ປກສ ຄຳມ່ວນກັກຕົວເປົ້າໝາຍຄ້າຂາຍຢາເສບຕິດ

ເຈົ້າໜ້າທີ່ພະແນກຕຳຫຼວດຕ້ານ ແລະສະກັດກັ້ນຢາເສບຕິດ ປກສ ແຂວງຄຳມ່ວນໄດ້ເອົາໃຈໃສ່ເຄື່ອນໄຫວແກ້ໄຂບັນຫາຢາເສບຕິດມາໃນວັນທີ 30 ມັງກອນ 2024 ທາງເຈົ້າໜ້າທີ່ວິຊາສະເພາະໄດ້ຮັບແຫຼ່ງຂ່າວຈາກພົນລະເມືອງດີວ່າ ຈະມີເປົ້າໝາຍຢາເສບຕິດ ເຄື່ອນໄຫວ ຊື້-ຂາຍ ຢາເສບຕິດ (ຢາບ້າ) ຢູ່ເຂດບ້ານຈອມທອງ ເມືອງທ່າແຂກ ແຂວງຄຳມ່ວນ ພາຍຫຼັງໄດ້ຮັບແຫຼ່ງຂ່າວທາງເຈົ້າໜ້າທີ່ວິຊາສະເພາະກໍ່ໄດ້ປະສານສົມທົບກັບ ປກສ ກຸ່ມ ຈອມທອງ ແລະ ເຫັນວ່າມີມູນຄວາມຈິງແທ້ ດັ່ງນັ້ນຈຶ່ງໄດ້ແຕ່ງຕັ້ງກຳລັງວິຊາສະເພາະລົງຕິດຕາມຢູ່ເຂດດັ່ງກ່າວ ພໍຮອດເວລາ 16:30 ຂອງວັນດຽວກັນທາງເຈົ້າໜ້າທີ່ຈຶ່ງໄດ້ເຫັນເປົ້າໝາຍຈຳນວນ 2 ຄົນ ຂັບຂີ່ລົດກະບະຍີ່ຫໍ້ເເດຮັນສີຂາວ (ບໍ່ຕິດປ້າຍທະບຽນ) ຈາກນັ້ນເຈົ້າໜ້າທີ່ຈຶ່ງໄດ້ສະແດງຕົວເພື່ອເຂົ້າກວດຄົ້ນເຊິ່ງໃນຂະນະນັ້ນພວກກ່ຽວກຳລັງຈະໂຍນຢາບ້າຖິ້ມ ແຕ່ຖືກເຈົ້າໜ້າທີ່ກັກຕົວໄດ້ກ່ອນພ້ອມຢຶດຂອງກາງຢາບ້າຈຳນວນ 300 ເມັດ. ຜ່ານການສອບສວນຂັ້ນເບື້ອງຕົ້ນຂອງເຈົ້າໜ້າທີ່ຜູ້ຖືກຫາຊື່ທ້າວ ພູມີພົນ ສຸວັນນະລາດ (ທ້າວ ຊ້າງ) ອາຍຸ 31 ປີອາຊີບ ກຳມະກອນ ຢູ່ບ້ານໜອງບົວຄຳ ເມືອງທ່າແຂກ ແຂວງຄຳມ່ວນ ແລະນາງ ຄຳແສນ ຄູນມີ ( ຕ໋ອກ) ອາຍຸ 31 ປີອາຊີບ ກຳມະກອນ ຢູ່ບ້ານ ສົມສະອາດ ເມືອງທ່າແຂກ ແຂວງຄຳມ່ວນ ພວກກ່ຽວໄດ້ຮັບສາລະພາບຕໍ່ເຈົ້າໜ້າທີ່ວ່າຢາບ້າຈຳນວນດັ່ງກ່າວແມ່ນຂອງພວກກ່ຽວແທ້ໂດຍຊື້ມາຈາກທ້າວ ປອນວິໄລ ບຸນຕາ ອາຍຸ 21 ປີ ອາຊີບກຳມະກອນຢູ່ບ້ານ ສົມສະອາດ ເມືອງທ່າແຂກ ແຂວງຄຳມ່ວນ.ເພື່ອນຳເອົາຢາບ້າດັ່ງກ່າວໄປຈຳໜ່າຍແຕ່ກໍ່ຖືກເຈົ້າໜ້າທີ່ເຂົ້າກັກຕົວໄດ້ກ່ອນ.

ຮອດເວລາ 17 ໂມງ ຂອງວັນດຽວກັນທາງເຈົ້າໜ້າທີ່ກໍ່ສາມາດກັກຕົວທ້າວ ປອນວິໄລ ບຸນຕາ (ປອນ) ອາຍຸ 21 ປີພ້ອມຂອງກາງຢາບ້າ ຈຳນວນ 251 ເມັດ ແລະ ໜູ່ຮ່ວມຂະບວນການນຳກັນ ຊື່ທ້າວ ຕ້ອມ ເດມານາມ ອາຍຸ 19 ປີ, ທັງສອງແມ່ນຢູ່ບ້ານ ສົມສະອາດ ເມືອງທ່າແຂກ ແຂວງຄຳມ່ວນ. ປະຈຸບັນທາງເຈົ້າໜ້າທີ່ພວກເຮົາກຳລັງຂະຫຍາຍຜົນຫາກຸ່ມແກ້ງຮ່ວມຂະບວນການມາດຳເນີນຄະດີຕາມຂັ້ນຕອນຂອງກົດໝາຍ.

แชร์