ວຽງຈັນນານາຊາດ ໂອໂຕໂຊ 2024 ຈະຈັດຂຶ້ນເດືອນມີນາ

ງານວາງສະແດງລົດ ວຽງຈັນນານາຊາດ ໂອໂຕໂຊ 2024 (Vientiane International Auto Show 2024) ຈະຈັດຂຶ້ນໃນລະຫວ່າງວັນທີ 02-10 ມີນາ 2024 ທີ່ສູນການຄ້າ ລາວ - ໄອເຕັກ, ນະຄອນຫລວງວຽງຈັນ ຊຶ່ງຈະມີບຸດລົດຈາກຫຼາກຫຼາຍຍີ່ຫໍ້ ເຂົ້າຮ່ວມ ເຊັ່ນ: ຮອນດ້າ ຟອດ, ຈາກົວແລນໂລເວີ ເອັມຈີ ເຈເອັມອີວີ, ເຊີລີ້, ມາສ໌ດ້າ, ເຊເລດ ແລະ ອື່ນ ໆ ຊຶ່ງຄາດວ່າຈະມີຜູ້ເຂົ້າຊົມງານປະມານ 50.000 ຄົນ/ມື້ ແລະຄາດວ່າມີການສັ່ງຈອງລົດພາຍໃນງານ 500 ຄັນ.

ພິທີຖະແຫລງຂ່າວກ່ຽວກັບງານດັ່ງກ່າວໄດ້ຈັດຂຶ້ນໃນວັນ 5 ກຸມພາ 2024 ທີ່ສູນການຄ້າລາວ-ໄອເຕັກ ໃຫ້ກຽດເຂົ້າຮ່ວມມີທ່ານ ວິທູນ ສິດທິມໍລະດາ ຫົວໜ້າກົມສົ່ງເສີມການຄ້າ ແລະ ຫັດຖະກຳ, ທ່ານນາງ ຄໍາພາ ຄໍາບຸນເຮືອງ (ຮອງຜູ້ອຳນວຍການໃຫຍ່ ຝ່າຍການຄ້າ) ບໍລິສັດ ລາວເວີນ ມະຫາຊົນ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ສື່ມວນຊົນເຂົ້າຮ່ວມ.

ທ່ານ ພານະລິນ ສຸວັນນະວົງຜູ້ອໍານວຍການ ບໍລິສັດ ອີລີແກ້ນ ອີເວັ້ນສ໌ ຈຳກັດຜູ້ດຽວ ກ່າວວ່າ: ງານວາງສະແດງລົດ ວຽງຈັນນານາຊາດ ໂອໂຕໂຊ 2024 ຈະດໍາເນີນເປັນເວລາ 9 ວັນ ເລີ່ມແຕ່ວັນທີ 02-10 ມີນາ 2024 ທີ່ສູນການຄ້າ ລາວ - ໄອເຕັກ, ງານຄັ້ງນີ້ ຫຼາກຫຼາຍປະເພດສິນຄ້າເຊັ່ນ: ລົດໄຟຟ້າ, ລົດທີ່ປະຢັດ ພະລັງງານນໍ້າມັນ, ອຸປະກອນປະດັບລົດຍົນ, ບັນດາເຄື່ອງຮັບໃຊ້ທີ່ຕິດພັນກັບພາຫະນະ, ສະຖາບັນການເງິນ ແລະ ທະນາຄານທຸລະກິດ. ມາຮອດປະຈຸບັນ ການລະດົມຫົວໜ່ວຍທຸລະກິດຄ້າຍລົດເຂົ້າຮ່ວມມີຫລາຍກວ່າ 30 ຄ້າຍ, ມີການຈັດສັນບຸດຫຼາຍກວ່າ 70 ບຸດ ເພື່ອໃຫ້ຜູ້ປະກອບການພາຍໃນ ແລະຕ່າງປະເທດໄດ້ມີໂອກາດ ເຂົ້າມາຮ່ວມ. ນອກຈາກນັ້ນຍັງມີການວາງສະແດງຜະລິດຕະພັນໂອດ໋ອບ ແລະສິນຄ້າທ່າແຮງຂອງລາວມາວາງສະແດງເພື່ອເປັນການໂຄສະນາ ແລະ ສົ່ງເສີມການຊົມໃຊ້ສິນຄ້າລາວນໍາອີກ.

ພິເສດສໍາລັບລູກຄ້າທີ່ຈອງລົດພາຍໃນງານຈະມີສິດລົງທະບຽບເພື່ອຮັບຄູ່ປອງລຸ້ນໂຊກ ຮັບເອົາຂອງລາງວັນ, ບໍ່ວ່າຈະເປັນ ພວງກະແຈໂລໂກ້ງານ, ນໍ້າຫອມໃສ່ລົດ, ນໍ້າຢາລ້າງລົດ, ຜ້າເຊັດລົດໄມໂຄຟາຍເບີ້,ອຸປະກອນທີ່ສຽບສາຍເຊັກເບ້ວ,ນໍ້າຢາເຊັດລໍ້ລົດ, ບັດເຄືອບແກ້ວລົດຟຣີ, ເສື້ອໂລໂກ້ງານ, ສາຍຄໍຄໍາ ແລະຂອງລາງວັນອື່ນໆ ອີກຢ່າງຫຼວງຫຼາຍ. ພ້ອມກັນນັ້ນພາຍໃນງານຍັງຈະມີກິດຈະກຳຫລາຍຢ່າງເປັນຕົ້ນແມ່ການການທົດລອງຂັບລົດຂອງແຕ່ລະຄ້າຍລົດ, ການຕົບແຕ່ງເຄື່ອງສຽງຂອງລົດ, ການປະກວດເຄື່ອງສຽງລົດ, ການສະແດງຄວາມສາມາດໃນການຂັບຂີ່ ແລະ ການດຣີຟລົດ, ນອກຈາກນີ້ຜູ້ເຂົ້າຮ່ວມ ຍັງຈະໄດ້ພົບກັບງານຄົບຮອບ 9 ປີ ຂອງ ຮ້ານອາຫານ 3434 ທີ່ ຈະນໍາສິນລະປິນນັກຮ້ອງມາສ້າງຄວາມມ່ວນຊື່ນໃຫ້ກັບບັນດາລູກຄ້າທີ່ມາທ່ຽວຊົມງານອີກດ້ວຍ.

แชร์