ກົນໄກຂອງຂະບວນການໂຕະມົນ ສ້າງຄວາມເຊື່ອໝັ້ນ ລະຫວ່າງ ລັດຖະບານ ແລະຄູ່ຮ່ວມພັດທະນາ

ກອງປະຊຸມໂຕະມົນ ປະຈຳປີ 2023 ພາຍໃຕ້ຫົວຂໍ້ “ເລັ່ງລັດການຈັດຕັ້ງປະຕິບັດຜົນການທົບທວນກາງສະໄໝ ຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ເພື່ອບັນລຸເປົ້າໝາຍການພັດທະນາ ແບບຍືນຍົງ ແລະ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຂອງ ສປປ ລາວ” ຈັດຂຶ້ນວັນທີ 13 ກຸມພາ 2024 ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ໂດຍເປັນປະທານຮ່ວມຂອງ ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະການລົງທຶນ ແລະທ່ານ ບັກໂຄເດັຍ ເບີຄະ ນ໋ອຟ ຜູ້ປະສານງານອົງການ ສະຫະປະຊາຊາດ ປະຈຳ ສປປ ລາວ, ມີຮອງລັດຖະມົນຕີ, ຮອງປະທານກຳມະທິການສະພາແຫ່ງຊາດ, ອົງການ ທຽບເທົ່າກະຊວງ, ຮອງເຈົ້າແຂວງ, ຮອງເຈົ້າຄອງ, ພະແນກແຜນການ ແລະ ການລົງທຶນແຂວງ, ບັນດາທູຕານຸທູດ ແລະອົງການຈັດຕັ້ງສາກົນເຂົ້າຮ່ວມ ເຊິ່ງກົນໄກຂອງຂະບວນການໂຕະມົນໄດ້ປະກອບສ່ວນອັນສໍາຄັນໃນການສ້າງຄວາມເຊື່ອໝັ້ນ ແລະເຂົ້າອົກເຂົ້າໃຈ ລະຫວ່າງ ລັດຖະບານ ແລະຄູ່ຮ່ວມພັດທະນາ ແລະ ເປັນກົນໄກ ໃນການລະດົມຂົນຂວາຍທຶນຮອນເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ,

ໂອກາດນີ້, ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະການລົງທຶນ ໄດ້ໃຫ້ຮູ້ວ່າ: ການຈັດກອງປະຊຸມໂຕະມົນ ປະຈຳປີ 2023 ຄັ້ງນີ້ມີຄວາມໝາຍຄວາມສຳຄັນຫລາຍຕໍ່ກັບ ສປປ ລາວ ຖືເປັນໂອກາດທີ່ດີ ໃຫ້ແກ່ພວກເຮົາໄດ້ມີການປຶກສາຫາລື ກ່ຽວກັບບົດສະຫລຸບການຈັດຕັ້ງປະຕິບັດກາງສະໄໝແຜນພັດທະນາເສດ ຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ຍຸດທະສາດດ້ານເງິນເພື່ອສະໜັບສະໜູນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ຂອບການຟື້ນຟູເສດຖະກິດຂອງ ສປປ ລາວ, ຄວາມຄືບ ໜ້າໃນການສ້າງບົດລາຍງານແບບສະໝັກໃຈ ແຫ່ງຊາດ ຄັ້ງທີ III ແລະ ຍຸດທະສາດການຂ້າມຜ່ານອອກຈາກສະຖານະພາບດ້ອຍພັດທະນາຢ່າງໂລ່ງລ່ຽນຂອງ ສປປ ລາວ, ວິໄສທັດຮອດປີ 2030 ແລະທິດທາງໃນຕໍ່ໜ້າ. ນອກຈາກນີ້, ກໍໄດ້ມີການປຶກສາຫາລື ກ່ຽວກັບການຮ່ວມມືເພື່ອການພັດທະນາ (ການເຂົ້າຮ່ວມການຕິດຕາມປະສິດທິຜົນຂອງການຮ່ວມມື ເພື່ອການພັດທະນາໃນລະດັບສາກົນ ຄັ້ງທີ 4 ແລະ ຄໍາແນະນໍາຂະບວນການໂຕະມົນ) ແລະ ການຍົກສູງປະສິດທິພາບ ແລະ ປະສິດທິຜົນຂອງກົນໄກຂອງຂະບວນການໂຕະມົນ ເຊິ່ງມີ 10 ໜ່ວຍງານ, ຂະແໜງການ, ເປັນເວທີໃນການປຶກສາຫາລືລະຫວ່າງກະຊວງ-ຂະແໜງການ ແລະຄູ່ຮ່ວມພັດທະນາກ່ຽວກັບບູລິມະສິດການພັດທະນາຂອງຂະແໜງການຮ່ວມກັບຄູ່ຮ່ວມພັດທະນາ ເຊິ່ງກົນໄກຂອງຂະບວນການໂຕະມົນໄດ້ປະກອບສ່ວນອັນສໍາຄັນໃນການສ້າງຄວາມເຊື່ອໝັ້ນ ແລະ ເຂົ້າອົກເຂົ້າໃຈ ລະຫວ່າງ ລັດຖະບານ ແລະຄູ່ຮ່ວມພັດທະນາ ແລະ ເປັນກົນໄກໃນການລະດົມຂົນຂວາຍທຶນຮອນເພື່ອປະກອບສ່ວນເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນແຕ່ລະໄລຍະເຊິ່ງສະແດງອອກໃນການສືບຕໍ່ໃຫ້ການສະໜັບສະໜູນດ້ານງົບປະມານ ແລະວິຊາການຈາກບັນດາຄູ່ຮ່ວມພັດທະນາ, ປະກອບ ສ່ວນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ.

