ຮອງລັດຖະມົນຕີກະຊວງ ຍທຂ ຕິດຕາມຄວາມຄືບໜ້າໂຄງການກໍ່ສ້າງລະບົບນໍ້າປະປາເມືອງລະມາມ

ທ່ານ ນາງ ວິໄລຄໍາ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ (ຍທຂ) ພ້ອມຄະນະໄດ້ລົງເຄື່ອນໄຫວຕິດຕາມກວດກາ ແລະຊຸກຍູ້ການຈັດຕັ້ງປະຕິບັດໂຄງການກໍ່ສ້າງນໍ້າປະປາ ແລະສຸຂາພິບານເມືອງລະມາມ ແລະໄດ້ເຂົ້າພົບທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໃນວັນທີ 6 ກຸມພາ 2024 ທີ່ຫ້ອງວ່າການແຂວງເຊກອງ.

ໃນໂອກາດດັ່ງກ່າວ, ທ່ານນາງ ວິໄລຄໍາ ໂພສາລາດ ໄດ້ແຈ້ງຈຸດປະສົງມາເຄື່ອນໄຫວວຽກ ແລະເຂົ້າພົບການນໍາຂອງແຂວງເຊກອງຄັ້ງນີ້ເພື່ອເປັນການຕິດຕາມ, ກວດກາ, ຊຸກຍູ້ ແລະ ປຶກສາຫາລືຂໍທິດຊີ້ນໍາຈາກທ່ານເຈົ້າແຂວງ ກ່ຽວກັບການຈັດຕັ້ງປະຕິບັດໂຄງການກໍ່ສ້າງລະບົບນໍ້າປະປາ ແລະ ສຸຂາພິບານເມືອງລະມາມ ເຊິ່ງໄດ້ເລີ່ມລົງມືຈັດກໍ່ສ້າງມາແຕ່ຕົ້ນປີ 2020 ຕາມແຜນເບື້ອງຕົ້ນແມ່ນຈະໃຫ້ສໍາເລັດໃນຕົ້ນປີ 2023 ແຕ່ການປະຕິບັດຕົວຈິງມາຮອດປັດຈຸບັນສໍາເລັດພຽງ 77,72%. ທັງນີ້ ກໍ່ເນື່ອງຈາກບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການແຜ່ລະບາດຂອງພະຍາດໂຄວິດ-19, ບໍລິສັດຂາດສະພາບຄ່ອງທາງດ້ານການເງິນ, ບຸກຄະລາກອນທີ່ມີປະສົບການທາງດ້ານເຕັກນິກວຽກງານນໍ້າປະປາ, ຂາດແຮງງານ ແລະເຄື່ອງກົນຈັກ (ພາຫະນະ) ເຮັດໃຫ້ການຈັດຕັ້ງປະຕິບັດວຽກງານຕ່າງໆ ຂອງໂຄງການຊັກຊ້າບໍ່ສາມາດປະຕິບັດໄດ້ຕາມແຜນທີ່ວາງໄວ້.

ໃນໂອກາດດຽວກັນ,ທ່ານ ເຫຼັກໄຫຼ ສີວິໄລ ກໍ່ໄດ້ສະແດງຄວາມຂອບໃຈທ່ານຮອງລັດຖະມົນຕີ ຍທຂ ພ້ອມຄະນະທີ່ລົງມາຕິຕາມ ແລະຊຸກຍູ້ວຽກງານຢູ່ແຂວງເຊກອງ. ໃນໄລຍະຜ່ານມາການນໍາແຂວງກໍ່ໄດ້ເອົາໃຈໃສ່ຕິດຕາມ ແລະຊຸກຍູ້ການຈັດຕັ້ງປະຕິບັດໂຄງການດັ່ງກ່າວແຕ່ການປະຕິບັດພົບບັນຫາຄວາມຫຍຸ້ງຍາກຫຼາຍທັງພາຍໃນ ແລະພາຍນອກ ເຮັດໃຫ້ການປະຕິບັດໂຄງການມີຄວາມຊັກຊ້າ. ສະນັ້ນ,ຕ້ອງສຸມໃສ່ຊຸກຍູ້ໂຄງການປະຕິບັດວຽກງານຕ່າງໆ ໂດຍສະເພາະຕໍ່ການສະເໜີດັດແກ້ລາຄາ; ຄົ້ນຄວ້າ, ປຶກສາຫາລື ແລະຂຶ້ນແຜນສະເໜີທຶນສົມທົບຫາການນໍາແຂວງ ເພື່ອບັນຈຸເຂົ້າແຜນຊໍາລະສາສາງໃຫ້ສໍາເລັດ; ເອົາໃຈໃສ່ຄວບຄຸມບໍລິສັດທີ່ປຶກສາ ແລະ ປຶກສາຫາລືສ້າງຄວາມເປັນເອກະພາບກ່ຽວກັບການຕໍ່ສັນຍາ ແລະສືບຕໍ່ຊຸກຍູ້ບໍລິສັດຜູ້ຮັບເໝົາປະຕິບັດບັນດາໜ້າວຽກຕ່າງໆ ຂອງໂຄງການໃຫ້ສໍາເລັດຕາມແຜນທີ່ວາງໄວ້.
---
ຂ່າວ-ພາບ: ສັນຍາ

แชร์