ພາສີ ແຂວງຫຼວງນໍ້າທາ ເກັບລາຍຮັບລື່ນແຜນ 315 ຕື້ກວ່າກີບ

ທ່ານ ບຸນແອງ ພັນທະວົງ ຫົວໜ້າພາສີປະຈຳແຂວງຫລວງນໍ້າທາ ໄດ້ລາຍງານໃນກອງປະຊຸມສະຫຼູບການຈັດຕັ້ງປະຕິບັດວຽກງານວິຊາສະເພາະ ປະຈໍາປີ 2023 ແລະ ກໍານົດທິທາງ 2024 ທີ່ຈັດຂຶ້ນເມື່ອບໍ່ດົນຜ່ານມານີ້ ໃຫ້ຮູ້ວ່າ: ປີ 2023 ພາສີປະຈຳແຂວງໄດ້ຮັບແຜນການຈັດເກັບລາຍຮັບທັງໝົດ 970 ຕື້ກີບ, ຜ່ານການຈັດຕັ້ງປະຕິບັດ ປີ2023 ປະຕິບັດໄດ້ 1.285 ຕື້ກີບ ລື່ນແຜນການ 315ກວ່າກີບ, ໃນນັ້ນຂະແໜງກວດກາ ແລະກວດສອບຄືນການແຈ້ງໄດ້ 32 ຕື້ກີບ,ລື່ນແຜນ 17ຕື້ກວ່າກີບ; ດ່ານພາສີສາກົນບໍ່ເຕ່ນ ແຜນການປີ 726 ຕື້ກວ່າກີບ,ປະຕິບັດໄດ້ 956 ຕື້ກວ່າກີບ; ດ່ານພາສີທາງລົດໄຟແຜນການປີ 218 ຕື້ກວ່າກີບ,ປະຕິບັດໄດ້ 287 ຕື້ກວ່າກີບ,ລື່ນແຜນ 69 ຕື້ກວ່າກີບ; ດ່ານພາສີທ້ອງຖິ່ນປາງໄຮ ແຜນປີ 7 ຕື້ 700 ລ້ານກີບ,ປະຕິບັດໄດ້ 5 ຕື້ 948 ລ້ານກວ່າກີບ; ດ່ານພາສີທ້ອງຖິ່ນຊຽງກົກ ແຜນການປີ 7 ຕື້ 500 ລ້ານກີບ,ປະຕິບັດໄດ້ 3 ຕື້ 357 ລ້ານກີບ, ລຸດແຜນປີ 4 ຕື້ກວ່າກີບ.