ພ້ອມນີ້, ທ່ານ ບັກໂຄເດັຍ ເບີຄະນ໋ອຟ ກໍໄດ້ມີຄໍາເຫັນວ່າ: ເນື່ອງຈາກຄວາມທ້າທາຍຫລາຍຢ່າງ ທີ່ພວກເຮົາກໍາລັງຜະເຊີນຢູ່ໃນປັດຈຸບັນຫລາຍກວ່າທີ່ເຄີຍມີມາ, ບັນດາຄູ່ຮ່ວມມືພັດທະນາຂອງ ສປປ ລາວ ຕ້ອງຊອກຫາວິທີການເຮັດວຽກຮ່ວມກັນຢ່າງມີປະສິດທິຜົນກວ່າເກົ່າເພື່ອສະໜັບສະໜູນການຈັດຕັ້ງປະຕິບັດແຜນພັດທະນາ ເສດຖະກິດ-ແຫ່ງຊາດ ຂອງ ສປປ ລາວ ໂດຍສະເພາະໄລຍະທ້າຍສະໄໝຂອງແຜນ 5 ປີ ຄັ້ງທີ IX, ເປົ້າໝາຍການພັດທະນາແບບຍືນຍົງ ແລະການຈັດຕັ້ງປະຕິບັດຍຸດທະສາດການອອກຈາກສະຖານະພາບການດ້ອຍພັດທະນາ ຂອງ ສປປ ລາວ. ກອງປະຊຸມຄັ້ງນີ້, ໄດ້ຮັບການສະໜັບສະໜູນຈາກອົງການສະຫະປະຊາຊາດເພື່ອການພັດທະນາ(UNDP) ແລະອົງການຮ່ວມມືສາກົນອາເມລິກາ (USAID).

ພາຍຫລັງສຳເລັດກອງປະຊຸມ,ທ່ານປະທານກອງປະຊຸມ,ພ້ອມດ້ວຍຜູ້ຕາງໜ້າຝ່າຍຄູ່ຮ່ວມພັດທະນາຈະນຳສະເໜີຜົນ ແລະເນື້ອໃນຈິດໃຈຂອງກອງປະຊຸມລາຍງານຕໍ່ທ່ານນາຍົກລັດຖະມົນຕີ ແຫ່ງ ສປປ ລາວ ເພື່ອເປັນທິດທາງໃນການຈັດຕັ້ງຜັນຂະຫາຍຜົນຂອງກອງປະຊຸມໂຕະມົນ ປີ 2023 ໃຫ້ປະກົດຜົນເປັນຈິງ.
ຂ່າວ-ພາບ: ຊີລິການດາ

แชร์