ເປີດໃຊ້ເປັນທາງການສະໜາມບິນສາກົນບໍ່ແກ້ວ ອາຍຸສຳປະທານ 50 ປີ

ພິທີເປີດນໍາໃຊ້ສະຫນາມບິນສາກົນບໍ່ແກ້ວ ໄດ້ຈັດຂຶ້ນຢູ່ເຂດເສດຖະກິດພິ ເສດສາມຫລ່ຽມຄໍາ ເມືອງຕົ້ນເຜີ້ງ ແຂວງບໍ່ແກ້ວ ໃນວັນທີ 5 ກຸມພາ 2024 ນີ້ໂດຍໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ທ່ານ ເຈົ້າເຫວີຍ ປະທານສະພາບໍລິຫານເຂດເສດຖະກິດພິເສດສາມຫລ່ຽມຄໍາ, ມີບັນດາຄະນະນໍາຂັ້ນສູງ ແລະເຈົ້າຫນ້າທີ່ກ່ຽວຂ້ອງເຂົ້າຮ່ວມ.

ທ່ານ ບົວຄົງ ນາມມະວົງ ໄດ້ກ່າວເປີດນໍາໃຊ້ສະຫນາມບິນວ່າ: ໂຄງກໍ່ສ້າງສະໜາມບິນສາກົນບໍ່ແກ້ວເປັນເປົ້າໝາຍຂອງການພັດທະນາໂຄງລ່າງພື້ນຖານພາຍໃນທ້ອງຖິ່ນ ແລະ ເປັນການພັດທະນາເຂດເສດຖະກິດພິເສດສາມຫລ່ຽມຄໍາເພື່ອເສີມສ້າງການຄົມມະນາຄົມຂົນສົ່ງທາງອາກາດໃຫ້ມີຄວາມເຂັ້ມແຂງເພື່ອເຊື່ອມຕໍ່ກັບສາກົນ ອໍານວຍຄວາມສະດວກໃນການລົງທຶນການທ່ອງທ່ຽວທັງພາຍໃນ ແລະຕ່າງປະເທດເພີ່ມຂີດຄວາມສາມາດໃນການພັດທະນາພື້ນຖານໂຄງລ່າງຂອງພາກເໜືອໂດຍສະເພາະແຂວງບໍ່ແກ້ວ, ສ້າງວຽກເຮັດງານທໍາໃຫ້ປະຊາຊົນ ແລະອື່ນໆ.

ໂຄງການສະໜາມບິນສາກົນບໍ່ແກ້ວ ແມ່ນໜຶ່ງໃນກິດຈະການທີ່ໄດ້ລະບຸໄວ້ໃນສັນຍາວ່າດ້ວຍການພັດທະນາເຂດເສດຖະກິດ ແລະແຫລ່ງທ່ອງທ່ຽວຄົບວົງຈອນອາຊຽນສາມຫລ່ຽມຄຳ ສະບັບປີ 2007 ແລະສັນຍາວ່າດ້ວຍການພັດທະນາເຂດເສດຖະກິດພິເສດສາມຫລ່ຽມຄຳ, ເມືອງເຜິ້ງ, ແຂວງບໍ່ແກ້ວ, ສປປ ລາວ ສະບັບປັບປຸງ 2014. ໂຄງການດັ່ງກ່າວເປັນການລົງທຶນຂອງ ບໍລິສັດ ກຣິດເຕີເບເອເລຍອິນເວດເມັນແອນດີເວວລົບເມັ່ນ ຈຳກັດ 100 % ໃນຮູບແບບ BOT, ເປັນສະໜາມບິນຂະໜາດ Code 4C, ໃນມູນຄ່າການລົງທຶນທັງໝົດ 225 ລ້ານກວ່າໂດລາສະຫະລັດ, ອາຍຸສຳປະທານ 50 ປີ, ສາມາດຕໍ່ໄດ້ຕາມການຕົກລົງຂອງລັດຖະບານ ແລະ ໄດ້ເລີ່ມມີການກໍ່ສ້າງມາຕັ້ງແຕ່ ວັນທີ 20 ກັນຍາ 2020 ເປັນຕົ້ນມາ.

