ຊຳຊຸງປິດຊຸດຝືກອົບຮົມ

  ວັນທີ 10 ເມສາ 2019 ທີ່ນະຄອນຫຼວງວຽງຈັນ ຄະນະວິສະວະກໍາສາດ ມະຫາວິທະຍາໄລແຫ່ງຊາດຮ່ວມກັບບໍລິສັດບໍລິສັດຊໍາຊຸງເອເລັກໂຕຣນິກຈໍາກັດຜູ້ດຽວຈັດພິທີປິດໂຄງການ Samsung Tech Institute 2019 ແລະ ພ້ອມຄັດເລືອກຜູ້ຊະນະໃນການແຂ່ງຂັນສ້າງແອັບໃນຫົວຂໍ້ສັນສ້າງນະວັດຕະກໍາກ້າວນໍາຍຸກດີຈິຕອນໂດຍການເຂົ້າຮ່ວມຂອງ ທ່ານ ສົມພອນ ກັນທະວົງ ຫົວໜ້າພາກວິຊາວະສະວະກໍາຄອມພິວເຕີ ແລະເຕັກໂນໂລຊີຂໍ້ມູນຂ່າວສານ, ຄະນະວິສະວະກໍາສາດມະຫາວິທະຍາໄລແຫ່ງຊາດ, ທ່ານ ຮສ. ປອ ຄໍາຜຸຍ ສຸດທິສົມບັດ ຮັກສາການຄະນະບໍດີ, ຄະນະວິສະວະກໍາສາດ, ທ່ານ ຊຶ່ງໂຮ ຊ່ອຍ ຜູ້ອໍານວ ຍການບໍລິສັດຊໍາຊຸງເອເລັກໂຕຣນິກ ຈໍາກັດຜູ້ດຽວ, ມີຄະນະກໍາມະການ ແລະບັນດານັກວິຊາການທີ່ຕາງໜ້າຈາກກະຊວງທີ່ກ່ຽວຂ້ອງ, ຄູອາຈານ ແລະ ນ້ອງນັກຮຽນເຂົ້າຮ່ມ.

  ທ່ານ ສົມພອນ ກັນທະວົງ ກ່າວວ່າ: ເພື່ອເປັນການສືບຕໍ່ ແລະສົ່ງເສີມແນວຄິດຂອງນ້ອງນັກຮຽນ, ນັກສຶກສາໃນໂຄງການເຕັກອິນສະຕິຕູດໃຫ້ເກີດຜົນ ແລະໄປນໍາປະຍຸກໃຊ້ເຂົ້າໃນວຽກງານຕົວຈິງ ແລະເພື່ອເປັນການສ້າງບຸກຄະລາກອນເພື່ອຕອນສະໜອງໃຫ້ແກ່ຄວາມຕ້ອງການຂອງສັງຄົມໂດຍສະເພາະ ແມ່ນການຍົກລະດັບຄຸນນະພາບການສຶກສາຂອງ ສປປ ລາວ ເຮົາໃຫ້ທຽບທັນ ກັບພາກພື້ນ ແລະສາກົນໄດ້. ສະນັ້ນບໍລິສັດຊໍາຊຸງເອເລັກໂຕຣນິກຈໍາກັດຜູ້ ດຽວຈິ່ງໄດ້ສືບຕໍ່ເສີມໂຄງການຊໍາຊຸງເຕັກອິນສະຕິຕູດເປັນປີທີ 5 ຊຶ່ງໂຄງການດັ່ງກ່າວເລີ່ມແຕ່ເດືອນກຸມພາ 2019 ເປັນຕົ້ນມາທັງນີ້ເພື່ອແນໃສ່ການພັດທະນາທັກສະ, ຄວາມຮູ້ ແລະ ຄວາມສາມາດໃຫ້ແກ່ບັນດາໄວໜຸ່ມໂດຍສະເພາະແມ່ນັກຮຽນ, ນັກສຶກສາທີ່ມີຄວາມມັກຮັກໃນການພັດທະນາທາງດ້ານເຕັກໂນໂລຊີ ແລະໃນປີນີ້ມີຜູ້ເຂົ້າຮ່ວມທັງໝົດ 40 ກວ່າຄົນ.

  ພ້ອມດຽວກັນນັ້ນ, ມີນ້ອງນັກຮຽນ, ນັກສຶກສາສົ່ງຜົນງານກໍ່ຄືແນວຄວາມຄິດເຂົ້າປະກວດໃນຮອບສຸດທ້າຍນີ້ມີ 7 ທີມ ເພື່ອພັດທະນາຜົນງານອອກມາ ເປັນຜະລິດຕະພັນທີ່ເປັນແອບພະລິເຄຊັ່ນແອນດ່ອຍເພື່ອສ້າງນະວັດຕະກໍາໃນຍຸກຂອງດີຈິຕອນຊຶ່ງຜູ້ຊະນະເລືອດຈະໄດ້ຮັບລາງວັນ ແລະ ທຶນສະໜັບສະໜູນໃນການພັດທະນາຕໍ່ຍອດເພື່ອໃຫ້ເປັນຜະລິດຕະພັນທີ່ສົມບູນ ແລະໃຫ້ສາມາດເລີ່ມຕົ້ນເຮັດເປັນທຸລະກິດໄດ້ໃນອະນາຄົດຊຶ່ງລາງວັນມີມູນຄ່າ 8 ລ້ານກວ່າກີບ.

ຂ່າວ: ວົງມະນີ

แชร์