ໂຄງການປັບປຸງຊີວິດເປັນຢູ່ຊຸມຊົນຂອງບໍລິສັດ ພູເບ້ຍ ມາຍນິງ ປະຕິບັດໄດ້ເກີນມາດຕະຖານການປະເມີນລະດັບໂລກ

ໃນບົດລາຍງານທີ່ໄດ້ເຜີຍແຜ່ ໃນວ່າງບໍ່ດົນມານີ້ ໄດ້ໃຫ້ຮູ້ວ່າ ໂຄງການປັບປຸງຊີວິດການເປັນຢູ່ຂອງຊຸມຊົນ ທີ່ຈັດຕັ້ງໂດຍ ບໍລິສັດ ພູເບ້ຍ ມາຍນິງ ປະຕິບັດໄດ້ລື່ນມາດຕະຖານການປະເມີນໃນລະດັບສາກົນ ຕໍ່ກັບການສ້າງຜົນກະທົບດ້ານດີຕໍ່ບັນດາຊຸມຊົນທ້ອງຖິ່ນຢູ່ ເມືອງ ອະນຸວົງ ແຂວງ ໄຊສົມບູນ.

ຊີວີຕາສ (CIVITAS), ອົງການເອກະລາດຂອງສາກົນທີ່ຈົດທະບຽນຢູ່ ສປປ ລາວ, ໄດ້ລົງຢ້ຽມຢາມໂຄງການປັບປຸງຊີວິດເປັນຢູ່ຊຸມຊົນ ຂອງບໍລິສັດ ພູເບ້ຍ ມາຍນິງ ແຕ່ວັນທີ 20 ພະຈິກ ເຖີງ 30 ທັນວາ ເພື່ອທົບທວນ ແລະ ປະເມີນ 9 ໂຄງການປັບປຸງຊີວິດເປັນຢູ່ເຊິ່ງໄດ້ຈັດຕັ້ງປະຕິບັດ ນັບແຕ່ປີ 2018-2022. ເພື່ອດໍາເນີນການປະເມີນທີ່ລະອຽດຂອງໂຄງການທັງໝົດ ອົງການ ໄດ້ສໍາພາດ 30 ການຈັດຕັ້ງຈາກບັນດາຊຸມຊົນທ້ອງຖິ່ນ ແລະ ອໍານາດການປົກຄອງລັດຖະບານທີ່ກ່ຽວຂ້ອງໃນຂັ້ນເມືອງ, ແຂວງ ແລະ ສູນກາງ.

ການທົບທວນ ແມ່ນສ່ວນໜຶ່ງຂອງແຜນລິເລີ່ມການປະເມີນໃນລະດັບສາກົນຂອງບໍລິສັດ ພູເບ້ຍ ມາຍນິງ, ເປັນຄັ້ງທໍາອິດທີ່ ບໍລິສັດ ໄດ້ນໍາໃຊ້ເກນມາດຕະຖານການປະເມີນ 1 ຂອງຄະນະກໍາມະການການຊ່ວຍເຫຼືອ ແລະ ການພັດທະນາຂອງ ອົງການເພື່ອການຮ່ວມມື ແລະ ການພັດທະນາທາງເສດຖະກິດ (OECD DAC). ການທົບທວນ ຍັງໄດ້ນໍາໃຊ້ບົດການປະເມີນປີ 2022 - ພາກທີ 1 ຂອງລະບົບປະເມີນ 2 ໃນການໃຫ້ຄະແນນຈາກ 0 ຫາ 5 ຂອງກອງທຶນລະຫວ່າງປະເທດເພື່ອພັດທະນາກະສິກໍາ (IFAD).

ບົດລາຍງານຂອງ CIVITAS ໄດ້ເປີດເຜີຍວ່າ ໂຄງການປັບປຸງຊີວິດເປັນຢູ່ຊຸມຊົນ ໄດ້ຮັບຄະແນນ ‘5’, ເຊິ່ງແມ່ນຄະແນນສູງສຸດສໍາລັບຄວາມສອດຄ່ອງ ແລະ ການພັດທະນາແບບຍືນຍົງ. ໂຄງການດັ່ງກ່າວ ຕອບສະໜອງຄວາມຈໍາເປັນ ແລະ ບັນດາບູລິມະສິດຂອງທ້ອງຖິ່ນ ເຊິ່ງສອດຄ່ອງກັບບັນດາເປົ້າໝາຍການພັດທະນາທ້ອງຖິ່ນ ແລະ ໃນປະເທດ. ໂຄງການ ຍັງສະແດງໃຫ້ເຫັນການມີສ່ວນຮ່ວມຂອງຊາວກະສິກອນ 244 ຄົນຜູ້ທີ່ເປັນສ່ວນໜຶ່ງໃນກິດຈະກໍາຕ່າງໆຂອງໂຄງການ. ຍັງມີການເພີ່ມຂຶ້ນຂອງລາຍຮັບມະຫາສານສໍາລັບຊາວກະສິກອນ 214, ເຊິ່ງສ້າງລາຍຮັບຫຼາຍກວ່າ $606,891 ໃນປີ 2022, ພ້ອມທັງສ້າງການບໍລິການພາຍນອກ ແລະ ຊຸກຍູ້ເຄື່ອງມື ລວມທັງການເຂົ້າເຖີງຕະຫຼາດທີ່ດີກວ່າເກົ່າ. ໂຄງການ ສືບຕໍ່ສະໜອງການຝຶກອົບຮົມ ແລະ ໂອກາດອັນຕໍ່ເນື່ອງສໍາລັບຊາວກະສິກອນ ຜ່ານແຜນລິເລີ່ມການສ້າງຄວາມອາດສາມາດຂອງບໍລິສັດ ແລະ ສາມາດສ້າງຜົນປະໂຫຍດໃຫ້ບັນດາຊຸມຊົນ ໄປຕື່ມຈາກໄລຍະຂອງໂຄງການ.