ພ້ອມນັ້ນວຽກງານວິຊາສະເພາະກໍ່ໄດ້ເອົາໃຈໃສ່ຊີ້ນຳ ນໍາພາ ແລະລົງເລິກໃກ້ຊິດ, ການຈັດຕັ້ງປະຕິບັດແຕ່ລະດ້ານ, ຜ່ານການຈັດຕັ້ງປະຕິບັດເຫັນວ່າສາມາດສັງລວມໄດ້ບາງຈຸດທີ່ພົ້ນເດັ່ນເປັນຕົ້ນແມ່ນ ການປັບປຸງກົນໄກ,ແບບແຜນ,ວິທີການເຮັດວຽກ ຢູ່ບັນດາຂະແໜງ ແລະ ບັນດາດ່ານ,ເພື່ອໃຫ້ ການບໍລິການມີຄວາມສະດວກວ່ອງໄວຂຶ້ນ ແລະ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ ,ເພື່ອແນ່ໃສ່ການຈັດເກັບລາຍຮັບໃຫ້ໄດ້ຕາມແຜນການ ຫຼືລື່ນແຜນການ, ວຽກງານກວດກາ ແລະ ກວດສອບຄືນການແຈ້ງພາສີ ຂອງບັນດາຫົວໜ່ວຍທຸລະກິດນໍາເຂົ້າ- ສົ່ງອອກ ສິນຄ້າ,ເຄື່ອງຂອງ ຜ່ານດ່ານພາສີສາກົນບໍ່ເຕັນ ເຫັນວ່າ ໄດ້ກວດພົບການແຈ້ງພາສີເປັນລາຍລະອຽດແມ່ນຍັງບໍ່ທັນ ຖືກຕ້ອງຕາມກົດໝາຍ ແລະ ລະບຽບການ ຫຼາຍພໍສົມຄວນ ແລະ ໄດ້ສຸມໃສ່ຊຸກຍູ້ການເຄື່ອນໄຫວລາດຕະເວນ ແລະ ປະຕິບັດວຽກງານວິຊາສະເພາະ,ຜ່ານການເຄື່ອນໄຫວ 81 ຄັ້ງ, ໄດ້ພົບເຫັນການກະທຳຜິດ ແລະຢຶດຂອງກາງໄດ້ຫຼາຍຄະດີ ໂດຍສະເພາະແມ່ນພາຫະນະລວມຄະດີເກີດຂຶ້ນທັງໝົດ 460 ຄະດີ, ຄະດີພາຫະນະ 411 ຄະດີ, ຄະດີທົ່ວໄປ 39 ຄະດີ, ວຽກງານກວດສອບຄືນການແຈ້ງພາສີ,ໄດ້ກວດພົບເຫັນການແຈ້ງພາສີເປັນລາຍລະອຽດ ບໍ່ຖືກຕ້ອງຕາມກົດໝາຍ ແລະລະບຽບການ ໄດ້ກວດສອບຫົວໜ່ວຍທຸລະກິດທັງໝົດ 31 ບໍລິສັດ; ພົບເຫັນການກະທຳຜິດ ທາງດ້ານມູນຄ່າແຈ້ງ ແລະ ອາກອນຊົມໃຊ້ ມີ 11 ບໍລິສັດ, ໄດ້ດຳເນີນການແກ້ໄຂເສຍພາສີ-ອາກອນຜິດດ່ຽງ ແລະ ຄ່າປັບໃໝ່ ໄດ້ 9 ບໍລິສັດ ເປັນເງິນຈຳນວນ 515 ລ້ານກວ່າກີບ; ສືບຕໍ່ດຳເນີນການແກ້ໄຂ 2 ຄະດີ; ໄດ້ມອບໃຫ້ກົມພາສີ ພະແນກກວດສອບຄືນການແຈ້ງພາສີ ເປັນຜູ້ແກ້ໄຂ 4 ບໍລິສັດ,ໄດ້ແກ້ໄຂແລ້ວ 2 ບໍລິສັດ,ເກັບຄືນໄດ້ 1.562 ຕື້ກີບ,ບໍ່ທັນໄດ້ແກ້ 2 ບໍລິສັດ ແລະ ວຽກງານອື່ນໆ. ສໍາລັບທິດທາງແຜນການປີ 2024 ການເກັບລາຍຮັບແຜນປີ ໃຫ້ໄດ້ 1.428 ຕື້ກີບ, ໃນນັ້ນ ຂະແໜງກວດກາ ແລະ ກວດສອບຄືນການແຈ້ງພາສີໃຫ້ໄດ້ 25 ຕື້ກວ່າກີບ, ດ່ານພາສີສາກົນບໍ່ເຕັນໃຫ້ໄດ້ 1.063 ຕື້ກວ່າກີບ, ທາງລົດໄຟບໍ່ເຕັນໃຫ້ໄດ້ 320 ຕື້ກວ່າກີບ,ດ່ານພາສີທ້ອງຖິ່ນປາງໄຮໃຫ້ໄດ້ 10.340 ຕື້ກວ່າກີບ,ດ່ານພາສີທ້ອງຖິ່ນຊຽງກົກໃຫ້ໄດ້ 9.050 ຕື້ກວ່າກີບ ແລະວຽກງານອື່ນໆທີ່ຕິດພັນກັບວຽກງານວີຊາສະເພາະທີ່ກ່ຽວຂ້ອງໃຫ້ໄດ້ຕາມລະດັບຄາດໝາຍ.

ຂ່າວ: ມຸນຕີ

แชร์