ຄໍາມ່ວນ ຈັດກິດຈະກໍາຂີ່ລົດຖີບຕ້ອນຮັບປີທ່ອງທ່ຽວລາວ 2024

ແຂວງຄຳມ່ວນ ຈັດຂະບວນຂີ່ລົດຖີບເພື່ອສຸຂະພາບຕ້ອນຮັບປີທ່ອງທ່ຽວລາວ 2024 ພາຍໃຕ້ຄໍາຂວັນ “ທ່ອງທ່ຽວລາວປອດໄພ, ຊື່ນໃຈໃນວັດທະນະທໍາ, ທໍາມະຊາດ ແລະ ປະຫວັດສາດ” ໃນວັນທີ 1 ກຸມພາ 2024 ໂດຍ ມີທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ມີອະດີດລັດຖະມົນຕີກະຊວງພະນັກງານ-ບໍ່ແຮ່, ຜູ້ຕາງໜ້າພະແນກການອ້ອມຂ້າງແຂວງ, ມີນັກກິລາຂີ່ລົດຖີບຈາກສະໂມສອນລູກສີໂຄດ, ສະໂມສອນເຊົາໄຣເດີ້, ສະໂມສອນນ້ອງໃໝ່, ຊາວໜຸ່ມ-ເຍົາວະຊົນ ແລະ ພາກສ່ວນກ່ຽວຂ້ອງ ເຂົ້າຮ່ວມຢ່າງເປັນຂະບວນຟົດຟື້ນ.

ທ່ານ ແກ່ນຈັນ ທອງສະຫວັດ ຫົວໜ້າພະແນກສາທາລະນະສຸກແຂວງ ໃນນາມປະທານສະຫະພັນ ກິລາລົດຖີບແຂວງຄໍາມ່ວນ ໄດ້ໃຫ້ຮູ້ວ່າ: ການຈັດກິດຈະກຳດັ່ງກ່າວ ກໍເພື່ອເປັນການໂຄສະນາ ແລະເຮັດໃຫ້ການເປີດປີທ່ອງທ່ຽວລາວ 2024 ຢູ່ແຂວງຄໍາມ່ວນມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຫລາກຫລາຍກິດຈະກໍາທີ່ເປັນການດຶງດູດນັກທ່ອງທ່ຽວທັງພາຍໃນ- ຕ່າງປະເທດໃຫ້ມາທ່ອງທ່ຽວແຂວງຄໍາມ່ວນໃຫ້ຫລາຍຂຶ້ນ. ຂະບວນຂີ່ລົດຖີບເພື່ອສຸຂະພາບຕ້ອນຮັບປີທ່ອງທ່ຽວລາວ 2024 ໃນຄັ້ງນີ້, ມີໄລຍະທາງລວມ 14 ກິໂລແມັດ ໂດຍເລີ່ມອອກຈາກຈຸດບໍລິເວນຈັດງານເປີດປີທ່ອງທ່ຽວລາວ (4 ແຍກວັດກາໂຕລິກ) ໄປຫາ ສີ່ແຍກໄຟແດງ (ພະແນກສຶກສາສິການ ແລະກິລາແຂວງ) ໄປຫາວົງວຽນຫລັກ 2 ໄປທາງຕະຫລາດຫລັກ 3 ຮອດສາມແຍກໂພນພິມສຸດທາງເບຕົງລ້ຽວຊ້າຍກັບໄປຫາວົງວຽນຫລັກ 2 ໄປທາງຫ້ອງວ່າການແຂວງ (ຖະໜົນວຽງຈັນ) ໄປຮອດໄຟແດງທ່າດ່ານ- ໄປຮອດຫໍມູນເຊື້ອ 21 ມີນາ 1946 ແລະ ລ້ຽວຊ້າຍໄປສີ່ແຍກໄຟແດງ ພະແນກສຶກສາສິການ ແລະກິລາແຂວງ) ແລະໄປຫາຈຸດເລີ່ມຕົ້ນຖືວ່າສໍາເລັດກິດຈະກໍາ.
ຂ່າວ-ພາບ: ແດງສະຫວັດ ແສນພານິດ

แชร์