ໂຄງການສ້າງຊີວິດເປັນຢູ່ຊຸມຊົນ ຍັງ ໄດ້ຮັບຄະແນນສູງໃນດ້ານ ‘ປະສິດທິພາບ ແລະ ປະສິດທິຜົນທີ່ເຂັ້ມແຂງ’. ໂຄງການ ໄດ້ບັນລຸວັດຖຸປະສົງສ່ວນໃຫຍ່ ແລະ ໄດ້ສ້າງຜົນກະທົບຢ່າງຫຼວງຫຼາຍ ໃຫ້ຊາວກະສິກອນ ແລະ ບັນດາບ້ານເປົ້າໝາຍ. ໂຄງການ ໄດ້ຮັບການຍ້ອງຍໍສໍາລັບການນໍາໃຊ້ຊັບພະຍາກອນທີ່ມີປະສິດທິຜົນ ແລະ ຫຼຸດຜ່ອນສິ່ງເສດເຫຼືອ. ຄະແນນດ້ານປະສິດທິຜົນ ສອດຄ່ອງກັບຂໍ້ມູນເຊິ່ງສະແດງກ່ຽວກັບການນໍາໃຊ້ຊັບພະຍາກອນຝຶກອົບຮົມທີ່ສູງ, ແລະ ກອບການພັດທະນາກະສິກໍາແບບຍືນຍົງ ແລະ ສີຂຽວຂອງກົມປູກຝັງ ແລະ ພະແນກກະສິກໍາ ແລະ ປ່າໄມ້ຂອງແຂວງ, ລວມທັງການສະໜັບສະໜູນໃຫ້ຄໍາປຶກສາ ແລະ ການແນະນໍາທີ່ປະຢັດຄ່າໃຊ້ຈ່າຍຢ່າງມີປະສິດທິຜົນຕໍ່ ຊາວກະສິກອນ.

ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະ ປະທານບໍລິຫານຂອງບໍລິສັດ ແພນອອສ໌, ໄດ້ກ່າວກ່ຽວກັບການນໍາໃຊ້ມາດຕະຖານການປະເມີນລະດັບສາກົນຂອງບໍລິສັດ ພູເບ້ຍ ມາຍນິງໃນການທົບທວນໂຄງການປັບປຸງຊີວິດເປັນຢູ່ຊຸມຊົນ ຂອງບໍລິສັດ.

ທ່ານ ເຊັງ ກ່າວວ່າ: “ບໍລິສັດ ພູເບ້ຍ ມາຍນິງ ກໍານົດຄວາມຕ້ອງການ, ບັນຫາ ແລະ ມາດຕະຖານຊີວິດເປັນຢູ່ໃນຊຸມຊົນທ້ອງຖິ່ນຂອງພວກເຮົາ ຜ່ານບັນດາກິດຈະກໍາໃຫ້ຜູ້ມີສ່ວນກ່ຽວຂ້ອງມີສ່ວນຮ່ວມ ແລະ ການປະເມີນຜົນກະທົບດ້ານສັງຄົມ, ເຊິ່ງມີການປັບປຸງຂໍ້ມູນລ້າສຸດແຕ່ລະໄລຍະ ໂດຍມີການສໍາຫຼວດດ້ານເສດຖະກິດ-ສັງຄົມຂອງບໍລິສັດ.

“ບົດລາຍງານ ແລະ ບັນດາເກນມາດຕະຖານສາກົນອື່ນໆທີ່ພວກເຮົາ ໄດ້ຈັດຕັ້ງປະຕິບັດ, ເຮັດໃຫ້ພວກເຮົາ ມີຄວາມເຂົ້າໃຈເລິກເຊິ່ງກ່ຽວກັບໂຄງການຂອງພວກເຮົາ ແລະ ສະໜອງໂອກາດຕ່າງໆ ເພື່ອສ້າງຜົນປະໂຫຍດດ້ານເສດຖະກິດ ແລະ ສັງຄົມຫຼາຍຂຶ້ນໃຫ້ບັນດາຊຸມຊົນທ້ອງຖິ່ນ.”

ທ່ານ ຈັນເພັງ ບຸນນະຜົນ, ປະທານ ບໍລິສັດ ພູເບ້ຍ ມາຍນິງ ກ່າວຕື່ມວ່າ: “ພວກເຮົາ ມີກົນໄກຕ່າງໆເຊິ່ງຈັດຕັ້ງພາຍໃນການປະຕິບັດທຸລະກິດຂອງພວກເຮົາ ເພື່ອຕິດຕາມ ແລະ ປະເມີນບັນດາກິດຈະກໍາການມີສ່ວນຮ່ວມ ແລະ ການພັດທະນາຂອງພວກເຮົາໃນບັນດາຊຸມຊົນທ້ອງຖິ່ນທີ່ຢູ່ໃກ້ເຂດດໍາເນີນງານຂອງພວກເຮົາ. ບົດລາຍງານດັ່ງກ່າວ ຊ່ວຍໃຫ້ພວກເຮົາ ສາມາດພັດທະນາແຜນໂຄງການປັບປຸງຊີວິດເປັນຢູ່ຊຸມຊົນ ຂອງພວກເຮົາ ໂດຍການປຶກສາຫາລືກັບພາກລັດ ແລະ ຕາງໜ້າຊຸມຊົນ.”

แชร์