ໂຮງແຮມຈໍາປາສັກ ແກຣນ ໄດ້ລາງວັນມາດຕະຖານສະຖານທີ່ຈັດງານ ລະດັບອາຊຽນ

ໂຮງແຮມຈໍາປາສັກ ແກຣນ (Champasak Grand Hotel) ຕັ້ງຢູ່ເມືອງປາກເຊ ແຂວງຈໍາປາສັກ ໄດ້ລາງວັນມາດຕະຖານ ສະຖານທີ່ການຈັດງານ ລະດັບ ອາຊຽນ ປະຈຳປີ 2024-2026 ເຊິ່ງເປັນອີກໜຶ່ງຄວາມພາກພູມໃຈຂອງຜູ້ປະກອບການ ທັງເປັນຜົນງານທີ່ພົ້ນເດັ່ນໃນການຕ້ອນຮັບປີທ່ອງທ່ຽວລາວ 2024 ແລະ ລາງວັນປະເພດນີ້ເປັນການມອບລາງວັນເປັນຄັ້ງທໍາອິດຂອງອາຊຽນແນໃສ່ເພື່ອສົ່ງເສີມໃຫ້ພາກພື້ນອາຊຽນມີສະຖານທີ່ຈັດງານເທດສະການທີ່ມີມາດຕະຖານ, ຄຸນນະພາບສູງ ແລະສາມາດແຂ່ງຂັນກັບສາກົນໄດ້ເພື່ອດຶງດູດນັກທ່ອງທ່ຽວ ແລະສ້າງລາຍຮັບໃຫ້ພາກພື້ນອາຊຽນໃຫ້ນັບມື້ຫຼາຍຂຶ້ນ.

ພິທີມອບ-ຮັບ ລາງວັນດັ່ງກ່າວ ໄດ້ຈັດຂຶ້ນໃນວັນທີ 26 ມັງກອນທີ່ຜ່ານມາຢູ່ນະຄອນຫລວງວຽງຈັນ, ໃນໂອກາດງານມະຫະກໍາທ່ອງທ່ຽວອາຊຽນ 2024 ທີ່ ສປປ ລາວ ໄດ້ຮັບກຽດເປັນເຈົ້າພາບ ຈັດຂຶ້ນລະຫວ່າງ 22-27 ມັງກອນ 2024 ນີ້. ໂດຍມີທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ກາວ ຄິມ ຮຸນ ເລຂາທິການໃຫຍ່ອາຊຽນພ້ອມດ້ວຍຜູ້ແທນຈາກບັນດາປະເທດສະມາຊິກອາຊຽນ ແລະ ຄູ່ຮ່ວມເຈລະຈາ ເຂົ້າຮ່ວມ.

ທ່ານ ນາງ ມຸກດາວ ແສງອາລຸນ ກຳມະການຜູ້ຈັດການໂຮງແຮມຈຳປາສັກແກຣນ ມີຄໍາເຫັນວ່າ: ພວກເຮົາຄະນະຜູ້ບໍລິຫານໂຮງແຮມຈໍາປາສັກແກຣນຮູ້ສຶກເປັນກຽດ, ດີໃຈ ແລະພາກພູມໃຈ ທີ່ໄດ້ຮັບລາງວັນມາດຕະຖານ ສະຖານທີ່ການຈັດງານເທສະການ ກໍຄືຈັດງານລ້ຽງ-ງານປະຊຸມສຳມະນາ ລະດັບ ອາຊຽນ ປະຈຳປີ 2024, ພວກເຮົາຂໍຢືນຢັນວ່າ ເມື່ອໄດ້ຮັບລາງວັນນີ້ແລ້ວ ພວກເຮົາບໍ່ພຽງແຕ່ຈະຮັກສາມາດຕະຖານນີ້ໄວ້ ແຕ່ພວກເຮົາ ຈະພັດທະນາວຽກງານບໍລິການໃຫ້ມີຄຸນນະພາບຫຼາຍຂຶ້ນເລື້ອຍໆ.

ປີ 2024 ນີ້, ສປປ ລາວ ໄດ້ຮັບທັງໝົດ 4 ປະເພດ ລາງວັນມາດຕະຖານອາຊຽນ, ລວມມີ 20 ລາງວັນ ຄື: ມາດຕະຖານໂຮງແຮມຂຽວອາຊຽນ 5 ລາງວັນ, ມາດຕະຖານເມືອງທ່ອງທ່ຽວສະອາດອາຊຽນ 2 ລາງວັນ, ມາດຕະຖານສະຖານທີ່ຈັດງານອາຊຽນ, ປະເພດຫ້ອງປະຊຸມ 5 ລາງວັນ, ປະເພດສະຖານທີ່ຈັດງານວາງສະແດງ 1 ລາງວັນ, ປະເພດສະຖານທີ່ຈັດງານເທສະການ 5 ລາງວັນ ແລະລາງວັນການທ່ອງທ່ຽວແບບຍືນຍົງອາຊຽນ 2 ລາງວັນ.

ຂ່າວ: ໂພທິຣາດ

แชร์