ການສ້າງສະໜາມບິນສາກົນບໍ່ແກ້ວ ເປັນການຍົກລະດັບມາດຕະຖານໃນການບໍລິການທາງອາກາດໃຫ້ທຽບເທົ່າສາກົນ, ເປັນການສ້າງລາຍຮັບແກ່ພາກລັດທາງກົງ ແລະທາງອ້ອມ, ເປັນການສ້າງວຽກເຮັດງານທຳໃຫ້ແກ່ປະຊາຊົນ, ນອກນັ້ນຍັງຈະເປັນການຫລຸດຜ່ອນການລົງທຶນຂອງພາກລັດເຂົ້າໃນການກໍ່ສ້າງໂຄງລ່າງພື້ນຖານ; ໂຄງການກໍ່ສ້າງສະໜາມບິນສາກົນບໍ່ແກ້ວເປັນເປົ້າໝາຍຂອງການພັດທະນາໂຄງລ່າງພື້ນຖານພາຍໃນທ້ອງຖິ່ນ ແລະເປັນການພັດທະນາເຂດເສດຖະກິດພິເສດສາມຫລ່ຽມຄຳ ເສີມສ້າງການຄົມມະນາຄົມຂົນສົ່ງໃຫ້ມີຄວາມເຂັ້ມແຂງ ເພື່ອເຊື່ອມຕໍ່ເຂົ້າກັບສາກົນ ອຳນວຍຄວາມສະດວກໃນການລົງທຶນ, ການທ່ອງທ່ຽວທັງພາຍໃນ ແລະ ຕ່າງປະເທດ ເພື່ອເພີ່ມຂີດຄວາມສາມາດໃນການພັດທະນາພື້ນຖານໂຄງລ່າງຂອງພາກເໜືອໂດຍສະເພາະແຂວງບໍ່ແກ້ວ ສະໜາມບິນທີ່ດັ່ງກ່າວນີ້ ນຳໃຊ້ເນື້ອທີ່ດິນໃນການກໍ່ສ້າງ 314 ເຮັກຕາ 5.478 ຕາແມັດ, ທາງແລ່ນຂຶ້ນລົງຂອງເຮືອບິນມີຄວາມຍາວ 2.700 ແມັດ ແລະ ສາມາດຂະຫຍາຍໄດ້ເຖິງ 3.000 ແມັດ, ສາມາດຮັບການລົງຈອດຂອງຍົນແອບັດສ A320 ແລະ ໂບອິ້ງ 737, ອາຄານຜູ້ໂດຍສານສາມາດຮອງຮັບຜູ້ໂດຍສານເຂົ້າ-ອອກ 600 ຄົນ ໃນເວລາດຽວກັນ, ອາຄານຄວບຄຸມການບິນ ແລະ ສິ່ງອໍານວຍຄວາມສະດວກຕ່າງໆຢ່າງເປັນລະບົບ.

ພາຍຫຼັງຈາກໝົດກຳນົດອາຍຸສໍາປະທານແລ້ວຈະໄດ້ມອບໂອນໂຄງການຄືນໃຫ້ລັດຖະບານຕາມອາຍຸສຳປະທານຂອງການລົງທຶນ ລວມທັງເນື້ອທີ່ດິນ, ສຳລັບເນື້ອທີ່ດິນດັ່ງກ່າວແມ່ນໄດ້ຕິດພັນ ແລະ ເປັນສ່ວນໜຶ່ງຂອງເນື້ອທີ່ພັດທະນາໃນສັນຍາວ່າດ້ວຍການພັດທະນາເຂດເສດຖະກິດພິເສດສາມຫຼ່ຽມຄຳ, ເມືອງເຜິ້ງ, ແຂວງບໍ່ແກ້ວ ສປປ ລາວ ສະບັບປັບປຸງ 2014, ໂດຍທາງນິຕິກຳແລ້ວ ເນື້ອທີ່ດິນດັ່ງກ່າວຈະຍັງຢູ່ໃນໄລຍະການພັດທະນາ, ສະນັ້ນຈຶ່ງຄວນມີການຈັດຫາເນື້ອທີ່ດິນທົດແທນເພື່ອນຳໃຊ້ໃນການພັດທະນາຄົບຕາມອາຍຸສັນຍາທີ່ຍັງເຫຼືອ.

ສະຫນາມບິນດັ່ງກ່າວຫ່າງຈາກເທສະບານເມືອງຕົ້ນເຜິ້ງປະມານ 7 ກິໂລແມັດ, ສາມາດຮອງຮັບຜູ້ໂດຍສານໄດ້ 2 ລ້ານກວ່າຄົນຕໍ່ປີ ແລະເປັນສະຫນາມບິນໃຫຍ່ອັນດັບທີ 3 ຂອງ ສປປ ລາວ ຮອງຈາກສະຫນາມບິນສາກົນວັດໄຕ ແລະຫລວງພະບາງ.

แชร์