ ຫົວໜ້າກົມກວດກາ ກະຊວງການເງິນ. ນອກນັ້ນມີຄະນະກົມ, ຄະນະພະແນກການເງິນນະຄອນຫຼວງວຽງຈັນ, ຄະນະຮັບຜິດຊອບການສອບເສັງ, ພ້ອມດ້ວຍພະນັກງານ-ລັດຖະກອນພາສີ ປະຈໍານະຄອນຫຼວງວຽງຈັນເຂົ້າຮ່ວມ.

ການສອບເສັງວັດລະດັບຄວາມຮູ້ພະນັກງານ-ລັດຖະກອນພາສີ ປະຈໍານະຄອນຫຼວງວຽງຈັນໃນຄັ້ງນີ້ແມ່ນປະຕິບັດຕາມຂໍ້ຕົກລົງ ສະບັບເລກທີ 4295/ກງ, ລົງວັນທີ 08 ກັນຍາ 2021 ວ່າດ້ວຍມາດຕະຖານສະເພາະບາງຕໍາແໜ່ງງານຂອງພະນັກງານ-ລັດຖະກອນພາສີ. ເພື່ອເປັນການປັບປຸງແກ້ໄຂ, ກວດກາຄືນຄວາມຮັບຜິດຊອບຂອງສະມາຊິກພັກ-ພະນັກງານຫຼັກແຫຼ່ງຂອງຂະແໜງການພາສີປະຈຳຢູ່ນະຄອນຫຼວງວຽງຈັນ, ທັງເປັນການປະເມີນຄືນການສັບຊ້ອນ, ຈັດວາງພະນັກງານທີ່ພວມດຳລົງຕຳແໜ່ງບໍລິຫານໃນປັດຈຸບັນໃຫ້ຖືກຕ້ອງສອດຄ່ອງກັບການປະຕິບັດວຽກງານຕົວຈິງ, ໂດຍສະເພາະຜົນສຳເລັດໃນການປະຕິບັດໜ້າທີ່ວຽກງານ, ຕ້ອງສົມຄູ່ກັບຄວາມຮູ້ຄວາມສາມາດໃນການນຳພາ-ຊີ້ນຳໃນຕຳແໜ່ງບໍລິຫານທີ່ໄດ້ຮັບມອບໝາຍ.

ຄຽງຄູ່ກັນນີ້, ຍັງເປັນການສັງເກດຕີລາຄາໃຫ້ເຫັນໄດ້ດ້ານດີທີ່ຕັ້ງໜ້າ, ດ້ານອ່ອນ, ຂໍ້ຄົງຄ້າງຂອງແຕ່ລະຄົນເພື່ອສືບຕໍ່ປັບປຸງກົງຈັກການຈັດຕັ້ງໃຫ້ມີປະສິດທິພາບສອດຄ່ອງກັບຄວາມຮູ້ຄວາມສາມາດຂອງພະນັກງານ, ແນ່ໃສ່ເຮັດໃຫ້ການດໍາເນີນຖືກຕ້ອງຕາມຂັ້ນຕອນ ແລະມີຄວາມສະດວກໃນການຈັດຕັ້ງປະຕິບັດໃຫ້ຄະນະຮັບຜິດຊອບປະເມີນຜົນສະເພາະ ແລະຜູ້ທີ່ຖືກປະເມີນຜົນເຂົ້າໃຈຂັ້ນຕອນການຈັດຕັ້ງປະຕິບັດ.

ໂອກາດນີ້, ທ່ານ ກົງຄຳ ສິດທິວໍລະດາ ຫົວໜ້າກົມຈັດຕັ້ງ ແລະພະນັກງານ ໄດ້ມີຄໍາເຫັນວ່າ: ການສອບເສັງຄັ້ງນີ້ເພື່ອເປັນພື້ນຖານໃນການກຳນົດແຜນຊ່ວຍເຫຼືອບຳລຸງຍົກລະດັບວ່າບັນດາທ່ານຄວນເສີມສ້າງດ້ານໃດຕື່ມ ແລະ ເປັນບ່ອນອີງໃນການກໍ່ສ້າງ, ບໍາລູງ, ຍົກລະດັບ, ບັນຈຸສັບຊ້ອນ, ແຕ່ງຕັ້ງ, ຍົກຍ້າຍ, ຕີລາຄາປະເມີນຜົນ, ເລືອກເຟັ້ນໃຫ້ໄດ້ພະນັກງານທີ່ເຮັດແທ້ທຳຈິງ, ແນ່ໃສ່ເຮັດໃຫ້ພະນັກງານລັດຖະກອນພາສີຕ້ອງບຸກບືນຝຶກຝົນຫຼໍ່ຫຼອມຕົນເອງໃຫ້ໄດ້ມາດຕະຖານທີ່ກຳນົດ.
ກ່ອນການສອບເສັງຄັ້ງນີ້ໄດ້ຮັບຟັງການຜ່ານລະບຽບ ແລະ ຂໍ້ຫ້າມຕໍ່ຄະນະຮັບຜິດຊອບຄວບຄຸມຫ້ອງສອບເສັງ ແລະ ຜູ້ເຂົ້າຮ່ວມການສອບເສັງວັດລະດັບຄວາມຮູ້ພະນັກງານ-ລັດຖະກອນຕາມມາດຕະຖານສະເພາະບາງຕໍາແໜ່ງງານພາສີ ສະບັບເລກທີ 3442/ກງ, ລົງວັນທີ 31 ຕຸລາ 2023 ຈາກທ່ານ ຫອມຮັກ ສຸນະວັນ ຮອງຫົວໜ້າກົມຈັດຕັ້ງ ແລະ ພະນັກງານ, ຜ່ານຂໍ້ສອບເສັງ ສ່ວນໃຫຍ່ແມ່ນພາກທິດສະດີທີ່ຕິດພັນກັບວຽກງານພາສີ, ໂດຍມີພະນັກງານ-ລັດຖະກອນພາສີ ປະຈໍານະຄອນຫຼວງວຽງຈັນເຂົ້າຮ່ວມສອບເສັງທັງໝົດ 102 ທ່ານ ແລະໄດ້ແບ່ງການສອບເສັງເປັນສອງພາກ, ສຳລັບພາກເຊົ້າ ຈໍານວນ 51 ທ່ານ ແລະພາກບ່າຍ ຈໍານວນ 51 ທ່ານ.

แชร์