ຮອງປະທານປະເທດ ຢ້ຽມຢາມໂຮງງານຜະລິດແປ້ງມັນຕົ້ນ ແຂວງອຸດົມໄຊ

ໃນວັນທີ 2 ກຸມພາ 2024 ນີ້, ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດ ພ້ອມດ້ວຍຄະນະ ໂດຍມີທ່ານ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ພ້ອມດ້ວຍຄະນະພະແນກການທີ່ກ່ຽວຂ້ອງ ໄດ້ລົງເຄື່ອນໄຫວຢ້ຽມຢາມ ຊຸກຍູ້ ໂຮງງານຜະລິດແປງມັນຕົ້ນ ບ້ານປຸ່ງຫວີງ ເມືອງໄຊ ແຂວງອຸດົມໄຊ.

ໃນໂອກາດທີ່ຢ້ຽມຊົມໂຮງານ, ປະທານບໍລິສັດກໍໄດ້ລາຍງານສະພາບການຈັດຕັ້ງປະຕິບັດວຽກງານດ້ານຕ່າງໆ ໂດຍຫຍໍ້ໃຫ້ກັບຄະນະທີມງານໄດ້ຮັບຊາບ ເປັນຕົ້ນ ແມ່ນການລົງທຶນທາງດ້ານການປູກ ແລະ ການລ້ຽງ, ສະເພາະຢູ່ໃນເມືອງໄຊ ມີປະຊາຊນປູກມັນຕົ້ນທັງໝົດ 540 ຄອບຄົວ, ໃນ 37 ບ້ານ, ມີເນື້ອທີ່ທັງໝົດ 240 ເຮັກຕາ. ການຈັດຕັ້ງປະຕິບັດ ຕໍ່ກັບການປູກມັນຕົ້ນຂອງບໍລິສັດ ແລະ ພໍ່ແມ່ປະ ຊາຊົນ ໃນປີ 2023 ຈາກການເກັບກໍາຂໍ້ມູນເບື້ອງຕົ້ນມີຄອບຄົວທີ່ຈະປູກມັນຕົ້ນທັງໝົດ 52 ບ້ານ, 640 ຄອບຄົວ, ມີເນື້ອທີ່ 412 ເຮັກຕາ. ແຕ່ມາຮອດໄລຍະການສະໜອງແນວພັນທາງບໍລິສັດໄດ້ຊອກຫາແນວພັນມາສະໜອງໃຫ້ພໍ່ແມ່ປະຊາຊົນ ບໍ່ພຽງພໍ ຈຶ່ງບໍ່ໄດ້ຕາມແຜນການ. ແນວໃດກໍຕາມບັນດາຄອບຄົວພໍ່ແມ່ປະຊາຊົນທີ່ໄດ້ປູກຕົວຈິງໃນປະຈຸບັນເຫັນວ່າມີຄວາມງອກງາມດີ ແຕ່ຍັງມີບາງແນວພັນທີ່ບໍ່ເໝາະສົມກັບສະພາບພື້ນທີ່ ເຮັດໃຫ້ມີຫົວນ້ອຍບໍ່ງາມ, ປະຈຸບັນ ພໍ່ແມ່ປະຊາຊົນແມ່ນຢູ່ໃນໄລຍະການເກັບກູ້ຜົນຜະລິດແລ້ວປະມານ 70%. ສວ່ນການເກັບຊື້ມັນຕົ້ນ, ບໍລິສັດໄດ້ເຊັນສັນຍາເກັບຊື້ໃນປີ 2023 ລາຄ່າ 1.500 ກີບຕໍ່ 1 ກິໂລ ແມ່ນສົ່ງມາຮອດໂຮງງານເພາະວ່າທາງບໍລິສັດຈະບໍ່ມີລົດໄປເກັບຊື້ແຕ່ລະຈຸດແຕ່ລະບ່ອນ. ສຳລັບແຜນປູກມັນຕົ້ນໃນປີ 2024, ທາງບໍລິສັດ ຈະມີແຜນເກັບຊື້ແນວພັນຈາກປະຊາຊົນມາສະຕັອກໄວ້ປະມານ 150 ໂຕນ ເພື່ອສາມາດສະໜອງປະຊາຊົນທີ່ຕ້ອງການປູກ ໃນເນື້ອທີ່ຕາມແຜນການຂອງເມືອງໄຊ ໃຫ້ໄດ້ 400-500 ເຮັກຕາ. ສ່ວນຕະຫລາດຈໍາໜ່າຍແປ້ງມັນຕົ້ນ ແມ່ນທາງໂຮງງານໄດ້ສົ່ງອອກໄປຂານຢູ່ ສປ ຈີນ ເຫັນວ່າຜົນຕອບຮັບດີ ແລະມີຄວາມຕ້ອງການ ເປັນຈຳນວນຫລາຍ.

ໂອກາດນີ້, ທ່ານຮອງປະທານປະເທດກໍໄດ້ຍ້ອງຍໍຊົມເຊີຍຕໍ່ກັບການນຳແຂວງທີ່ສາມາດດຶງດູດເອົານັກລົງທຶນຕ່າງປະເທດໂດຍສະເພາະແມ່ນໂຮງງານຜະລິດແປ້ງມັນຕົ້ນແຫ່ງນີ້ເຊິ່ງມັນໄດ້ສ້າງວຽກເຮັດງານທຳ, ສ້າງລາຍໄດ້ ເຮັດໃຫ້ປະຊາຊົນຈຳນວນຫລາຍ ມີອາຊີບທີ່ຖາວອນ, ພ້ອມທັງເນັ້ນໃຫ້ບໍລິສັດຈົ່ງຂະຫຍາຍການສົ່ງເສີມປະຊາຊົນປູກໃຫ້ຫລາຍກວ່າເກົ່າ ແລະມີການພັດທະນາຂຶ້ນໄປເລື້ອຍໆ,ພ້ອມທັງຊອກຫາແນວພັນທີ່ດີມີຄຸນນະພາບມາສົ່ງເສີມໃຫ້ປະຊາຊົນປູກໃຫ້ຫລາຍຕື່ມອີກ.

ຂ່າວ-ພາບ:ແສງອາທິດ

แชร์