ຫົວພັນ ຄາດຈະສ້າງລາຍຮັບ 50 ຕື້ກີບ ຈາກປີທ່ອງທ່ຽວລາວ

ປີທ່ອງທ່ຽວລາວ 2024 ນີ້ ແຂວງຫົວພັນ ຄາດວ່າຈະສາມາດດຶງດູດນັກທ່ອງທ່ຽວໄດ້ຫຼາຍກວ່າ 47.000 ເທື່ອຄົນ ແລະສ້າງລາຍຮັບໃຫ້ໄດ້ 50 ຕື້ກ່ວາກີບ ຊື່ງປີ 2023 ຜ່ານມາ ມີນັກທ່ອງທ່ຽວເດີນທາງໄປທ່ຽວແຂວງຫົວພັນຫລາຍກວ່າ 45.000 ເທື່ອຄົນ ສາມາດສ້າງລາຍຮັບໄດ້ຫຼາຍກ່ວາ 32 ຕື້ກ່ວາກີບ.

ທ່ານ ຄໍາແພງ ໄຊສົມແພງ ເຈົ້າແຂວງຫົວພັນ ກ່າວວ່າ: ປະຈຸບັນວຽກງານທ່ອງທ່ຽວກຳລັງມີທ່າແຮງຂະຫຍາຍຕົວຢ່າງໄວວາ ແລະເປັນຂະແໜງໜຶ່ງທີ່ມີບົດບາດສຳຄັນໃນການພັດທະນາເສດຖະກິດ-ສັງຄົມຂອງຊາດ, ເປັນອຸດສະຫະກຳທີ່ປອດຂັວນພິດ ເຊິ່ງໄດ້ກະຕຸກຊຸກຍູ້ໃຫ້ບັນດາຂະແໜງການອື່ນໄດ້ມີສ່ວນຮ່ວມໃນການພັດທະນາໄປພ້ອມໆກັນ, ເປັນການສ້າງວຽກເຮັດງານ ແລະ ລາຍຮັບໃຫ້ແກ່ປະຊາຊົນ, ພ້ອມກັນນັ້ນຍັງເປັນການອະນຸລັກຮັກສາວັດທະນະທຳ ແລະ ຮີດຄອງປະເພນີອັນດີງາມໄວ້ໃຫ້ຊາວໂລກໄດ້ຮັບຮູ້ອີກດ້ວຍ. ໃນໄລຍະຜ່ານມາແຂວງຫົວພັນໄດ້ນຳໃຊ້ທຶນຮອນເພື່ອພັດທະນາພື້ນຖານໂຄງລ່າງ, ສະຖານທີ່ທ່ອງທ່ຽວທີ່ສຳຄັນໃນແຕ່ລະປີ, ປຸກລະດົມໃຫ້ບັນດາກະຊວງ,ຂະແໜງການທີ່ກ່ຽວຂ້ອງນັບທັງຢູ່ສູນກາງ, ທ້ອງ ຖິ່ນ,ນັກທຸລະກິດພາຍໃນ ແລະຕ່າງປະເທດໄດ້ມີສ່ວນຮ່ວມໃນການພັດທະນາສະຖານທີ່ທ່ອງທ່ຽວ ເຊັ່ນ:ຖໍ້າທ່ານຜູ້ນຳຢູ່ເມືອງວຽງໄຊ, ຕາດນໍ້ານົ່ວ, ຕາດສະເຫຼີຍ, ຕາດໂກ່ນ,ບໍ່ນໍ້າຮ້ອນເມືອງຮ້ຽມ, ສວນອຸທິຍານຫີນຕັ້ງຫົວເມືອງ, ອຸທິຍານແຫ່ງຊາດນໍ້າແອດ-ພູເລີຍແລະອື່ນໆ.

ສໍາລັບປີທ່ອງທ່ຽວລາວ 2024 ນີ້ ຢູ່ແຂວງຫົວພັນມີຫຼາຍກິດຈະກຳໃນແຕ່ລະເດືອນ ເປັນຕົ້ນບຸນກິນຈຽງເຜົ່າມົ້ງ, ບຸນກະເດີເຜົ່າກຶມມຸ, ບຸນກິນຈຽງເຜົ່າໄຕດຳ, ບຸນປີໃໝ່ລາວ, ບຸນໜ່ວຍແກ້ວ, ກິດຈະກໍາກິນປາຂ່າງນາ, ບຸນເຂົ້າປະດັບດິນ, ບຸນຫໍ່ເຂົ້າສະຫຼາກ, ບຸນຊວງເຮືອ, ບຸນອອກພັນສາ ແລະ ອື່ນໆ ເພື່ອດຶງດູດໃຫ້ນັກທ່ອງທ່ຽວພາຍໃນ ແລະ ຕ່າງປະເທດໄດ້ໄປທ່ຽວແຂວງຫົວພັນນັບມື້ຫຼາຍຂຶ້ນປະກອບສ່ວນແກ້ໄຂຄວາມທຸກຍາກໃຫ້ແກ່ປະຊາຊົນເທື່ອລະກ້າວ.


ທີ່ມາ: ວສລ

แชร์